富山縣高岡市高岡山瑞龍寺以其優美禪宗佛教風格嘅伽藍建築佈局而聞名。瑞龍寺境內充滿精彩特色，例如富山縣內唯一被指定為日本國寶嘅山門、佛殿、法堂；以及被指定為日本重要文化財嘅總門、禪堂、大茶堂、高廊下（建於地面以上嘅走廊）以及迴廊三棟，而本文就要為大家介紹高岡山瑞龍寺必睇特色。
高岡山瑞龍寺小檔案
為紀念加賀藩二代藩主「前田利長」，第三代藩主前田利常總共花上大約20年時間建造瑞龍寺。瑞龍寺採取中國中世紀寺院建築形式建成，係一座展示加賀藩財力嘅雄偉寺廟。作為江戶初期禪宗寺院建築之一，寺院獲得世人極高評價，先有山門、佛殿及法堂被指定為日本國寶，而總門、禪堂、大茶堂、高廊下及迴廊三棟亦被指定為日本重要文化財。
高岡山瑞龍寺必睇特色之一：壯觀寺院建築配置
瑞龍寺嘅伽藍配置(寺院建築配置)完全採用鎌倉時代傳入日本嘅中國寺院建築形式。總門、山門、佛殿、法堂呈一直線排列，禪堂、大庫裡(廚房)則講究左右對稱，各佛堂由走廊相連，寺院整體建築呈現出禪宗風格佈局，氣勢非常雄偉！
高岡山瑞龍寺必睇特色之二：法堂
法堂於明曆年間（1655-1657年）完工，係瑞龍寺範圍內最大嘅建築物。法堂內外全由珍貴檜木建成，若果您仔細觀察內裡六個房間，您更會發現中央兩房嘅天花板上刻有由狩野安信（江戶時代畫師）繪製嘅草木花卉。內部嘅隔間門窗及牆壁表面亦施以金箔，建築物極具貴重價值。
高岡山瑞龍寺必睇特色之三：山門
建於1645年嘅瑞龍寺曾一度因大火燒毀，其後於1820年重建。瑞龍寺根據日本傳統數學而設計、屋簷較深，稱之為禪宗寺院山門群雄之首亦絕不誇張！山門兩邊，則各放有一尊金剛力士像。
高岡山瑞龍寺必睇特色之四：佛殿
穿過國寶山門後，您首先會嚟到伽藍(寺院建築)中央嘅佛殿。佛殿屋頂以鉛板覆蓋，屬日本非常罕見嘅建築方式；大殿內則有平行排列木柱、優美曲線蝦子虹樑(海老虹樑)等一眾精彩必睇之處。殿內供奉著從中國傳入嘅釋迦牟尼佛、文殊菩薩以及普賢菩薩共三尊佛像。
高岡山瑞龍寺必睇特色之五：夜間點燈活動
寺廟每逢4月及8月晚上時段都會舉行夜間點燈活動，尤其係4月份活動舉行期間不單只有點燈，場內更會配搭音樂、呈現出紅藍綠紫等七彩顏色燈光，隨著音樂節奏閃爍。活動期間，場內亦會同時舉辦「越中味之市」門前市，多間來自富山縣及外地嘅店舖都會前來擺檔。
關於瑞龍寺
- 建成年份…1663年（寛文3年）
- 主祭神…釋迦如來
- 祭典…節分會／2月3日、利長忌・燭光能・紀念文化講演／5月20日、利長公墓前祭（墓前）／9月13日等等
景點資訊
- 名稱：高岡山瑞龍寺
- 地址：〒933-0863 富山縣高岡市關本町35
- 交通方式：從JR高岡站步行約10分鐘
- Wi-Fi : 服務處附近10公尺內有免費WiFi
- 語言：官網有簡體中文、英文、韓文、俄羅斯文。現場提供繁體中文、簡體中文、英文、韓文、俄羅斯文版導覽手冊。
- 票價：500日圓
- 休息日：全年無休
- 參拜開放時間：9：00～16：30（最後入場16：00）、12月10日到1月31日開放到16：00（最後入場15：30）
Comments