一直都想做出一部「可以任意奔馳喺雪路等嚴峻道路環境之下嘅車」嘅Suzuki終於製作出一部越野四輪驅動4x4喇。外觀睇起嚟同現時流行嘅越野SUV有啲雷同，但規格、性能同耐久性等等都完全唔同。日本目前都有幾款四輪驅動4x4嘅車型，當中特別受歡迎嘅係Suzuki嘅輕型4輪驅動「Jimny」。
聽到輕型汽車，請唔好先入為主覺得佢性能會好差。日本地形複雜，形成各式各樣嘅道路，就好似險峻嘅山路，又或者係冬天落雪時一日內就積咗1米高嘅豪雪地區等等，可謂係極嚴峻嘅駕駛環境。想喺呢啲咁難行嘅路揸車, 四驅傳動4x4當中「Jimny」係最受歡迎嘅。
專為越野而特別強化嘅設計大受好評
日本嘅汽車廠商而家最煩嘅就係現時嘅後生仔唔太積極買車。之但係「Jimny」發表咗之後，即刻得到佢哋熱烈支持。點解咁受歡迎?! 有理由相信係因為呢部車可以完美呈現四驅傳動車款嘅造型。
新款「Jimny」嘅車身幾乎都係平面，四四方方嘅感覺。而輕型版車身嘅側面係完全垂直嘅狀態。普通汽車版「Jimny Sierra」配備較寬嘅輪胎，側面裝咗加大擋泥板，而車身其他部分同輕型汽車版完全相同。
車身下方有好大空間，蹲低少少就可以喺車底望到對面。車底同地面之間最短距離都只係205mm。有咁寬敞嘅空間，都應該夠喇啩! 但係「Jimny」為咗喺唔平嘅路或者雪路可以徹底活用嗰個高度同空間，完全無加裝任何隱藏裝備喺車底。就係因為咁，車底睇落會比較高。
對於一啲已經厭倦越野SUV, 注重時尚性嘅使用者，又或者係啲唔太鐘意車身設計好似普通汽車曲線嘅使用者嚟講，呢款車嘅設計同性能都係針對可以行喺越野險峻道路嘅設計就好適合佢哋喇。喺日本市場，輕型汽車嘅「Jimny」嘅年度銷售目標係1萬5千部，而普通汽車款嘅「Jimny Sierra」係1千2百部。不過就算而家落訂，都可能要到下年先收到車。
JIMNY is JIMNY. 初代問世至今約半個世紀，但初衷不變
照片：初代至第三代嘅車型
喺新款Jimny嘅發表會中，現任社長鈴木俊宏分享咗一段往事。「『希望汽車公司(Hope Co., Ltd)』嘅小野先生對我講過造出咗一部能夠爬到富士山嘅8合目, 排氣量360cc嘅車。睇完條影片，咁細部車居然真係能夠爬上咁斜嘅斜坡?! 就係因為咁而鍾情於佢咁強大嘅性能，而喺小野先生得到嘅啟發就用咗落Suzuki嘅開發技術度，繼而誕生問世嘅就係Jimny喇。」
JIMNY is a powerful but small car
為咗實現「製造出登上代表日本嘅名山富士山」呢個初衷，Jimny雖然係輕型車，但同JEEP Wrangler 、Mercedes-Benz賓士G-Class等大型越野車款一樣採用咗非承載式梯形大樑底盤結構，堅硬穩固嘅車台上只係承受所乘載嘅人同物品嘅重量。發售之後，對於林業相關業界人士嚟講, Jimny喺落暴風雪等地區當中未鋪好路嘅地方作為交通工具真係獨一無二嘅絕佳汽車。
從初代計起，發展到而家第四代最新款嘅Jimny，完整繼承咗正宗傳統嘅越野四輪驅動4x4技術，例如有非承載式梯形大樑底盤結構、分時四輪驅動系統、同堅硬頑強嘅3連桿剛性軸懸吊系統等特色。
然而，Jimny仍然保持自我專屬嘅特色, 就係個尺寸大小。由於係輕型汽車，車身總寬只有1480mm。就算安裝咗單片60㎜寬嘅巨大擋泥板嘅Jimny Sierra，總寬度都只係1600mm。而喺重量方面，無論係邊個車型都只係一千幾公斤。咁小巧輕盈嘅尺寸，係其他強悍嘅四輪傳動越野車模仿唔到嘅，所以成為Jimny獨一無二嘅特色。Jimny出色到有人話「無Jimny行唔到嘅路」添。
喺日本掀起熱潮嘅新型車款「Jimny」近期將會喺東盟(ASEAN)、南亞洲、甚至係全球開始發售。或者大家好快就可以喺香港見到佢嘅英姿啦。
Comments