去九州熊本縣熊本市觀光，記得一定要乘搭當地交通工具－熊本市電（熊本市營路面電車）！熊本市電一共有兩條行駛路線帶您輕鬆遊覽熊本市內各個著名觀光景點，而今次FUN! JAPAN編輯部就要為大家介紹熊本市電資訊及乘搭方式，下次去熊本就唔怕人生路不熟啦～
何謂「熊本市電」？
「熊本市電」全名為「熊本市營路面電車」，遊客只需要乘搭熊本市電遊覽熊本市，即可輕鬆抵達熊本城、水前寺成趣園等多個著名觀光景點，最適合一邊悠閒眺望車窗外風景、一邊遊覽熊本市！路面電車一共分為兩條，分別為來往JR熊本站前（田崎橋）～健軍町嘅「A系統」路線以及來往上熊本～健軍町嘅「B系統」。
熊本市電車廂既有內部裝修充滿懷舊氣氛嘅車種，亦有於2004年導入最新款嘅超低底盤「COCORO」。當然，會搭到邊一款車，就視乎運氣！班次分面，熊本市電為每隔約5～9分鐘一班車，車費單程均一價170日圓，小朋友90日圓。
如何乘搭熊本市電？
理解基本行駛路線後，然後就簡單介紹乘搭熊本市電時如何上車、落車以及畀錢。
首先，上車時要由中間或者後面車門上車，落車時則要由最前門落車（最新型超低底盤電車則無論任何車門都可以上車落車）。畀錢方面，如果使用現金付款，就記得要落車前將錢投入「運賃箱」；如果使用SUICA、PASMO、快捷卡等交通IC卡，就上車時要於IC卡感應器上拍卡，落車時再拍卡就可以。
市電一日乘車券方便又划算
如果打算全日行程搭熊本市電，推介購買「市電一日乘車券」！「市電一日乘車券」 於熊本市電電車內、熊本站綜合觀光導覽所等地均有發售，只需500日圓即可以全日無限次數乘搭熊本市電！
購買後，乘客需要自行刮開預計使用日期，要小心唔好刮錯。另外，一日券仲附送部份觀光設施優惠折扣，包括有熊本城、水前寺成趣園等熊本市內歷史文化觀光設施，計劃花一日暢遊熊本市市區嘅人就至啱用。另外仲有「熊本電車巴士一日券（わくわく1dayパス）」，適用於乘搭市電、電鐵電車、產交巴士、電鐵巴士以及都市巴士，而且同樣係一日內無限次數使用，隨一日券亦會附送設施門票折扣優惠，記得上官方網站查看更多有關乘車券詳細內容～
沿線觀光景點
電車站「熊本城、市公所前」
如果想要欣賞雄偉熊本城建築，除咗「熊本城、市公所前」站附近嘅日本三大名城之一「熊本城」，仲有「熊本縣傳統工藝館」可以畀您慢慢欣賞肥後象嵌、木工雕刻品、染織品、竹製品、陶瓷器具、刀刃等等，熊本縣指定90樣傳統工藝品。
電車站「通町筋」
要去熊本市市中心拱廊式商店街「上通拱廊」、「下通拱廊」血拼購物，就要於「通町筋」站落車。商店街南北全長約1公里，屬西日本最大規模商店街之一。想要去熊本本地百貨公司「鶴屋百貨公司」購物的話，亦可以喺呢個站或「水道町」落車前往。
電車站「水前寺公園」
「水前寺公園」又為「水前寺成趣園」，係一座利用湧出阿蘇伏流水打而成，以池塘為中心構建嘅知名日本庭園。
基本資訊
- 行駛區間：
- Ａ系統：熊本站前（田崎橋）⇔ 健軍町
- Ｂ系統：上熊本 ⇔ 健軍町
- 行駛日期：每天
※班次請上交通局網站查詢 - 車資：大人170日圓、小童90日圓
- 官方網站：http://www.kotsu-kumamoto.jp/
Comments