【日本拉麵】《火影忍者》、《你的名字。》、《崖上的波兒》…細數日本動漫作品「老是常出現」拉麵！

忍者漫畫《火影忍者》忠實粉絲遍佈世界各地，主角漩渦鳴人喺故鄉木葉村就有一間經常去嘅拉麵店叫做「一樂」。

由老闆手打先生與女兒菖蒲經營嘅店舖係木葉村忍者經常光顧嘅店家。曾經破壞整條村嘅妖怪九尾被封印喺鳴人體內，因此鳴人從小就被村民討厭、欺負。當於忍者學校任職嘅海野伊魯卡老師帶著鳴人嚟到呢間「一樂拉麵」，拉麵店氛圍與親切待人嘅老闆父女，就成為對鳴人而言一處療癒嘅居所。

喺作者岸本齊史就讀嘅九州產業大學校園對面有一間名為「一樂拉麵 九產大前店」嘅拉麵店，據聞就係作品中拉麵店嘅原型。雖然拉麵店已於2014年結束營業，但「一樂拉麵」喺福岡縣縣內仲有其他分店，所以遊客現時仲可以實際品嚐到主角鳴人食過嘅同款拉麵！鳴人經常食嘅豬骨湯底「味噌叉燒拉麵」上頭擺滿芽菜、蔥花、叉燒等，份量十足、粗身麵條加上豬骨味噌湯底，味道非常夾！

最鍾意食拉麵嘅小泉同學

《小泉同學愛吃拉麵》主角小泉，係一位外表迷人又冷酷嘅謎之女高中生。呢位小泉同學只要食到好食嘅拉麵，就會好似變咗人格咁充滿熱情與活力。故事之中加插咗唔少實際存在嘅拉麵店菜式、點餐方式以及拉麵相關淵博知識，如果想要了解日本拉麵嘅一切，《小泉同學愛吃拉麵》就係不二教材！

電視動畫第一集故事中講到，大澤悠對於剛轉校嘅小泉同學充滿興趣，喺返屋企途中偶然見到小泉同學正喺一間拉麵店前排隊，於是就跟著一齊排隊。呢間拉麵店嘅原型，正正就係「拉麵二郎」。故事亦有描述到，小泉同學購買餐券後向店員講咗一連串「野菜增、大蒜、油、湯濃」類似咒語嘅說話，意思即「多放蔬菜、大蒜、豬油、湯底略濃」，相信只要有食過「拉麵二郎」嘅讀者都會非常有親切感吧？

第二集故事中則提到，班上另一位同學中村美沙同小泉同學一齊挑戰食極辣麵—無錯，今次登場嘅舖頭就係源自「蒙古湯麵中本」！美沙唔理店員勸告，叫咗碗與小泉同學一樣辣度嘅「北極拉麵」，結果從此愛上極辣拉麵！加上另一位擔任班長嘅同班同學高橋潤，每集同小泉同學一齊探索深奧拉麵世界嘅故事發展，就係呢部作品嘅精彩之處。

《One Piece海賊王》望澤使出拉麵拳法！

描述草帽海賊團（草帽一行人）船長蒙其·D·路飛展開航海冒險嘅人氣動漫《One Piece海賊王》中，亦有一位同拉麵息息相關嘅角色—料理格鬥家兼海上火車主廚望澤。

望澤隸屬世界政府直屬秘密間諜機關CIPHER POL（CP）CP7部門，招式為拉麵拳法。望澤可以自由自在操控由「合金小麥粉」製成、有如金屬般堅硬嘅麵條；從鼻噴出「拉麵光束」；仲會著上由拉麵製成嘅「拉麵西裝」，隨便對佢攻擊的話手腳就會被拉麵夾住！以上種種招式以外，仲有以拳頭攻擊嘅「豚骨攻擊」、增加手臂揮出連續拳頭攻擊對方嘅「複麵攻擊」，靠兩隻手腕呈波浪狀夾擊對手嘅「拉麵餃子套餐攻擊」等等，使出一招又一招稀奇古怪嘅「拉麵拳法」。

《崖上的波兒》火腿拉麵

吉卜力工作室電影《崖上的波兒》中亦有拉麵登場—麗莎為宗介與波兒煮嘅「火腿拉麵」。見到２位角色倒入熱水之後靜心等候三分鐘嘅一幕，應該就會知道原型就係杯麵（或日清小雞拉麵）。

麗莎除咗放上波兒最鍾意嘅火腿，仲放有水煮蛋及蔥花，不愧係為人母親嘅麗莎，即使係煮杯麵時都有考慮到營養呢！

《你的名字。》中登場嘅地道特色拉麵

千年一遇嘅彗星造訪地球，令到住喺東京嘅男高中生「瀧」，與生活喺深山鄉下嘅女高中生「三葉」莫名地靈魂互換。過程中兩人加深對彼此了解與牽絆，進而展開一段愛情故事…相信大家都紅極一時嘅《你的名字。》都非常熟悉，而故事裡瀧與朋友一同前往三葉所住嘅岐阜縣飛驒高山地區時，曾經途中路過一間店舖品嚐地道特色拉麵「高山拉麵」，唔知大家又有無印象呢？

高山拉麵屬於口味清爽醬油口味，麵條使用極幼麵條，配料有筍乾、叉燒與蔥花，於雞骨湯底內再添加醬油基底醬料而成。高山市市區提供高山拉麵嘅拉麵店有幾十間，味道與配料或多或少都有差異，其中日清食品就以劇中登場嘅拉麵店為靈感，曾經推出「你的名字。吉野的高山拉麵」，成為熱門討論話題！

動漫與日本文化往往有著密不可分嘅關係，透過動漫了解日本文化亦係推薦方式之一喔！