八重山群島酒店推薦：多間酒店都可以欣賞到蔚藍大海及白沙小路絕景！

如果您正物色梗八重山群島內嘅住宿酒店，編輯部會建議您將目標鎖定於想要觀光嘅島嶼。八重山群島由石垣島、竹富島、西表島、與那國島等10個島嶼組成，而以下就要為大家介紹各島特色，特別係目前於亞洲國家大受歡迎嘅竹富島飯店「虹夕諾雅竹富島（星のや竹富島）」更係不容錯過！

八重山群島酒店及旅館

八重山群島各島嶼嘅酒店都各具特色。

首先，八重山群島中最大島嶼嘅石垣島上有多間多元化住宿設施，度假酒店、經濟型酒店及公寓式酒店都一應俱全。除咗南部石垣港一帶有多間住宿設施，西表島亦有唔少住宿設施集中於東部及西部沿海地區。酒店選擇以外，您亦可以喺島上搵到別墅或民宿等令您感覺賓至如歸嘅溫馨住宿。

與那國島住宿設施集中於沿岸一帶，以民宿、旅館等小型住宿居多；竹富島住宿設施集中於島上中心地區，類型以民宿居多，沖繩獨有嘅紅瓦屋頂為一大建築特色；而其他較細嘅島嶼即使住宿設施較少，但您仍然可以搵到民宿及公寓式酒店。

各島之間住宿費用相差不大，民宿每晚約5千日圓、度假酒店每晚約為1萬日圓以上。（資訊截至2019年8月）

「虹夕諾雅竹富島（星のや竹富島）」係一間豪華度假酒店，酒店內坐擁純白沙灘、石牆以及琉球紅瓦屋頂建築。度假村被稱為「島上第四個村莊」，保證各位可以喺到度過輕鬆島上時光。

酒店設有48棟獨立別墅型客房，每棟都擁有獨立庭院、空間寬敞，而且所有房間都放有梳化，為遊客打造舒適時光！

每間客房都可以欣賞到九重葛及芙蓉花等花卉、藍天、珊瑚石牆上各種樹木等充滿竹富島風情嘅靚景。入夜後，您仲可以抬頭就望到黑夜中閃耀嘅滿天星斗𠻹！

度假村將沖繩食材以法國料理技法製成，主菜採用當地海鮮及農產品以及度假村內種植嘅蔬菜、香草為主要食材，多款料理皆備受矚目。除精選食材之外，酒店對餐具亦有一番講究，官方特地以陶器盛載料理，令菜式無論係味覺或視覺都同樣出眾。

餐廳亦有提供限量預訂嘅牛肉或時令蔬菜鍋物及燒烤料理，住客安坐房內就可以品嚐到各種鍋物。

「虹夕諾雅竹富島」魅力又點只客房同料理？「島嶼時間SPA」護理療程就選用由島上植物製成嘅精油為客人按摩，並提供各種療程服務，令每位客人都可以度過極致美好時光。

同場仲有多個有趣好玩嘅設施。例如24小時開放使用嘅泳池、可以體驗茶文化嘅「 Yuntaku Lounge」，以及販售原創商品及沖繩傳統工藝品嘅官方商店。

虹夕諾雅竹富島亦設有各式各樣體驗活動，例如竹富島傳統工藝品「竹富棉狹織」織品製作、潛水、乘搭竹富島著名「水牛車」島上觀光，又或搭船夜遊八重山群島石垣島夜景。以上種種無疑都可以為您旅程增添寶貴回憶，記住要試試喇！