各位去日本旅行嘅時候，都會乘搭各種大眾交通運輸工具，特別係「坐電車（地鐵）」，更係日本旅行一大樂趣之一。而日本、特別係東京嘅交通運輸網，與其他國家相比起來複雜得多，對部分遊日旅客嚟講可謂一大挑戰，屬於打BOSS難度！不過，再複雜嘅電車路線，都係阻止唔到香港人「返鄉下」嘅決心嘅，係咪先～？
唔知您有無試過遇到以下經驗—雖然語言不通，但係喺香港人眼中非常普通嘅舉動，嚟到日本後卻被視為無禮貌嘅文化差異，因此被其他乘客冷眼相對或勸告，覺得尷尬或掃興呢？
呢篇文章，就要為大家介紹嚟到日本乘搭電車時，事先需要掌握嘅秘訣及資訊！
身處車站周邊時嘅禮儀
從住宿酒店前往車站途中，希望請您記住以下事情：
請勿於電車軌道周邊嬉戲
帶著家人與小朋友步行前往車站時，您或者會經過電車道路嘅軌道。請注意，途人一個唔小心就好有可能會喺路軌上發生重大事故，所以請勿在此嬉戲遊玩，或將石頭或物品放喺軌道上，因為咁做好有可能會造成脫軌，對乘客安全構成危險。加上現今大部分列車都已經裝有監視器，因此記得唔好輕舉妄動啊！
於車站乘搭電車時嘅禮儀
抵達車站後請務必注意以下事情：
1. 確認靠左/靠右行
抵達車站後，下一步就係尋找預計要搭車嘅月台。喺上落樓梯嘅時候，請先確認要靠左/靠右行走，唔好自由隨意亂行。一般嚟講，往月台方向嘅人會靠左行，落車嘅人則靠右行。井然有序地上落樓梯，亦有減少人潮擁擠嘅風險。
2. 請喺黃線內或月台地面指示標誌後排隊等待
喺等待列車埋站時，請記得排隊等候上車，如果係無人排隊嘅情況，請企喺月台黃線後，或跟著月台地面上嘅指示標誌排隊。前面已經有人等待嘅情況下，就請勿企喺其他乘客嘅前面與旁邊，而係到後方排隊。
3. 先落車後上車 優先禮讓落車乘客
電車埋站後、車門打開時，請唔好爭先恐後衝入車廂。首先請讓車上乘客落晒車後，再依隊伍順序上車。
4. 搭電車時千祈唔好「衝門」！
有時候抵達月台時，會遇到剛好電車車門即將關閉嘅情況。呢個時候，請勿強行衝入電車，因為下一班電車好快就會抵達（只限大城市）。
於行駛中嘅電車內
接下來分享幾項身處行駛中嘅電車內時，應該注意嘅情況。
1. 請勿霸佔超過一個人嘅空間
電車係公共大眾交通運輸工具，座椅等人人都可使用，因此請勿將背囊及物品放置於座椅上。攜帶大型或多件行李嘅時候，請為其他乘客著想，將行李放置於身邊，或電車內嘅置物架上。
2. 請勿大聲喧嘩，說話時請輕聲細語
電車對日本人嚟講係主要交通工具，特別係大城市，市民會使用電車返工返學等，有時候搭車時會呈現疲態。因此，避免製造噪音就成為搭電車禮儀之一。即使係緊急情況下，亦請盡量唔好使用手機通話等。如果想要傾計，請壓低音量，與朋友聊天時儘量輕聲細語。聽歌、聽電台、上網睇片嘅時候，請戴上耳機並將音量調細。繁忙時間乘搭人潮擁擠嘅電車時，耳機會有漏音狀況，請多加留意。
乘搭新幹線想要講電話嘅時候，請移動至車卡與車卡之間嘅地方接聽電話。
3. 關於關愛座
日本電車與香港相同，會將座椅以唔同布料、記號或顏色區別，將一部分座位設置為關愛座，即專為年長一輩、殘疾人士、孕婦及幼兒而設嘅座位，以及於特定時段內僅限女性乘搭嘅女性專用車廂。當電車人潮疏落時，無論係邊個都可以使用關愛座，但都請時刻留意讓座界有需要嘅人啊。此外，關愛座附近請將電話設為靜音模式，以及盡量避免使用手機，因為坐喺呢區嘅乘客，身上好可能裝有身體輔助器，電磁波有可能會影響正常運作。
即使係關愛座以外嘅座席，將座位禮讓畀有需要嘅人都係一種基本禮貌喔。
4. 請勿飲食
除一般餐廳食肆外，日本人亦習慣喺其他場合飲食，例如係乘搭新幹線或電車綠色車廂以及長途電車、巴士時，都係可以飲食嘅。只不過，一般返工返學嘅電車內，就普遍嚟講唔太會見到乘客飲食喇。
5. 請勿將垃圾丟喺垃圾桶以外嘅地方
電車內請勿丟棄與放置使用過嘅紙巾、膠樽、報紙以及其他種類嘅垃圾。請於搭車前先將垃圾收藏於隨身行李，等到落車後再丟到垃圾桶棄置。若車卡與車卡之間嘅士間或月台上有垃圾桶的話，您亦可以將垃圾丟棄於上述地方。
6. 請勿化妝
女性乘客喺電車內化妝會被認為係非常失禮嘅事情。一旦倒瀉化妝品，更有可能會整污糟座位以及其他乘客嘅衣服，因此有唔少人見到有乘客喺車廂內化妝都會感到唔耐煩。如果可以的話，請喺坐車前先化好妝。
7. 禁止吸煙
喺日本，除咗指定場所以外，幾乎都係禁煙區（包括一般電車在內）。除咗新幹線內嘅指定吸煙區之外，請勿於電車內吸煙。
8. 請控制醉後行為
去日本旅行時，或許大家都曾經會喺電車內見過飲醉酒嘅上班族。即使飲醉酒，都請唔好喺電車內搖晃走動以及就地瞓覺或乾嘔。前面都有提到，日本人討厭大聲喧嘩，因此酒醉狀態時吵鬧喧嘩都會招致白眼。
9. 於電車裡背囊手袋或行李嘅禮儀
電車人潮擁擠時，請勿將後背囊向後揹，而係移至胸前，如此一來即可方便其他乘客上落車。另外，拖著行李喼等大型行李時，請將行李放置於身邊並確實拎好，個人財物切勿離身。
以上嘅日本電車禮儀，您知道幾多呢？有無唔小心「中伏」呢？如果內容能夠幫到各位計劃日本旅行的話，一眾小編就老懷安慰了（笑）。
Comments