烏冬可以話係日本相當受歡迎嘅麵類之一，男女老幼都鍾意不在話下，而且一年四季都品嚐得到。想要快速解決一餐，有唔少人會選擇烏冬，事關口味簡單得嚟又好味！日本各地因文化等因素異，發展出多款充滿地道特色嘅烏冬，更有湯烏冬、豆皮烏冬、撈烏冬或炒烏冬等層出不窮食法。今次，FUN! JAPAN編輯部今次就要同大家介紹各種烏冬與食法！
烏冬是什麼？
烏冬係一種由小麥粉製成嘅麵條，通常形狀比一般麵條粗，口感彈牙兼有嚼勁，係日本食文化中相當常見嘅料理之一。烏冬同蕎麥麵、拉麵相比，顏色偏白比較光滑，每間店舖所製作、使用嘅麵條粗細亦會有所不同。烏冬據聞係於10世紀至13世紀左右由中國傳入日本，當時部分地區難以種植白米，因此就選擇以烏冬代替，作為當地主食。
日本烏冬食法超多元化！6款根據不同食法的烏冬種類
依照唔同地區，烏冬製作方法與添加配料都會唔一樣。雖然麵條本身味道比較清淡單調，但食法就相當多元化。烏冬麵條彈牙兼有嚼勁，可以煮成湯烏冬，又可以搖身一變成炒烏冬等，可塑性非常高。因應季節天氣，烏冬又可以喺夏天期間變身冷麵，冬天則化身一碗熱騰騰嘅湯烏冬，各位不妨可以再根據個人喜好放上唔同配料～
烏冬湯麵（熱）
烏冬湯麵（熱）係烏冬嘅基本款式，只要喺加咗「麵汁」（めんつゆ）嘅熱騰騰湯底裡面，放入煮好嘅烏冬就完成。湯底溫和清淡，可以品嚐到烏冬最純粹嘅好味道。通常會喺上頭撒上蔥花，或放上炸得酥脆嘅天婦羅，再加少少薑，即係一款簡單好滋味。
笊籬烏冬（冷）
將煮好嘅烏冬冷卻之後放喺笊籬上，就稱為笊籬烏冬。通常會將蔥花、海苔或薑放入配搭「麵汁」（めんつゆ）調較好嘅沾醬裡頭，口味非常清爽簡單，非常適合喺夏天享用。
釜揚烏冬（熱）
釜揚烏冬（熱）有別於一般湯烏冬，釜揚烏冬係直接將煮好嘅烏冬撈起，並未有經過冷卻冰鎮，直接放入木盆享用。有部分店家會提供適合單人享用嘅份量，或者係可以畀一家大細分享嘅大份量。通常都係配搭特別調製嘅沾醬，由木盆中挾起麵條放入自己嘅碗裡面慢慢品嚐。
咖哩烏冬（熱）
每到冬天最適合嘆返碗咖哩烏冬暖胃！用日本咖哩取代清淡湯頭，濃厚咖哩通常會用「麵汁」（めんつゆ）湯頭稀釋，變到好似咖哩湯咁，深受小朋友們喜愛。
鍋燒烏冬（熱）
將烏冬與蔬菜、雞蛋等食材一齊放入鍋煮，亦係冬天相當受歡迎嘅口味。清淡湯頭，通常會加入天婦羅、雞蛋、魚板、蔬菜等多種配料，令烏冬味道更加豐富，食得更滋味。
炒烏冬
通常會加入好幾種唔同食材，如：紅蘿蔔、肉絲、椰菜等等配搭烏冬，用平底鍋或鐵板炒至熟透，最後再加少少日式醬油，為炒烏冬增添多一層好味道，相比起其他烏冬，炒烏冬口味會比較偏重，係日本鐵板燒或居酒屋常見菜式之一。
加上配料令烏冬變得更好味！5款烏冬配料最佳拍檔
喺烏冬上加上少少配料與心思，絕對可以令烏冬變得更加好食！最常見配料有天婦羅、炸蔬菜什錦天婦羅或魚板等等。
月見烏冬
