柯南嘅作者青山剛昌先生，同埋喺1959年開始連載嘅鬼太郎妖怪系列漫畫，作者水木茂先生，仲有日本國寶級嘅攝影大師，曾經俾法國政府頒贈藝術與文學騎士勳章嘅植田正治先生，佢哋三個人嘅出身地都係日本嘅鳥取縣！到底呢度係一個咩環境，可以孕育出擁有無限想像同藝術美感嘅創作人才呢？氛圍只能意會，無法言傳，我哋就先透過文字，俾大家先一窺鳥取縣嘅魅力所在!
鳥取砂丘：令人著迷嘅砂
一整片嘅無垠砂丘，早晨被風吹出嚟嘅風紋，與大海相連處嘅陣陣浪花，夕陽西落嗰陣嘅餘暉將成片砂丘染上一抺嫣紅，喺冬季嗰陣即使俾白雪覆蓋亦唔會減低佢嘅風采，呢個就係鳥取嘅砂丘。明明喺日本，卻帶俾人無限嘅錯覺，呢度都係攝影大師「植田正治」先生成日去取景嘅地方，可能呢片砂丘曾帶俾植田先生無限靈感，所以留低咗好多令人驚艷嘅作品。嚟到鳥取，去砂丘可以話係觀光客主要嘅目的地，就連最適合呢個景色嘅駱駝都幫你準備好曬，騎一圈散吓步影相又得，依您所好，揀騎「Fat bike」又得，喺教練嘅帶領之下一睹砂丘全貌，如果您有玩開Pokemon，呢度有好多小精靈等你嚟收伏吖！
記得唔好錯過附近嘅「砂之美術館」，用砂雕製成嘅作品，令人大嘆不可思議，鳥取嘅第一站嚟呢度肯定無錯！
日本最危險嘅國寶：三德山投入堂
三德山得此聖名，除咗前往參拜嘅路唔係一般嘅觀光步道之外，仲係一條修行嘅路線，係修驗道嘅聖地，修驗道嘅開山祖師役小角役行者將三片蓮花拋向空中，其中一片落咗喺三德山，跟住就喺呢度開拓咗修驗道嘅修行道場。
因為呢度係修行嘅地方，有D路線係需要攀爬嘅陡峭地段，入山前會進行嚴格嘅服裝及鞋子檢查，需要特別留意，以免被拒絕入山啊！透過參拜嘅過程，淨化自己嘅心靈，因為咁被認為係可以達到「六根清淨」嘅境界。
其中，三佛寺奧院﹝投入堂﹞，係代表六根清淨中嘅核心建築物，坐標喺斷崖絕壁上面，到底係點樣建成嘅，直到而家仍然係一個謎！
小白兔為您牽起良緣嘅白兔神社
如果無聽過白兔神社都唔緊要，您應該聽過好出名嘅出雲大社喇掛，咁白兔神社同出雲大社又有D咩關聯呢？據聞出雲大社所祭拜嘅「大國主命」曾經救過白兔神社嘅「因幡白兎」，因此白兔為咗報恩而牽上「大國主命」同「八上姫」嘅姻緣，所以呢度成為咗全日本唯一一間祭祀兔仔嘅神社，亦都係好出名祈求姻緣嘅神社嚟㗎！抵達神社後自然感受到濃濃嘅可愛氣息，白兔嘅雕像、粉紅色嘅郵筒，各種有兔仔圖案嘅御守更加係令人忍唔住想買返幾個啊。浪漫嘅氛圍加上唯美神話嘅薰陶之下，可能係因為咁而孕育出想像力豐富嘅藝術家？
便利嘅交通資源
鳥取縣嘅交通方式對觀光客嚟講，真係好方便，主要有3種方式。第一種「100円循環巴士」（100円バスくる梨），主要係行駛市內嘅路線，唔分路途長短，每次搭都只係100円。第二種「麒麟獅子巴士」，每次搭嘅費用係300円，但係鳥取嘅主要觀光地點都會有巴士站，亦都可以購買全日券，只需600円就可以任搭。第三種係針對外國觀光客專用嘅「的士包車服務」，三個鐘嘅時間，一個人嘅收費係2000円，一架車最多可以坐4個人，出發前與工作人員傾好要去邊D地點，唔單止有專業嘅解說，仲可以慳返唔少咗等車時間！
鳥取縣嘅魅力連2021 World Masters Games關西擋都擋唔住！
2021年喺關西舉辦嘅World Masters Games，都特別將「射箭（射箭靶）」、「柔道」、「單車徑賽」、「單車越野賽」同「地面高爾夫球賽」嘅競賽場地安排喺鳥取縣。其中「地面高爾夫球賽」係一個非常適合長者嘅運動，比起一般嘅高爾夫比賽，地面高爾夫球賽嘅場地限制比較細，一般嘅公園嘅草地都得，費用都比較平，長者唔會咁容易因為做運動而整親，同時仲可以同球友互相交流，增加退休後生活樂趣。公路賽喺鳥取縣舉辧，選手除咗可以享受參賽嘅樂趣之餘，仲可以將鳥取縣嘅美景盡收喺眼簾，話係比賽，不如話係將鳥取縣嘅魅力一網打盡啦！
無論您係動漫迷亦或係攝影愛好者，鳥取縣都絕對唔會令您失望！而各項競技嘅運動選手，都加快腳步練習，喺鳥取大展身手啦！
想了解更多有關World Masters Games關西嘅詳情，請click☞☞https://www.wmg2021.jp/en/
Comments