野口勇（Noguchi Isamu）庭園美術館位於高松市，而此處係雕刻家Isamu Noguchi（イサム・ノグチ，野口勇）晚年制作藝術品嘅地方，現時其居所用作為美術館，係世界上都絕無僅有嘅美術館。館內展示嘅雕刻作品，連同其他公共設施、周邊環境、景觀等，整體甚至可視為一個藝術作品。
有關野口勇庭園美術館（The Isamu Noguchi Garden Museum Japan）
野口勇庭園美術館內保留著野口勇藝術家以前居住嘅住宅，而且有好多石像雕刻，將藝術家生前嘅模樣公開展示於人前。野口勇雕刻家除咗會製作紀念像之外，仲會喺庭園、公園等戶外環境及傢俬、燈飾等室內設計都落咗唔少工夫，係一個獨特嘅藝術家。
野口勇庭園美術館嘅特色
野口勇庭園美術館嘅內可以參觀嘅設施分別為工作室、藏品展覽、Izamu家周邊、雕刻庭園，四個地方。另外，入館參觀時會有導遊隨行導賞，可以一邊聽講解，一邊鑑賞藝術。
野口勇庭園美術館工作室及藏品展覽內欣賞雕刻作品
野口勇庭園美術館工作室喺一個圓形石壁包圍嘅戶外地方。放置咗包括未完成嘅總共150個左右嘅石雕作品，加上周圍自然環境協調下，營造出一個開放嘅空間感。而工作室旁就設置咗一個收藏品展覽，可以欣賞到代表作「Energy Void」等石雕。「Energy Void」係一個高3.6米嘅巨大黑花崗岩藝術品，咁有份量嘅藝術品擺在眼前，其實都幾震撼！
野口勇藝術家嘅住所—「Izamu家」及雕刻庭園
野口勇（Noguchi Isamu）曾經居住嘅「Izamu家」係將江戶時代末期富豪嘅住宅遷移及改建而成。而「Izamu家」行一段石階後有個「雕刻庭園」，係個放置野口勇所設計嘅雕刻品、人造小山丘、石建台而成嘅庭園，整體可以當成一個作品咁去欣賞。
美術館商品店
野口勇庭園美術館有設立商品店，售賣多種野口勇藝術家相關嘅商品。例如印上銅像作品初稿嘅Tote Bag、 野口勇藝術家設計嘅AKARI燈飾品，仲有相關書籍等各式各樣嘅商品。
野口勇庭園美術館嘅參觀資訊
野口勇庭園美術館嘅導賞團必須預約先可以參加，而且有限人數，有興趣就預約咗先出發啦。
開放時間及入場費
野口勇庭園美術館有設定導賞團時間及固定休息日。有導遊隨行嘅導賞團舉辦嘅時間分別為10點、下午1點、下午3點，一日3團，每次1個鐘。請注意，無論想唔想參加導賞團，都一定要預約先可以入館。
基本上美術館於星期一、二、五及星期日休館不開放，而8月中旬同日本新年假期整個期間都會閉館，所以出發前記得Check清楚有無開館啦。入場費方面，一般大人為2,160円。（2019年7月資訊）
導賞團預約方法
預約導賞團可以透過電郵或FAX報名，報名時需要提供姓名、年齡、居住國家、參觀人數、預約時間（可依次序排列2個時間）。報名最後期限為參觀日起計2星期前。
野口勇庭園美術館嘅交通資訊
要去野口勇庭園美術館，有多種交通方法，其中從JR高松站搭「KOTODEN BUS（ことでんバス）」過去就最方便。車程約30分鐘，最近美術館嘅巴士站係「祈願岩・與一公園前（祈り岩・与一公園前）」，從此站步行7分鐘就到野口勇庭園美術館。
景點資訊Spot information
- 名稱：野口勇庭園美術館（イサム・ノグチ庭園美術館）
- 地址：〒761-0121 香川縣高松市牟礼町牟禮3519
- 交通：高松站→[KOTODEN BUS（ことでんバス）]約30分鐘→「祈願岩・與一公園前（祈り岩・与一公園前）」巴士站...歩行約7分鐘
- Wi-Fi：有
- 語言對應：英文
- 購票處：入口辦事處
- 可否使用信用卡：購買門票時不可以；商店內購物可使用：VISA, MasterCard, JCB, AMERICAN EXPRESS, Diners Club International, 銀聯
Comments