月見烏冬，對於遊客嚟講可能比較陌生。其實月見烏冬就係喺烏冬上面，放上一隻生蛋黃，就好似高掛喺天空嘅月亮。「月見」嘅意思即係賞月，純白色烏冬成為天上白雲，「月見烏冬」呢個名係咪好有詩情畫意呢？
麵衣烏冬
麵衣烏冬，日文稱為「たぬきうどん（狸貓烏冬）」，由撒上一粒粒炸得酥脆嘅天婦羅麵衣而成。
豆皮烏冬
豆皮烏冬，日文稱為「きつねうどん（狐狸烏冬）」，簡簡單單地喺烏冬上頭放上一塊豆皮即完成！
年糕烏冬
日文為「力うどん（力烏冬）」，意思係加入年糕嘅烏冬。通常會與其他配料一齊組合食用，一般都係放入日式燒年糕。食完之後會唔會變得力大無窮就唔知，不過烏冬裡頭加咗年糕，至少可以肯定熱量會增加！
海帶烏冬
簡簡單單地喺烏冬裡面放上海帶，就成為海帶烏冬～
「日本三大烏冬」最出名！推介5款日本地區特色烏冬
烏冬係日本國民美食之一，部分地方仲有主打口感煙韌，耐嚼嘅烏冬麵條。而眾多烏冬之中，香川讚岐烏冬、秋田稻庭烏冬以及群馬水澤烏冬更係號稱為日本三大烏冬。當然，仲有唔少地方都有極具當地特色嘅烏冬，有機會去當地旅行嘅話，推薦您一定要去品嚐。
香川縣：讚岐烏冬
讚岐烏冬形狀較為方條狀，又以口感煙韌，比較耐嚼聞名。讚岐烏冬發源地係四國香川縣，而讚岐一詞係四國香川縣地區嘅舊名。據聞，讚岐烏冬歷史可以追溯至一千多年前，僧侶空海將烏冬製作方法帶去日本，並傳授畀讚岐地區居民。香川縣氣候種出嚟嘅小麥品質優良，所製造嘅烏冬富有彈性且光滑。現時香川縣內擁有超過600間烏冬專門店，對於香川縣縣民嚟講，日常生活中係唔可以冇咗烏冬，所以香川縣又被稱為「烏冬縣」。
秋田縣：稻庭烏冬
秋田縣嘅稻庭烏冬比較細薄，亦係日本相當知名嘅烏冬之一。稻庭係秋田縣一個地名，當地烏冬歷史可以追溯至17世紀，據聞當時有一位居民改善乾燥並改良反覆揉捏嘅製麵技術，因而製造出更細嘅烏冬麵條，當年嘅技術傳承下，發展出稻庭特有嘅烏冬，因而享譽盛名。烏冬麵團經過不斷地揉捏，用手搓揉等過程，令麵條中富含更多空氣，繼而令到麵條可以保存一段相當長嘅時間，而且富有嚼勁。
群馬縣：水澤烏冬
群馬縣水澤烏冬麵條極度純白，近乎半透明、質地光滑。歷史可以追溯至大約400年前，最初係提供澀川市水澤寺參拜信眾品嚐嘅餐點。有專門協會為水澤烏冬生產嘅品質做保證，確保以水命名嘅烏冬麵條係由傳統工法製作，當中包含花費兩日製作，遵循秘傳手法嘅揉捏工序，並使用榛名山純淨水源。
三重縣：伊勢烏冬
伊勢位於三重縣，城鎮雖然細小，但歷史地位重要。當地過去非常盛行前往伊勢神宮參拜，伊勢烏冬亦由此誕生。參拜者經過長途跋涉，疲憊不堪，為咗唔會造成參拜者們胃部負擔，特別將極粗嘅烏冬麵條煮得比較軟爛，上頭撒上蔥花和柴魚片，配搭小魚乾、醬油熬煮後濃郁醬汁享用。
山梨—餺飥烏冬
山梨餺飥烏冬麵條寬闊又扁平，煮嘅時候會放入當季蔬菜和味噌，屬山梨知名鄉土料理之一，冬天嘆返碗山梨餺飥烏冬，驅寒又暖胃，即刻成個人都暖返晒！
Comments