大家好我係Maggie！好榮幸喺2月中從FUN!JAPAN「免費日本旅行贈獎活動」得獎獲邀同其他五個國家嘅朋友一齊喺日本東北走訪各個冬日秘景，準備好同我地一齊展開五日四夜之旅未？
DAY1 東京—青森
我地一行人由東京羽田機場搭JAL (日本航空) 前往青森，一到埗就彷如置身喺名符其實嘅冰雪世界入面咁—遠處有披上雪衣嘅岩木山，沿途嘅杉樹都好似加左白雪topping咁，見到呢個畫面個腦就自動響起“Do you wanna build a snowman～”。
第一站—弘前城
喺雪白嘅背景襯托下冬日嘅弘前城顯得分外莊嚴寧靜。
值得一提嘅係城內櫻花美景有「日本第一櫻花祭」嘅美譽，櫻花配合天守閣、紅橋和護城河，相信春天嚟賞櫻，又會別有一番味道。
前往天守閣途中會經過呢座紅橋，我哋身後其實係護城河，不過河水都結咗冰！
活動完一輪，我地去咗酒店附近嘅一間居酒屋食晚餐，品嚐海鮮火鍋同青森特色小食炸魷魚球。
DAY 2 津輕鐵路、奧入瀨溪流、十和田湖冬物語
今日一早出發去五所川原，尋找是日重點體驗—津輕鐵路！
津鐵係一架行駛於白雪之中，外型懷舊嘅暖氣火車。每節車卡都有燃燒石炭嘅暖爐，俾乘客一路靠近取暖，一路欣賞著車窗外嘅銀白色世界，感受同外面冰天雪地形成強烈對比嘅溫暖氣氛。
一上車嘅時候已經聞到一種好熟悉嘅香味，順住香味源頭走近，即刻有發現——係烤魷魚啊！原來火車上嘅暖爐仲可以用黎烤魷魚！！
津鐵職員會不時推住小食車穿梭唔同車卡，小車上嘅貨物應有盡有，除咗零食、茶、清酒，仲有津鐵嘅代表手信—石炭曲奇（造型模仿津鐵暖爐所用嘅石炭），同埋一定要一試嘅魷魚乾！當你向職員購買魷魚乾，佢就會即刻去你座位旁嘅暖爐，用熟練嘅手法烤熱魷魚。
火車上嘅職員都好熱情好搞笑，同乘客有講有笑，仲會鬼馬咁擺pose俾我地影相，令到氣氛更溫馨。置身喺充滿溫度、人情味火車入面，真係由外到內都覺得好warm～
奧入瀨溪流嘅瀑布未完全結冰，瀑布四周均蓋上厚厚積雪。（喺雪面上行路要注意安全，建議著坑紋較深嘅鞋。）
講到體驗東北嘅冬日，就一定會諗到雪祭，而今晚我哋就嚟到呢個2月1日至24日限定舉辦嘅「十和田湖冬物語」雪祭。我哋去嗰日人流唔算好多，可以悠閒咁喺雪地漫步。場內除咗有燈飾、雪造迷宮，仲有一間雪屋bar!
而最引起我哋興趣嘅就係——雪上香蕉船！我哋離遠已經聽到啲尖叫聲，就更加想試下有幾刺激！（費用：500円，大約3圈）
最後我同兩位團友一齊做勇者挑戰，結果我哋由開車開始就嗌到無停過～我哋一致覺得雪上香蕉船比喺水上仲快、仲刺激！大家有機會嚟嘅話都要試下呢個特別體驗，一定唔會後悔！
園內仲有一個美食區俾遊客醫肚，左右兩排大約有十間賣各類小食嘅屋台。見到咁多小食，當然要發揮香港人「掃街精神」～
聽日我哋即將告別青森，向仙台同山形進發喇～
Comments