兵庫縣神戶市有好多旅遊景點，商店林立嘅繁華市中心、帶有異國風情嘅城市景觀，海灣地區有美麗嘅海景同夜景。除咗迷人嘅旅遊景點外，仲有好多地方可以品嚐美食。今次小編要為大家推薦以下餐廳，一於嚟享受豐盛嘅神戶美食啦！
神戶美食餐廳嘅魅力
神戶美食嘅魅力之一係，無論日頭定係夜晚，都有唔同嘅方式可以享受。例如，神戶臨海樂園(Kobe Harborland)同美利堅公園嘅餐廳，可以喺船上用餐。能夠以合理嘅價格，一邊欣賞海景一邊享用美味佳餚，日落後都可以欣賞美麗夜景。
從美利堅公園出發：日本最大嘅餐廳船「璀璨神戶2號」
嚟到日本規模最大嘅餐廳式郵輪「璀璨神戶2號」，可以一邊欣賞明石海峽大橋嘅夜景，一邊用餐。可以品嚐地中海風法國料理，亦有現燒現切嘅自助式牛排套餐。
店鋪資訊
- 名稱: 璀璨神戶2號 (Luminous KOBE 2)
- 地址: 兵庫縣神戶市中央區波止場町5-6
- 售票處及乘船地點: 請於「中突堤旅客航站樓」（神戶美利堅公園東方酒店2F）售票窗口購買船票之後登船
- 交通方式: 從地鐵海岸線港元町站2號出口出發，步行約8分鐘
從神戶臨海樂園出發：豪華郵輪「協奏曲號」(CONCERTO)
豪華郵輪「協奏曲號」提供兼具視覺同味覺享受嘅法式料理同鐵板燒。喺欣賞現場音樂表演嘅同時享用美食。嚟到呢座港口城市，仲唔上郵輪享用獨特嘅豪華美食？
店鋪資訊
- 名稱: 協奏曲號(CONCERTO)
- 地址: 兵庫縣神戶市中央區東川崎町1-6-1
- 交通方式: JR神戶站步行10分鐘
神戶東方酒店House of Pacific主餐廳
鄰近以前嘅外國人居留地－北野地區，東方酒店係一間歷史悠久嘅酒店，喺神戶開港後開始營業。喺酒店頂層嘅餐廳可以品嚐到精緻嘅意大利料理，並享受餐廳高品質嘅服務。廚師喺開放式廚房內，採用精心揀選嘅食材為你準備美食。平日中午，可以用合理嘅價格享用午間套餐。晚餐時段，可以喺氛圍良好嘅餐廳享用精緻嘅完整套餐。
店鋪資訊
- 名稱: 神戶東方酒店House of Pacific主餐廳(MAIN DINING by THE HOUSE OF PACIFIC ORIENTAL HOTEL)
- 地址: 兵庫縣神戶市中央區京町25，東方酒店17樓
- 交通方式: 從JR元町站步行約10分鐘
神戶嘅其他必食美食...
神戶有各種美食，好似係神戶牛肉、中華街嘅中餐或當地美食－明石燒。可以喺酒店餐廳、市中心或中華街品嚐厚實優質嘅神戶牛肉。喺中華街（南京町），可以食到餃子、豬肉包或小籠包。「明石燒」係一種類似大阪章魚燒嘅食物。章魚燒會淋上醬汁一齊食，但明石燒唔使用醬料，而係浸喺湯汁入面食用。仲有好多其他吸引人嘅神戶美食，唔好錯過啦！
Comments