嚟到鹿兒島縣霧島旅行，喺當地嘅餐廳食咩好？以下為你介紹霧島推薦必食嘅四種美食。
霧島必試：地雞料理
鹿兒島縣出產三種品質優良嘅當地雞。喺霧島市，可以搵到「黑薩摩雞」嘅土雞專賣店——「雞肉大作（とり肉大作）」等，仲有好多飼養並販售優質土雞嘅店。喺霧島市區內有好多餐廳可以品嚐當地嘅土雞肉料理，仲有燒烤、炸雞同雞飯等。土雞肉含有豐富蛋白質、肉質結實又彈牙。
另外，以JR國分站為中心嘅南部地區，都有好多可以食到土雞料理嘅餐廳。其中，知名度較高嘅有「鹿兒島雞肉料理專門店 Miyama本舗 國分店」或鹿兒島機場附近嘅「食樂樂」餐廳。單點嘅價錢約為500至1,000円，套餐就大約1,000至2,000円。（2019年7月資訊）
霧島必試：霧島神話「Bokke鍋」（ぼっけ鍋）
霧島神話「Bokke鍋」（ぼっけ鍋）係用咗霧島品牌豬肉「霧島熟成神話豬」、霧島熟成黑豬、霧島熟成白豬同當地蔬菜煮成嘅火鍋。據說霧島神話「Bokke鍋」係由一位鍾意霧島嘅當地廚師花咗一年時間，反覆嘗試研究出來嘅。共有三種湯底：濃郁嘅「豬肉味噌湯底」、香濃順滑嘅「豆乳湯底」、濃厚嘅「醬油湯底」，每一種都好好味！「Bokke」（ぼっけ）係鹿兒島嘅方言，即係大膽豪快咁解。
霧島神話「Bokke鍋」可以喺霧島市區內嘅日式旅館、酒店、餐廳食得到，但好多都需要事先預約，旅館嘅話可能要住客先食得到。如果無入住酒店但想喺酒店餐廳試食「Bokke鍋」的話，推薦「霧島城堡酒店」（Hotel Kirishima Castle）、「霧島溫泉Society」（霧島温泉ソサイエティ）。呢兩間酒店嘅餐廳都提供咗三種湯底，可以揀自己鍾意嘅嚟試吓呀。
霧島「Bokke鍋」單嗌價錢約為2,000至5,000円，如果加上住宿，價位約為10,000円。（2019年7月資訊）
霧島必試：黑醋
霧島嘅福山町自古以來就有生產黑醋。不過唔係一般嘅工廠生產，而係將做醋嘅原料放喺陶甕內，以露天自然置放嘅方法釀製。呢種製法從大約200年前嘅江戶時代延續至今，係一種好珍貴嘅傳統製作方法。原料只採用蒸米、米麴同天然泉水，經過1到3年慢慢熟成、發酵完成。釀製嘅過程中，醋會變成琥珀色，味道醇厚圓滑。黑醋嘅用途廣泛，可以用喺各種料理上，好推薦買返去做手信試吓做日式料理呢。
想買黑醋，推薦福山町嘅「黑醋之鄉 桷志田」、坂元嘅「くろず（黑醋）壺畑 情報館」，可以睇到好多陶甕整齊地排列嘅壯觀景象，仲可以試吓黑醋，同品嚐黑醋料理。價錢方面，午餐約1,500至3,000円之間、甜品同飲料大約係400至1,000円。另外，現場都有賣好多黑醋商品，適合買嚟做手信。黑醋嘅價錢依容量而有所不同，一細樽150毫升嘅黑醋大約500至1,000円。（2019年7月資訊）
霧島必試：薩摩芋（蕃薯）甜點
鹿兒島縣從江戶時代起就以種植「薩摩芋」（蕃薯）聞名，經過推廣之下，現已成為遍及日本全國各地嘅農作物。就算係咁，鹿兒島縣嘅蕃薯產量仍然位居全國第一。火山噴發物所形成嘅Shirasu台地（シラス台地），非常適合栽培蕃薯，因此產量豐富。霧島有好多以蕃薯製作嘅「薩摩芋塔」、羊羹等甜點。
賣薩摩芋甜點嘅日式甜點或西洋甜點店，主要集中喺霧島嘅南部。日式甜點店推薦「九面屋」，而西洋甜點店推薦「AEON隼人國分購物中心」內嘅「Festivalo」。薩摩芋甜點商品，5個裝嘅價錢大約1,000円以下 ，10個裝價位大約1,000至3,000円。（2019年7月資訊）
Comments