日本四國地區琴平遊傳統老街、金刀比羅宮等歷史古跡

琴平喺香川縣嘅內陸位置，有「金刀比羅宮」等多個歷史建築物嘅觀光地區。而且唔同季節，街上都會舉辦多種活動或祭典神事，而金刀比羅宮自古以來都有多個承繼傳統嘅祭典舉行。對日本祭典文化有興趣嘅你就唔可以錯過喇。

有關香川縣嘅琴平

琴平嘅南至北比較長，地形呈細長形。南部有象頭山及其山腳伸延到市鎮街道。作為觀光嘅中心地區除咗有多種觀光景點，仲有溫泉住宿設施聚集嘅「Konpira溫泉鄉」。而北部有寧靜嘅田園及村莊風光。

琴平一年四季都暖和少雨，所以一年中都適合觀光旅遊，但係如果要去位於象頭山山腰嘅金刀比羅宮參拜的話，最推薦就係春天同秋天去。春天有櫻花同杜鵑花盛放、秋天有紅葉美景。神社內或周邊被染成不同色彩嘅風景都非常美豔。

琴平嘅主要觀光景點集中喺南部，有各式各樣嘅觀光名勝，下文就介紹啲推薦嘅俾你啦。

喺琴平有多個如金刀比羅宮、松尾寺等等嘅寺廟神社。其中金刀比羅宮係琴平中最具代表性嘅觀光景點。廣大嘅神社內有多個有睇頭嘅特色之處。例如以莊嚴嘅傳統建築風格為特徵嘅旭社、御神宮、嚴魂神社等多個神社。其他仲有展示佛像等貴重寶物嘅寶物館及展示傳統嘅襖絵（和室之間門牆上嘅彩繪）書院等等，有各式各樣嘅景點。

琴平保留咗為數不少嘅歷史遺跡及傳統建築物。例如金刀比羅宮附近有5條日式老街，仲有烏居、燈籠、道標等史跡散佈於街上各處。

另外，仲有好多如琴平町公會堂等嘅傳統建築物。當中「舊金毘羅大芝居金丸座」係必去景點，因為可以參觀日本現存最古老嘅傳統芝居小屋嘅內部，喺每年4月仲會上演日本古典戲劇添呀。

唔只歷史建築物，喺琴平仲有可以接觸琴平歷史及文化嘅觀光設施。喺琴平町立歷民俗資料館可以睇到好多同琴平嘅歷史及文化、昔日民俗生活相關嘅資料。

另外，又可以去「海之科學館（琴平海洋博物館）」參觀有關海洋及船舶嘅資料、海運道具嘅展示，仲可以睇到以金刀比羅宮嘅參拜者所乘坐嘅「Konpira丸」號為首嘅傳統大型船隻嘅模型添。

喺琴平有好多提供香川名產「讚岐烏冬」嘅食店。而喺金刀比羅宮嘅參道則有好多茶屋同和菓子店，可以食到「灸饅頭（灸まん）」、「船仙貝（船々せんべい）」等等。基本上要搵食去南部嘅JR琴平站為中心嘅市鎮街道就最多食肆喇。

住宿設施幾乎都係喺南部嘅JR琴平站周邊伸延開去嘅「Konpira溫泉鄉」最多。各種住宿設施可供選擇，房價實惠嘅經濟型酒店、可以浸溫泉嘅旅館都有。經濟型酒店嘅房價大約係5,000円左右，而溫泉旅館就大約10,000円起。

想去琴平玩，可以以主要車站JR琴平站作為中心。首先從各地乘搭新幹線到JR岡山站，再轉搭特急列車，50分鐘後到JR琴平站落車。

從JR琴平站去金刀比羅宮，可以乘搭直達嘅「Konpira參拜登山Shuttle Bus（こんぴら参拝登山シャトル）」，到金刀比羅宮入口嘅「大門」站落車。因為係事前預約制嘅巴士，所以想搭的話就要喺官方網頁，用英文版面預約啦。