喺100円店「Daiso」用100日圓就買到好多生活雜貨, 例如化妝品, 零食, 食品類等等乜都有, 無論日本人定係去日本旅行嘅外國遊客之中都好有人氣。東京大阪為首, 日本全國約有3150間分店, 就連日本國外都有26個國家或地方有分店(截至2017年10月)。
今次就介紹一下好可愛又便利, 可以貼喺notebook寫少少memo, 易貼又易撕嘅memo紙啦。買嚟做手信送俾屋企人朋友都好喎。
使用透明質料, 連memo紙底下嘅字都睇到嘅「半透明memo紙」(雀仔, 海獺圖案)
「半透明memo紙」就係利用半透明質料, 令貼完正常memo紙後, 本來睇唔到嘅部份都可以睇得到。雀仔同海獺兩款圖案嘅memo為一組包裝(各40張)。插圖咁可愛, 貼喺notebook又得, schedule book都可以增加可愛度! 亦好推薦喺考試測驗前溫書時, 寫低重點貼喺筆記或者書度作為提醒自己嘅memo呀。另外, 用鉛筆或者油性筆, 原子筆等等咩筆都喺memo紙寫到嘢㗎。
5種細長memo紙條加1種長方形大memo紙作為1 set嘅「動物memo紙」(柴犬, 恐龍, 白熊, 熊貓)
呢個係5種細長memo紙條, 同埋有好多空間寫嘢嘅長方形memo紙, 加埋總共6種作為1set好抵買嘅memo紙。附送包裝套袋住memo紙, 就算就放入筆袋, 手袋, 定schedule book都唔怕痴甩咗啦。雖然有恐龍, 白熊, 熊貓主題圖案, 但當中最推薦都係豎高耳仔, 搖搖尾巴就已經好得人鍾意嘅小型日本犬「柴犬」啦, 唔只日本呀, 海外都好有人氣㗎。每1隻狗狗都唔同顏色, 加埋狗帶嘅memo紙實在太可愛啦。連紙後面都有圖案, 好有心思呢。
和紙上印有壽司水彩畫嘅「水彩畫和紙memo」
呢個係喺和紙上, 用水彩畫嘅筆畫出壽司, 富有日本風情嘅memo紙。一組有兩款各15張嘅memo紙, 一款係喺成張memo紙上印有魚子, 蝦, 吞拿魚, 玉子等壽司; 另一款係白色為主嘅memo右上角印有巻物, 左下印有蝦壽司。買嚟送俾鍾意食壽司嘅朋友都幾好吖。
Comments