相信唔少人對於日本4～5月大型連假「黃金週」都略有所聞，咁大家又有無聽過「白銀週（Silver Week）」呢？可能有唔少讀者都係第一次聽到呢個詞語，實際上「白銀週」並唔似「黃金週」般，每年都一定會固定放假！「白銀週」連假會否出現，一切就取決於9月日本公眾假期「敬老之日」與「秋分之日」。今次FUN! JAPAN編輯部就要為大家介紹一下，堪稱夢幻連假嘅「白銀週」文化♪
白銀週由來
「白銀週」一詞首次出現係2009年，包含「敬老之日」和「秋分之日」在內，當年9月19日至9月23日偶然組成連續5日連假，多個新聞媒體於是就將呢5日秋天連假聯同「黃金週」做對比，稱之為「白銀週」。到底兩者有咩分別呢？「黃金週」幾本上為固定日子，相反「白銀週」則係取決於非固定公眾假期，幾年先出現一次嘅大型連假。因此當「僥倖」出現多日連假嘅年份，好多日本人都會把握機會趁著呢段期間安排國內外旅遊。
「白銀週」有咩出現條件？
每年放唔放得到「白銀週」嘅關鍵，就在於「敬老之日」與「秋分之日」呢2日公眾假期。日本實施「快樂週一（Happy Monday）」制度，會將部分假日調整至星期一，而「敬老之日」被定為9月第三個星期一，「秋分之日」則因年而異，通常會落於9月21日、22日、23日其中一日，因此並唔會每年都啱啱好形成連假。遇上「秋分之日」為星期三嘅情況，夾喺兩個假期中間嘅禮拜二就適用「快樂週一」制度被調整為假日，如此一來就能夠從星期六一直放假放到禮拜二，形成5連休！
因為稀有所以亦稱為「白金週」
因為只有喺形成5日連假時先會被稱為「白銀週」，唔係每一年都會出現，因此會有人以稀少且珍貴嘅「白金」取代「白銀」，設之為「白金週」。
下次「白銀週」幾時會出現？
繼2009年、2015年之後，未來「白銀週」將會於2026年、2032年、2037年出現。即使該年無「白銀週」，日本人都習慣請年假，自己「白銀週」自己安排！連續假期期間，日本全國觀光景點等地都會湧進大批人潮，酒店幾乎全被訂滿，無論係揸車或搭車都十分擁擠。將來有計畫喺9月期間去日本旅行的話，記得事先做好規劃，提早預約好酒店，並且預留更鬆動彈性移動時間喔♪
Comments