東京迪士尼度假區®自2019年7月23日（二）起，只要下載佢個手機APP，就可以用嚟拎勁排隊嘅熱門遊樂設施嘅快速通行券Fast Pass®（FP）！！配合東京迪士尼海洋®全新登場遊樂設施「翱翔：夢幻奇航」喺7月23日開幕，呢項服務亦一齊出現喺東京迪士尼樂園®同埋東京迪士尼海洋®！今後嚟玩時，無論用手機APP或者平時喺設施側邊嘅發券機，都可以拎Fast Pass喇。
手機App拎Fast Pass® 慳返排隊時間
東京迪士尼度假區®APP除左可以確認各項遊樂設施需嘅等待時間、查詢地圖同埋抽選園來嘅舞台表演(SHOW)。不過由而家開始，以往只可以透過喺機動遊戲旁邊嘅發券機拎嘅Fast Pass®，而家都可以用手機APP輕鬆拎到。喺園內無論邊個地方都可以用，咁就慳返好多時間同腳骨力。小編即刻搶先試用左，一齊嚟睇下點樣用APP發行Fast Pass吧。
用手機APP發行Fast Pass®步驟
步驟一：首先點選APP首頁畫面左下方嘅「Fast Pass(FP)」按鈕。
步驟二：咁就會跳去揀選樂園入場券嘅畫面，要掃描左入場券上面嘅QR碼。選擇好門票之後，按下面嘅「確定」掣。
※選擇畫面上嘅「Scan」，讀取門票上的QR碼就可以囉。
※如果成班人一齊去嘅時候，可以一次過入哂所有人嘅門票先。
步驟三：確定完之後，就會去到揀機動遊戲嘅頁面，喺呢個位你就可以揀想發行邊個機動遊戲嘅Fast Pass。
※揀機動遊戲之前，仲可以先確認呢刻發行Fast Pass嘅適用時間。
步驟四：確認Fast Pass內容係咪正確。
※如果機動遊戲有身高限制等注意事項，都會喺呢度確認埋。
※最後再次確認揀左嘅遊樂設施、時間、同埋張數等。
步驟五：最後按「取得」，就發券成功。
※發券之後，畫面亦會顯示下一次可以再拎Fast Pass嘅時間。
你仲可以隨時透過個APP確認Fast Pass嘅內容，仲可以揀取消。
到左Fast Pass使用嘅指定時間，就可以係APP入面揀「Fast Pass表示」，然之後就可以去機動遊戲嘅「FASTPASS」專用入口，掃描FAST PASS個QR CODE就可以入場玩啦。
☆☆活用手機APP小貼士☆☆
★目前，東京迪士尼度假區®APP只提供給日本居民下載，亦只有日文內容。
★入園之前請事先下載好東京迪士尼度假區®APP，同埋註冊迪士尼帳號吧。咁一入園就可以用得個APP。
★要喺園內用東京迪士尼度假區®APP嘅所有功能，必需要啟動手機嘅GPS功能同埋定位服務，並授權個手機APP使用您嘅位置情報資料。
★團體行動時需註冊代表人嘅資訊。一個帳號可以掃描、選擇多張門票。
★除左可以拎Fast Pass之外，個手機APP仲可以用嚟查機動遊戲嘅排隊時間，同埋可以用嚟抽舞台表演嘅入場券。記住要活用所有功能！
★為免玩到一半手機無電，記得要帶埋行動電源！
Comments