由2019年11月8日（五）起至12月25日（三），東京迪士尼樂園®及東京迪士尼海洋®舉辦為期48日嘅特別活動「迪士尼聖誕節」。期間除咗會推出各種聖誕節限定嘅商品同美食、充滿節日氣氛嘅裝飾，仲有加入聖誕節元素嘅特別演出。以下為你重點介紹迪士尼明星嘅巡遊同娛樂表演。
東京迪士尼樂園®「迪士尼聖誕故事集」巡遊
東京迪士尼樂園®嘅重頭戲當然就係深受遊客歡迎嘅巡遊表演。延續舊年，今年聖誕節同樣以「滿載迪士尼明星歡度聖誕情景的故事繪本」為主題，由迪士尼明星為你奉上歌舞歡騰嘅「迪士尼聖誕故事集」巡遊表演。
首先打頭陣出場嘅有打扮成聖誕老人嘅唐老鴨等等，細心留意可以睇到唐老鴨外甥們嘅服飾上印有白色雪人，非常切合聖誕主題。
緊接住就有胡迪、翠絲、巴斯光年等帥氣出場。每擺一個甫士都好有型呢！
而排喺中間就係米奇與好友嘅花車。途中有段時間停車為大家載歌載舞，炒熱氣氛。
迪士尼明星之間仲會不停有好多得意互動。你睇吓米奇、米妮碰鼻後害羞小動作幾可愛！
史迪仔雖然鐘意滑浪，但呢段期間都特地換上聖誕裝束同大家一齊過聖誕！
另外仲有幾位迪士尼公主登場為大家翩翩起舞，真係又美麗又優雅。《冰雪奇緣》花車經過時仲會噴出飄雪，好有冬日聖誕嘅氣氛！
東京迪士尼海洋®港灣娛樂表演「聖誕喜來臨！」
而喺東京迪士尼海洋®嘅地中海港灣就有大型娛樂表演「聖誕喜來臨！」魅力登場。由迪士尼明星連同歌手，以及活力十足嘅舞者們華麗地邊唱邊跳，為觀眾帶來舉有魄力嘅現場表演，一同慶賀聖誕節。
首先隆重登場嘅有身穿白色服裝嘅米奇與米妮。
跟住出場嘅大鼻同鋼牙互動嘅動作都非常可愛。
布魯圖嘅表演都好有活力。
亦有唐老鴨、黛絲同Dancers排成一線，合拍咁一齊跳舞。
最後當然唔少得東京迪士尼海洋®獨有嘅Duffy同朋友仔一齊友同聖誕老人一齊搭船出場，成個表演由多位迪士尼明星同歌舞表演者歡欣咁載歌載舞，熱鬧非常。
今年錯過就再睇唔返啦！晚間「絢彩聖誕」祈願表演
約15米高嘅大型聖誕樹及小聖誕樹閃閃發亮，打造充滿幻想嘅水上娛樂表演。隨住聖誕節嘅音樂，浪漫繽紛嘅色彩不停閃耀變換。快啲嚟同米奇、仲有迪士尼明星們一齊感受浪漫一夜啦！呢個港灣表演嚟到第8個年頭，就喺今年即將落幕喇，仲未睇過嘅朋友，今年係最後機會啦，千祈唔好錯過吖！
除咗以上嘅重點表演，兩個園區內各處仲有多個街頭表演都唔好錯過呀！
Comments