日本長崎縣內有多個知名賞櫻景點，例如係壯觀嘅櫻花林蔭大道，亦有樹齡百年以上嘅櫻花樹，仲有各觀光勝地櫻花盛放嘅美景，相當值得排入行程！
長崎縣櫻花最佳觀賞期
長崎縣內有多個賞櫻勝地，例如有長崎市區內嘅公園因為交通便利，因此每年櫻花季期間都吸引唔少人前往朝聖賞櫻。另外，長崎縣內仲有島原城等觀光景點，遊覽名勝古蹟嘅同時仲可以欣賞櫻花！長崎賞櫻嘅最佳時期為每年3月底至4月頭左右。
長崎縣櫻花祭典
長崎櫻花季期間有好多地方都會舉辦櫻花祭活動。例如大村公園及島原城夜晚會點燈，遊客可以欣賞到美麗又夢幻嘅夜櫻。另外，同場仲會有多項表演、活動以及戶外臨時攤檔，絡繹不絕嘅人潮令現場氣氛變得非常熱鬧。
到長崎和平公園靜心賞櫻
長崎和平公園嘅周邊種咗多棵櫻花樹，您可以喺公園一邊散步，一邊賞櫻。和平公園係為原爆犧牲者祈福嘅地方，所以公園內禁止飲酒作樂，但就可以嚟呢度靜心欣賞美麗嘅櫻花景色，再祈求祝福世界和平。
長崎賞櫻推介景點
長崎賞櫻必去！市立山公園
長崎市嘅立山公園內栽種咗大約700棵櫻花樹，每年都吸引大批遊客前往賞櫻。立山公園位於長崎市區，交通非常方便。推薦大家可以登上展望台，賞櫻嘅同時仲可以睇埋長崎市區景色。公園24小時開放，櫻花季期間嘅夜間點燈時間從晚上6點半到9點。
景點資訊
- 名稱：立山公園
- 地址：長崎縣長崎市立山
- 交通方式：從JR長崎站乘搭往立山、浜平方向巴士，於立山公園口落車步行約1分鐘。
- Wi-Fi支援：沒有
- 語言對應：僅限日文
- 入園費：免費
長崎賞櫻必去！大村市大村公園
大村市嘅大村公園係長崎縣內唯一一個入選日本「櫻花名所百選」嘅賞櫻景點。櫻花季期間約有超過2,000株櫻花盛開，整個公園被染成一片粉紅色。其中最出名嘅就係被選為國家指定天然紀念物嘅大村櫻。一般櫻花嘅花瓣約有5至10瓣左右，而大村櫻嘅花瓣從60塊到200塊都有，又大又靚！正正因為櫻花花種咁特別，因此令大村公園變成非常獨特嘅賞櫻景點喔！
景點資訊
- 名稱：大村公園
- 地址：長崎縣大村市玖島1-45
- 交通方式：從JR大村站乘搭巴士於市役所前落車
- Wi-Fi支援：沒有
- 語言對應：僅限日文
- 入園費：免費
長崎嘅氣候
長崎4月嘅氣候整體而言溫暖宜人，唔會有太極端嘅天氣變化。
長崎嘅氣溫
長崎4月嘅氣溫平均喺10度左右，4月底氣溫會逐漸升高。
長崎賞櫻建議服裝
4月去長崎旅遊嘅話，建議穿著啲容易除嘅衣服。雖然春天比較溫暖，但係日夜溫差大，日頭可以唔使著咁多，但入夜後仍需注意保暖。
長崎縣交通方式
香港現時有直達航班到長崎機場，到達當地機場後乘搭機場巴士去到長崎車站，都只係45分鐘至1個鐘。入住附近酒店，再去其他長崎景點玩都好方便呀！
Comments