位於九州熊本縣嘅主題樂園「阿蘇農場樂園」，係世界上唯一一座，由健康專家監修嘅健康主題樂園。樂園裡面嘅遊樂設施唔單止要郁動身體四肢，仲要動腦筋，內容非常獨特。今次FUN! JAPAN編輯部就同大家介紹阿蘇農場樂園嘅魅力所在！
阿蘇農場樂園係？
阿蘇農場樂園係一座位於熊本縣阿蘇市嘅主題樂園，理念係喺阿蘇優美嘅大自然中，透過運動、三餐飲食、心靈療癒、圓頂小屋住宿設施、各項體驗同學習、阿蘇嘅獨特購物體驗，嚟實現「真正嘅健康」。
依照日本作為國家以及學者所推廣嘅健康理念所打造嘅主題樂園，相當有說服力！
特色之1：多元自我檢測裝置 測量您的「健康指數」
相信有好多人可能都會想知自己嘅腦部年齡、肌膚年齡、骨頭健康指數等健康指標，但遲遲未有測量機會，就會不了了之。去「健康展示館」就可以輕鬆測量以上提及並令人在意嘅健康數值。透過測量數值去了解生活習慣同飲食習慣，亦可以從中獲得具體建議，有助日後改善身體健康。
特色之2：「元氣之森」及「元氣挑戰館」考驗體力及腦力！
「元氣之森」用上大約1萬坪嘅自然森林與溪谷打造而成，利用獨特運動裝置，令參加者必須活動全身嘅運動設施。例如「彎曲道路」讓體驗者喺條又彎彎曲曲又有斜面嘅路上行，為避免跌落嚟，體驗者需要活用全身手腳，邊行邊諗辦法完成。過程中仲可以幫助提升腳力同下半身柔軟度！另外，仲有全長80米，日本最大規模滑坡「 KINGSLIDER」，穿越又窄又斜嘅牆壁「停滯之牆」等等多項豐富玩樂設施。至於「元氣挑戰館」裡面最受歡迎嘅係需要活用全身上上下下，穿越眾多障礙物先可以抵達終點嘅「巨大迷宮」。無論係大人，抑或係小孩都玩得非常開心，仲可以加強運動能力，鍛鍊肌肉。
特色之3：品嚐有益健康的美食來補充元氣
「大阿蘇自助餐餐廳」推出人氣健康自助餐，餐牌上清楚標明卡路里同營養價值，所選用嘅食材全部都係來自大自然嘅恩惠，仲可以眺望阿蘇美景。而喺「阿蘇香菇亭」可以品嘗到多種熊本鄉土料理。阿蘇農場樂園裡面，多間餐廳貼心地為大家健康著想，精心設計出有益身體健康嘅菜式。另外「阿蘇麵店」有提供拉麵、蕎麥麵、烏冬等麵類，當中使用嘅新鮮厚身木耳係園內「阿蘇健康農園」自家栽培。木耳富含食物纖維，有助預防生活習慣病，營養滿分，非常推薦！
特色之4：入住圓碌碌圓頂小屋休息 好好充電！
阿蘇農莊・Village Zone入面遍佈造型萌爆嘅圓頂小屋住宿設施，坐享阿蘇雄偉自然之美，地理位置極佳。超過300間圓頂小屋房間，每間都有唔同嘅獨特風格，仲有以熊本熊為主題嘅圓頂小屋住宿區「Dream Zone」，非常適合一家大細入住。
景點資訊
- 名稱：阿蘇農場樂園
- 地址： 〒869-1404 熊本縣阿蘇郡南阿蘇村河陽5579-3
- 交通方式：從JR熊本站搭JR豐肥本線，車程約40分鐘，於「赤水」站落車後，搭的士約7分鐘
- 門票： 元氣之森1,600日圓、身體年齡檢測館1,500日圓、元氣挑戰館1,000日圓、幼兒挑戰館1,000日圓
- 營業時間：依各設施而異
- 公休日：全年無休
Comments