東京迪士尼度假區要喺東京迪士尼樂園打造《美女與野獸》新主題園區！大家仲記得今年年初迪士尼公佈呢個令人興奮嘅消息嗎？日前，官方已經公佈一個好消息，就係《美女與野獸》園區確定喺2020年4月15日盛大開幕，鍾意迪士尼嘅朋友仔，可以訂定機票啦～～～
《美女與野獸》園區 2020年4月15日盛大開幕
仲記得喺年初時，東京迪士尼度假區就送咗一份新年禮物畀大家！公佈將會花費鉅資打造「奇幻樂園(Fantasy Land)」、「明日世界(Tomorrow World)」同埋「卡通城(ToonTown)」嘅新設施，其中「奇幻樂園」就係今次公佈，迪士尼電影《美女與野獸》為主題嘅新區域，令大家等到頸到長嘅新園區，終於確定2020年4月15日要開幕啦！
經典重現野獸城堡同貝兒居住嘅小鎮
園區入面唔單止重金打造《美女與野獸》中野獸居住嘅城堡，高達30米嘅外觀令人感到興奮之外，城堡入面亦會有以貝兒原本居住嘅小鎮為設計嘅小鎮商店，例如「Village Shops」同「Gaston's Restaurant」等都令人非常期待，呢度入面每個角落都會令人好似走入咗童話入面嘅魔法世界一樣，可以親歷經典嘅奇幻場景～肯定會令大家玩到流連忘返。
新遊樂設施‧美女與野獸的魔法物語
根據官方透露，園區內仲會有「美女與野獸的魔法物語」嘅新遊樂設施，大家以坐喺大型茶杯入面，穿越一幕又一幕《美女與野獸》電影中嘅場景，好似最經典嘅野獸變返王子嘅一幕，同貝兒一齊喺舞池邊跳舞嘅模樣，咁浪漫嘅氣氛真係令人回味無窮！大家都可以體驗同貝兒喺宮殿入面，一齊享受呢場宴會嘅歡樂氣氛～
另外，去迪士尼樂園玩，一定搶抽Fast Pass (快速通關券)啊！！今次《美女與野獸》新園區同樣有Fast Pass嘅發券機，而且預計將設置喺貝兒老家「莫里斯小木屋」（記得要筆記好！）
首座室內型劇院「幻想世界森林劇院」
而其他嘅新設施都一樣唔輸蝕，就好似「奇幻樂園」中將會有「幻想世界森林劇院」登場！呢個係東京迪士尼度假區首座室內劇院，屆時將會有好多迪士尼可愛明星們，以音樂、舞蹈等，喺呢個閃閃發光嘅舞台上作出精彩嘅表演！
仲有「卡通城」內嘅「米妮風格工作室」亦係迪士尼樂園首座新設施，遊客可以喺呢度同活潑可愛嘅米妮合照！
而「明日世界」亦會有電影《大英雄聯盟(Big Hero 6)》為主題嘅遊樂設施，以星際宇宙為主題嘅爆谷專門店「Big pop」，有唔同口味嘅爆谷提供（入到迪士尼就當然要買返桶爆谷～！）總之，下年嘅日本旅遊行程入面，一定要按排去埋東京迪士尼樂園～～～
© 妞新聞 www.niusnews.com
Comments