去日本出trip又好，旅行都好，都會買返啲手信俾朋友，同事們。而如果目的地係去姫路嘅話，有咁多款手信，花多眼亂，都唔知買邊款好？唔使愁！今次就同你推介返啲姫路嘅手信，揀樣好嘅買嚟送俾屋企人，朋友，你最鍚嘅人！以下推薦嘅都可以輕易喺車站附近買得到，唔使周圍撲！
去姫路不能錯過嘅手信！
1. 芝麻西式甜點・KAMON BAR
兵庫縣播磨高等學校嘅學生同西式甜點店嘅「杵屋」共同開發咗新商品，名叫「ＫＡＭＯＮ ＢＡＲ（カモンバー）」。甜點利用混水糖漿將芝麻凝固，甜甜嘅芝麻飄香令人聞到已經想食。呢款甜點共有5種口味，分別係黑芝麻，生薑醬油，蜂蜜，味噌同抹茶。喺大方得體嘅包裝下，每款口味嘅獨立包裝上都分別地印有池田家、本多家、松平家、榊原家、酒井家5款貼紙，內外包裝都夠唒精美。
價錢：2塊為1小袋，總共10塊，共700円（未稅）
2．心形草莓仙貝與蝦味仙貝組合・Ippuku 仙貝半月庵 (いっぷくせんべい半月庵)
心形AMAO(あまおう)草莓仙貝同蝦味仙貝合二為一包裝出售。當中最可愛嘅就係心形嘅AMAO草莓仙貝！拎起手聞得出草莓味，食落口散發嘅甜味都令人品嚐得到AMAO草莓味。另外嘅蝦味仙貝都有濃濃嘅蝦味，爽脆口感令人一食想再食！而且鹹味調教得剛好適中，好味到其他仙貝都無得比呀！
價錢 : 1盒2袋，共550円（未稅）
3. 「千年杉」年輪蛋糕
名為「千年杉」係由杏仁同牛油捲成嘅年輪蛋糕。蛋糕外層鋪上滿滿嘅焦糖同烤杏仁，內裏係含有柚子餡嘅蛋糕同小倉忌廉製成，睇落好似姬路嘅寺院「圓教寺」入面嘅「千年杉」一樣。食落鬆軟口感加上淡淡嘅甜度，細至小朋友大至老友記都應該會鍾意食！買返香港後切開同大家一齊開心Share啦！
價錢 : 1卷1,296円 (含税)
4. 啫喱和菓子・白鷺天舞
白鷺天舞係一種好似啫喱狀嘅和菓子。一盒內有紅豆味嘅「紫珠光」，同埋梅味嘅「常世香」2款口味。甜甜地散發著紅豆香同梅香。紫珠光外層係有咬口嘅紅豆味啫喱，食到入面仲有紅豆餡添。而梅味嘅就好似將成粒梅變成啫喱，清爽口感令人一試難忘。最重要係獨立包裝細細粒又充滿日本風情，超級可愛！用嚟做手信收到嘅人睇到都好開心！而且呢種和菓子同抹茶都好夾添㗎。
價錢 : 1盒8粒包裝：1,080円、1盒12粒包裝：1,620円、1盒16粒包裝：2,100円 (含税)
5. 姫路城形狀含餡日式饅頭・姫路城燒餅 (お城やき)
姫路城燒餅係以姫路城為造型，當中加入適量餡料嘅燒餅。咬落鬆軟嘅口感加上日本國產蜂蜜，甜甜地好好味！呢個係姫路好出名嘅和菓子，可以單售，如果有興趣嘅話就去買一個嚟試吓啦。
價錢 : １個86円、6個540円、１0個864円 (含税)
玩到無時間買手信？！唔怕！車站附近就買得到！
- 店鋪名稱：piole HIMEJI Omiyage-kan (ピオレ姫路おみやげ館)
- 營業時間 : 8：30～20：00
- 地址 : 〒670-0912 兵庫縣姫路市豆腐町222
- 交通方法：JR姫路站直通、山陽姫路站向南步行1分鐘
Comments