TOYOTA汽車之中最具歷史性嘅型號--TOYOTA豪華轎車系列「CROWN」已於6月26號全新登場。第一代CROWN喺1955年登場, 今次新登場嘅第15代型號。雖然TOYOTA已經有豪華汽車品牌「LEXUS」, 但呢個品牌係主要針對日本海外客戶, 而CROWN則多銷售喺日本國內。TOYOTA首次導入咗等汽車隨時能連結網路嘅Connected車聯網技術放落CROWN入面。對TOYOTA嚟講,CROWN係遠比LEXUS重要。
有咩事發生都會自動報警或通知醫院。車壞咗都可以遠距離偵測得到。
新一代CROWN最大睇頭就係Connected車聯網方面嘅技術。現時每一部賣緊嘅車都已經裝有新開發嘅DCM(Data Communication Module)呢個通訊系統。仲會經常收集引擎、刹車、避震、氣墊、車頭燈等等汽車重要零件嘅情報, 再透過網路上載到Data Center嘅Server(資料庫嘅伺服器)。發生起事上嚟其實佢都幾實用㗎。
例如, 萬一唔好彩發生交通意外, 系統偵測到彈出氣墊後, 就會自動傳送部車嘅損壞狀態去Data Center。然後工作人員就會打電話俾嗰部車嘅司機。如果聯絡唔到佢嘅話, 即係表示好大機會佢已經身受重傷, 所以會即刻通知消防署同提供有關意外嘅相關資料同所在位置, 希望盡快可以救到個司機。亦會因應情況而派出醫療專用嘅直升機作出救援行動。
再者, 將部車送去維修廠修理時都可以事先做簡單嘅安排。呢個情況下, 因為部車各個部份都有感應偵測器, 所以都已經大約知道邊個位有問題, 而工廠事先知道咗問題後都可以提前準備到相關嘅零件, 咁樣就可以縮短到個維修時間。
仲有其他例如好似對住部智能手機講「OK Google!」咁, 好簡單咁對住部車講嘢就可以check到附近餐廳資料同新聞資訊等等。或者如果唔識用車內比較難用嗰啲電子設備, 都可以透過電話由工作人員或者係車內配置嘅AI人工智能話俾司機知點用。喺呢個電子化嘅時代就係要好好利用佢帶嚟嘅方便嘛!
追求達到世界級別嘅性能同舒適感
新款CROWN嘅特色唔單只係Connected車聯網技術, 汽車本身嘅機能, 駕駛性能同舒適度都有大大提升。
最受矚目嘅係左右到駕駛性能同舒適度嘅車體同避震系統都有全面重新設計過。為咗喺呢個咁大競爭嘅高級車廠商之中能夠脫穎而出, 呢部新款車嘅重心比以往舊型號嘅大幅降低。TOYOTA工程師主張咁樣就可以提高舒適感, 同時又可以大大提升駕駛性能。
動力傳動系統都比舊型號強咗。最強大嘅係豪華汽車品牌LEXUS嘅頂級車型「LS」同款嘅3.5公升V6油電混合動力, 內燃引擎同電力摩打嘅綜合輸出都係同LS一樣達到359匹馬力。仲要車嘅重量又比LS輕300kg以上添, 諗都諗到動力性能有幾高啦係咪?
而其他動力引擎方面都好出色, 就好似最高輸出率有245馬力, 2升直列4缸渦輪增壓引擎, 或者係油電混合輸出226匹馬力嘅2.5升直列4缸油電混合引擎, 無論係邊種都好強而有力呀。
呢款新型號CROWN嘅推出, 大家覺得OK嘛? 有無朋友仔想試吓坐呢款新車呢?
Comments