成日去日本旅行嘅人，相信亦都習慣咗買嘢要加消費稅！相信亦有人會曾經諗過「點解唔寫包埋稅個價格就算？」咁係為咗將來有增加消費稅嘅可能性時嘅對應。今日(2019年10月1日)開始，日本嘅消費稅就由8%增加至10%。對於去日本嘅旅客嚟講，雖然因為有「免稅」嘅購物制度，消費稅上升未必影響好大，但「飲食」等方面，有一啲無免稅嘅項目，喺呢啲情況下，會有乜嘢影響呢？我地一齊嚟探究下。
消費税係乜嘢？日本消費稅嘅歷史
消費稅係指買商品或者惠顧服務時所要付嘅稅項。(亦有一啲例外項目，例如學費、醫療費等)。喺呢度，我地一齊嚟睇吓日本引入消費稅嘅歷史吧。
- 1989年3月 引入消費稅制度，消費稅3%
- 1997年4月 由3%增加至5%
- 2014年4月 由5%增加至8%
- 2015年10月 原定由8%增加至10%，但最後延期實行
- 2019年10月 實行增加至10%
「輕減稅率」措拖 部份項目繼續現有嘅8%稅率
為咗避免影響一般生活消費，日本政府採取咗「輕減稅率」嘅措拖，將一部份有關生活嘅商品項相維持現有嘅8%消費稅。
「輕減稅率」嘅主要對象如下：
- 飲品及食品
- 定期訂購嘅新聞報紙 (規定每星期出版超過兩次嘅刊登一般社會事實嘅刊物)
- 食物外賣
注意：喺便利店購買飲品或食品，然後喺便利店內嘅「EAT IN」區域進食，並不適用於「輕減稅率」
究竟消費稅係8%定10%？點計數？
維持8%消費稅嘅主要係喺以下地方買飲品食品：
- 喺有售外賣嘅餐廳，購買外賣嘅時候
- 便利店
- 藥房
- 百貨公司
- 營養食品及健康食品店
※只適用喺以上地方購買「飲品或食品」。購買酒類就唔係輕減稅率嘅對象。
容易搞唔清，但會增稅至10%嘅有以下情況
- 喺有得外賣嘅餐廳入面食飯
- 喺便利店嘅「EAT IN」區域食嘢
- 喺有食品賣嘅地方買酒類、醫藥品同醫藥外用物品
番外編：外國人旅客嘅消費稅免稅制度
由2014年10月開始，日本開始咗以外國人旅客為對象嘅消費稅免稅新制度，而喺2016年5月更加作出咗改善，令外國人旅客購物更加方便。使用「短期滯在簽證」嘅外國人旅客，係日本買嘢嘅時候，只要去到有免稅店標誌嘅店舖，就可以即刻做到免稅手續。
可以免稅嘅項目如下：
- 一般品
- 消耗品
- 要喺同一日喺同一日舖頭，「一般品」同「消耗品」消費合計總額達5000円以上先適用
※有分開一般品同消耗品計算嘅情況，亦有可以一般品同消耗品一齊計數付款，要小心留意。
※消耗品會有消耗品専用袋包住，出國之前唔可以開封（專用袋嘅膠紙喺一開封過就睇得出嘅）。
免税・退稅方法亦有2種
- 舖頭入面付款時可以立刻做免税，只要出示證件就可以找數時己經喺免稅嘅價格。例如大型嘅藥妝店、電器舖等。
- 購物付款時要先畀連稅價格，之後要去免稅櫃枱做免稅手續，再退回消費稅部份。例如百貨公司等。呢啲時候有機會有退稅手續費。
Comments