歷史悠久兼景色優美嘅中津市坐落於九州大分縣西北方，遊客可以邂逅古色古香歷史建築物與文化財之餘，仲可以大啖食到當地新鮮捕獲嘅海鰻！中津充滿江戶時代下町風情，身處市內感覺就彷如穿越時空，要體驗懷舊氣息之旅就係咁容易！
保留江戶時代風貌嘅中津城下町
日本北九州大分縣中津市北部面向周防灘、南部面向山地，海景綠林交織而成嘅絕景令人目不暇給。北部近海方面坐擁中津城以及與蘭學相關嘅歷史建築物等城下町一帶，南部山地方面則擁有極具人氣嘅風景名勝耶馬溪，無論係南部定係北部，誘人景點都相當豐富。
提到中津一大地標，非中津城莫屬。中津城係九州最古老嘅近代城郭，位於大分縣與福岡縣交界處嘅中津川河口，與高松城、今治城並稱日本三大水城。城堡由16世紀末統治當地嘅黑田官兵衛開始規劃與建造，其後經歷城主改朝換代，細川家、小笠原家、奧平家嘅治理下，城下町規劃與建設日益擴大，惟最基本嘅區域「町」劃分方面則一直承接自黑田官兵衛時代所做嘅規劃去發展而成。除咗中津城，中津城下町必去觀光景點多多，即刻逐一話您知！
中津城
目前嘅天守閣係1964年重建，天守閣內部係奧平家歷史資料館，展示奧平家歷代之主嘅武器與防具等等相當珍貴嘅資料。
景點資訊
- 地址：大分縣中津市二之丁本丸
- 交通：從JR中津站步行約15分鐘
- 營業時間：09：00～17：00
- 定休日：全年無休
- 門票：高中生以上 400日圓、小童 200日圓、未就學兒童免費
- 官網：http://www.nakatsujyo.jp/foreign.html
寺町
「寺町」如同其名，區域寺廟眾多。城下町沿著中津城東邊嘅外護城河而興建，擔任抵擋外敵入侵、保衛城下町之重責。每年8月9日寺町會舉辦「中津寺町燈籠祭」，屆時寺町一帶將掛滿無數個紙燈籠，別有一番韻味。
福澤諭吉舊居兼紀念館
慶應義塾創辦者福澤諭吉嘅舊居，亦係紀念館。紀念館裡面有展示《學問之勸》原始初版以及相關遺物等等。
景點資訊
- 地址：大分縣中土留守居町586
- 交通：從JR中津站步行約15分鐘
- 營業時間：09：00～17：00
- 定休日：12月31日
- 門票：單人票（高中生以上）400日圓、單人票（中學生以下）200日圓
村上醫家史料館
村上一家從1640年初代嘅村上宗伯開設醫院起，就擔任「中津藩御典醫」（即專門侍奉藩主嘅醫生），而呢一間「村上醫家史料館」就係村上一家人所居住嘅屋企。建築沿用江戶時代當時建造嘅房屋，內部展出咗歷代當家所保留嘅醫學相關資料，可以從中學習到過往蘭學興盛嘅中津藩醫學及蘭學總總歷史。
景點資訊
- 地址：大分縣中津市1780番地
- 交通：JR中津站步行約10分鐘
- 營業時間：09：00～17：00
- 定休日：星期一（遇假日順延至隔日）、新年假期（12月29日～1月3日）
- 門票：普通票 210日圓、高中大學 100日圓、中學生以下免費
耶馬溪
耶馬溪係大分山國川一帶流域嘅溪谷總稱，溪谷遍佈流經中津市山國川嘅中上游流域以及支流流域一大片範圍。由火山爆發形成嘅臺地上，遍佈由溪水侵蝕而造成大量嘅奇岩怪石，係著名「日本三大奇景」之一。耶馬溪根據各區域會有各種各樣同嘅動人風景，即刻同大家分享當中最具代表性嘅2個地方。
本耶馬溪
「耶馬溪」位於山國川上游一帶，有青之洞門、競秀峰等等著名景點。其中「青之洞門」背後流傳著一個感人故事，講述一位遊歷各國法號叫禪海嘅僧人，由於唔想再見到有人因為懸崖峭壁滑落山谷而喪命，因此就率領一班石工，單憑槌子與鑿子，費時30年歲月靠人手鑿出隧道。競秀峰係耶馬溪眾多景點當中，數一數二嘅風景名勝。
景點資訊
- 地址： 大分縣中津市本耶馬溪町東屋形
- 交通：從大分自動車道日田交匯處，開車約40分鐘
深耶馬溪
深耶馬溪以「一目八景」而聞名，分別係「海望嶺」、「仙人岩」、「嘯猿山」、「夫婦岩」、「群猿山」、「烏帽岩」、「雄鹿長尾嶺」、「鳶巢山」，能夠一次過將8個地方嘅美景盡收眼簾，所以命名為「一目八景」。
景點資訊
- 地址：大分縣中津市耶馬溪町大字深耶馬
- 交通：從JR中津站搭公車約90分鐘；豐後森站搭公車約20分鐘；從大分道日田交匯處自駕約1小時
- 官網：https://tourism.nakatsuyaba.com/
中津必食海鰻美食
周防灘南方嘅海域稱為豐前海，深度淺嘅豐前海海岸孕育出豐富嘅魚貝類，所以中津嘅海鰻肉質特別鮮甜美味。「汆燙海鰻」、「海鰻涮涮鍋」、「海鰻天婦羅」、「海鰻壽司」等等提供多種食法，有機會一定要去試試中津有幾滋味喇。
中津市交通方式
- 從JR小倉站乘搭「特急列車音速號」至JR中津站，車程約30分鐘。
- 從福岡機場乘搭福岡市營地下鐵至JR博多站，轉搭「特急列車音速號」至JR中津站，車程約60分鐘。
- 從大分機場乘搭縣北快速利木津巴士「North Liner」至JR中津站，車程約90分鐘。
- 從JR大分站乘搭「特急列車音速號」至JR中津站，車程約45分鐘。
Comments