忍者，係一個廣受外國人歡迎嘅日本文化。今次，我哋就為大家介紹喺大阪，滋賀可以去體驗做一個武功高強嘅忍者嘅地方啦。
「World Masters Games2021年關西」係？
「2021年關西World Masters Games」係一個只要年滿三十歲以上嘅運動愛好者就可以參加嘅國際綜合體育大型比賽。
值得紀念嘅第10屆，決定喺日本關西舉辦，而且仲係亞洲首次舉辦。去參加呢場大賽，欣賞日本各地嘅魅力所在，聽落去都唔錯吖？
喺大阪、滋賀會場舉辦嘅比賽項目
喺大阪、滋賀會場舉辦嘅比賽項目，睇呢度！
大阪
- 岸和田市：單車（BMX）
- 東大阪市：橄欖球
- 泉南市：游泳（公開水域）
- 堺市：足球（足球/五人足球）
滋賀
- 大津市：獨木舟 (龍舟)、賽艇
- 彥根市：田徑(10km越野賽)
- 長濱市：曲棍球
- 草津市：壘球
- 守山市：棒球(軟式棒球) 、壘球
- 米原市：曲棍球
- 東近江市：棒球(軟式棒球) 、壘球
比賽項目多采多姿，當中有感興趣嘅項目嗎？除咗可以實際參加比賽以外，單純觀看比賽都OK㗎！
關於比賽詳情請click入官網睇睇啦 ☞ https://wmg2021.jp/en/
前往大阪，滋賀嘅交通方式
大家知唔知，要去大阪同滋賀，其實比想像中嚟得方便？
JR京都線快速列車
喺大阪站搭JR京都線快速列車(野洲方向行)，大約一個鐘就可以抵達滋賀。唔使轉車，唔使擔心喺車站入面蕩失路！
JR新幹線「Kodama」號
喺大阪站搭JR新幹線「Kodama」號，以30分鐘極速抵達滋賀。新幹線車費比較貴，但唔需要轉車，慳返好多時間去玩，非常推薦。
喺大阪「忍者堂」租借忍者服裝以及觀賞忍者表演
Cosplay成憧憬嘅忍者，穿梭大阪街道！
忍者堂提供忍者服裝租借服務，仲可以體驗忍者修行。特別推薦大家試吓「忍者變身」Plan，打扮成忍者，喺大阪自由自在咁散步。趁「World Masters Games2021年關西」比賽空檔嚟呢度體驗一下成為忍者又點睇？
豐富節目：體驗殺陣及欣賞忍者Show
所謂「殺陣」，即係指以表演形式呈現出格鬥場景中使用嘅武打技術。身為日本文化迷嘅你，喺日本古裝劇同電影都可能有睇過。而提供殺陣體驗就係忍者堂嘅一大特色。表演仲要喺日式風格嘅舞台上進行，可以觀賞到正宗、具魄力嘅忍者武打Show。咁近距離就可以感受到忍者嘅威武，你又點可以錯過呀？
於滋賀「甲賀之里忍術村」挑戰正宗忍者修行
出發去叢山深處找尋日本聞名忍者派別「甲賀忍者」嘅據點
要數到象徵日本嘅忍者，當中最常聽嘅大名不乏「甲賀忍者」。甲賀忍者係喺滋賀嘅深山之中學習忍術，而呢度名為甲賀之里，具有悠久歷史，仲設置咗訓練場。嚟到呢度，活用努力鍛鍊返嚟嘅強健體魄，學識埋忍術，你就無敵啦！
以體力定勝負嘅忍者體驗！挑戰一下自己為運動比賽而鍛鍊好嘅體魄
可以喺忍者道場同劍道場體驗正宗忍者訓練，係忍術村嘅特色。忍者道場提供「心」・「技」・「體」等可一試嘅9項修行，只要全部pass就可以獲得卷軸作為紀念品！俾多啲信心自己為比賽而鍛鍊好嘅體魄，挑戰自我極限，係咪唔錯先？
今次文章中所介紹嘅觀光景點同比賽資料
忍者體能咁好，都係多得平時嘅訓練。喺大阪同滋賀可以體驗唔同特色嘅忍者體驗，對於運動愛好者嚟講，嚟呢度體驗忍者訓練絕對係不能錯過㗎！參加過忍者修行或者體驗過打扮成忍者嘅，仲唔快啲留言話俾大家知你哋嘅威水史？！
更多詳細資訊同交通方法，請click呢度。
- 忍者堂 http://ninjado.jp/
- 甲賀之里忍術村 http://koka.ninpou.jp/
Comments