位於和歌山縣嘅熊野那智大社，係熊野三大神社之一，源自對那智瀑布嘅崇拜。以結緣之神聞名嘅野那智大社，唔單止會為人同人之間締結緣分，仲係可以祈求各種願望嘅神明。本文將為大家介紹熊野那智大社嘅必睇特點！
熊野那智大社 小檔案
熊野那智大社係熊野三大神社之一，信仰起源係「那智瀑布」。由太平洋上都可以仰望到嘅那智瀑布，長期以來都被當作神明崇拜，瀑布被視為建國之神「大國主命」嘅化身。1700年前，神社被搬遷到而家嘅位置，可以俯瞰那智瀑布嘅美景。爬上473級嘅石梯級，抵達本殿，裡面供奉咗主神「熊野夫須美大神」為首嘅共12個神明。神社境內嘅寶物殿，展示咗「那智經塚」嘅出土品，仲有熊野那智大社嘅文件資料（國家指定文化財產）等等。
熊野那智大社嘅必睇特色之一：社殿
熊野那智大社海拔約330米，裡面供奉咗主神「熊野夫須美大神」（又稱作伊弉冉尊），仲有各種神明。熊野夫須美大神位於右邊第四個神殿入面,係農業、水產、漁業嘅守護神，同時亦係結緣之神，仲可以實現各種願望。
所有社殿都係「熊野造」建築風格，建築物正面簾子嘅內側，可以水平提起向上打開，仲有格子形狀嘅木板門，稱為「蔀戶」。而左側就係格子門。呢個社殿被列為世界遺產同日本國家指定重要文化財。
熊野那智大社嘅必睇特色之二：神社境內 御縣彦社嘅八咫烏同烏石
傳說中嘅「八咫烏」係三足烏鴉，佢係熊野諸神嘅使者。八咫烏被認為係引導眾神朝著更好方向發展嘅指導神，被供奉於熊野那智大社境內嘅「御縣彦社」入面，正面設有八咫烏嘅銅像。另外，喺本殿前方仲有一塊叫做「烏石」嘅石頭。據說八咫烏為眾神帶路，直到抵達奈良嘅橿原之後，就變成咗一塊石頭。
熊野那智大社嘅必睇特色之三：樹齡約850年嘅御神木「大楠」，穿過巨大樹洞
拜殿旁邊，有一棵樹齡約850年嘅神木「大楠樹」，據說係平安時代末期武將「平重盛」親手種植。神木根部有一個好大嘅樹洞，據說如果穿過樹洞，可以消災解厄。想穿過樹洞嘅人，請一定要喺護摩木（300日圓）上面寫下願望，然後帶埋護摩木一齊穿過樹洞。
熊野那智大社 令人忍不住買嘅開運御守
神社境內有兩棵櫻花樹，係和歌山縣嘅天然紀念物，自古以來都受到參拜者嘅喜愛。託櫻花樹之福，有祈願結好緣嘅「櫻花御守」（800日圓）。另外仲有八咫烏圖案嘅「子供守」（800日圓）、祈求萬事順利嘅「勝守」（800日圓），同埋造型模仿小神社嘅「神殿守」（1000日圓）。全部都好適合當作參拜紀念品！
關於熊野那智大社
- 建立年份：317年
- 主祭神：熊野夫須美大神
- 祭典：2月3日節分祭驅鬼儀式、6月14日紫陽花祭、７月14日那智扇祭、10月17日「神嘗祭」遙拜式及「神嘗祭」奉祝祭等等
景點資訊
- 名稱：熊野那智大社
- 地址：〒649-5301 和歌山縣東牟婁郡那智勝浦町那智山１
- 交通方式：由JR紀勢本線紀伊勝浦站，乘熊野交通巴士前往那智山巴士站，車程約30分鐘。或者，；由埼玉縣大宮乘坐夜間高速巴士（西武觀光巴士高速巴士，20:50由大宮營業所出發～翌日8:10抵達勝浦溫泉）。之後，由紀伊勝浦前往那智山巴士站，巴士車程約30分鐘。
- Wi-Fi : 和歌山免費Wi-Fi
- 語言：現場有簡體中文及英文的導覽手冊
- 門票：寶物殿300日圓
- 休息日：全年無休 (寶物殿逢星期三休息)
- 參拜時間：7：00～16：30（寶物殿 8：00～16：00）
Comments