日本九州必去：煙霧瀰漫別府溫泉！

九州位於日本南部，範圍內遍布多個溫泉鄉；而大分縣別府市，就係當中擁有日本最多溫泉而且湧出量規模最大嘅地區。別府一帶好耐以前就已經發展成溫泉勝地，至今仍吸引眾多日本國內外遊客前來造訪。

別府溫泉坐擁眾多溫泉鄉

煙霧瀰漫嘅溫泉蒸氣可謂別府豐富溫泉資源嘅象徵。別府市內散落著８處溫泉鄉，有「別府八湯」之稱。「八湯」分別為「濱脇溫泉」、「別府溫泉」、「龜川溫泉」、「鐵輪溫泉」、「觀海寺溫泉」、「堀田溫泉」、「柴石溫泉」以及「明礬溫泉」，而本文就會為大家介紹其中幾個溫泉！

別府溫泉鄉內嘅竹瓦溫泉創建於1879年，現今嘅建築物建於1938年。建築擁有華麗「唐破風」（屋頂裝飾兩側凹陷、中央凸出如遮雨棚般嘅傳統建築模式）屋頂，遊客除咗浸溫泉之外，仲可以體驗沙浴。竹瓦溫泉泉質仲有舒緩神經痛、肌肉酸痛、關節痛、手腳冰冷、促進血液循環等效用𠻹！

龜川溫泉井名溫泉為「別府海濱砂浴」。由於鄰近海邊，因此遊客躺於沙灘上、將全身埋於熱辣辣嘅砂粒嘅時候，仲可以順便欣賞美麗海景，靜心享受新陳代謝排毒嘅過程。

別府市過半數源泉都集中於鐵輪溫泉，而「地獄巡禮」嘅「地獄」溫泉亦多數都座落於區內。鐵輪溫泉名單包括青藍色「海地獄」、約70頭鱷魚居住嘅「鬼山地獄」、白色「白池地獄」、因地底流出嘅灰色泥漿沸騰時場景類近和尚（坊主）頭而被命名嘅「鬼頭坊主地獄」等等，營造出一片奇幻詭秘嘅地獄絕景。

喺鐵輪溫泉一帶散步時，您會見到大量溫泉蒸氣瀰漫，令人更加融入溫泉鄉氣氛之中。但千萬要留意，部分洞穴冒出嘅蒸氣溫度極高、非常危險，有可能會灼傷㗎！

觀海寺溫泉以「杉乃井大飯店」最為出名，酒店內嘅「棚湯」為露天溫泉，住客於享受溫泉、盡情放鬆嘅同時，亦可飽覽到別府灣嘅無敵海景。

明礬溫泉係別府著名溫泉之一。明礬溫泉內嘅硫化物能夠產生天然結晶，當地因採取溫泉結晶而令溫泉業得以發展蓬勃。遊客可於區內隨處見到一座座茅草屋頂嘅「湯之花小屋」，充滿獨特溫泉風情。另外，區內亦有一間別府溫泉保養樂園，園內嘅泥漿浴擁有超高人氣，係熱門必試體驗！

嚟到鐵崙溫泉區，請您一定要試試「地獄蒸」，即利用溫泉蒸氣蒸熟嘅食物。食材種類相當豐富，例如蔬菜、海鮮、雞蛋等等都應有盡有，最重要係每款都味道有保證，相當值得一試！

此外，「海地獄」嘅「地獄蒸布丁」及溫泉蛋等特色美食亦屬一大推薦。

專程嚟到別府，又點可以錯過別府當地美食呢？例如別府炸雞天婦羅（とり天）、別府冷麵等等都係當地特色㗎！

如果有機會去九州，請您千祈唔可以錯過別府！精彩豐富景點未能盡錄，尚有更多等您嚟探索！