汽車、農耕機械、鏟草機—HONDA本田提倡嘅生活型態「快樂嘅田園生活」

HONDA本田係遠近馳名嘅汽車製造廠商。但係，實際上呢間公司生產嘅唔係剩係得呢D㗎。仲生產咗其他嘅產品，耕耘機、鏟雪機（鏟除道路上嘅積雪）、發電機、船舶引擎、飛機等等，各式各樣為之驚人嘅產品。

佢個產品線好多元，HONDA本田活用咗多樣性，唔單止剩係販賣產品，仲積極提出咗各種生活型態嘅方案㖭啊。喺5月舉辦嘅「2018年國際玫瑰同園藝展」，就用咗喺遠離都市嘅田園美滿生活印象為構思，展示咗庭院嘅實景模型。

HONDA本田產品所呈現嘅快樂田園生活

以細花園為主題嘅「HONDA本田產品嘅植物生活」。工作退休咗之後嘅兩夫婦，擁有自己嘅自由時間，揀選從都市遷移到舒適環境嘅郊外生活，最近喺日本咁嘅案例都不斷咁增加緊。

「兩夫婦倆喺鄉村，開咗一間喺年輕嗰陣就嚮往嘅南法風格小型咖啡店，以呢種生活型態為構想。」

HONDA本田產品嘅活動負責人描述咗製作呢個庭院嘅用意。

木頭建造嘅模型屋，為咗同自然風景相容，油上咗淡淡嘅綠色。喺庭院出入口嘅遮陽屋簷都採用咗天然材料重現南法風格建造而成嘅，係由天然木材同素燒嘅屋頂瓦片所製成嘅。

呢個庭院擺放咗好多HONDA本田產品。欣賞庭院嘅人嘅關注焦點係電動除草機器人「miimo」。相信大家都有睇過嗰種自動打掃間房嘅圓盤機器人喇掛，「miimo」就係佢嘅割草機版本。即使地面有D傾斜或者係凹凸不平嘅庭院都可以克服嗰D阻礙鏟走曬庭院嘅雜草，電池剩低好少電嗰陣，會自動跑到去充電器嗰度，插上充電就得。仲可以預約鏟草，一個禮拜一次、或者兩日一次等等，規劃好就可以俾佢照跟。喺美國、歐洲等地方係相當有人氣嘅產品嚟嘅，話唔定呢款產品喺日本嘅未來都會大受歡迎啊。

耕耘機、發電機。仲有搬運呢D機械嘅汽車

喺花園擺放咗耕田嘅耕耘機、汽油引擎嘅發電機。耕耘機雖然細，但人類需要用到30分鐘先耕種完嘅田，佢一分鐘就可以完成。喺庭院可以享受種田種花嘅樂趣，都非常之方便啊。會場所擺設嘅發電機嘅規格係100V/9A，屬於最細型嘅發電機嚟，但係電熱式嘅烹飪設備有佢就足夠啦。

而會場展示咗可以搬運呢D機械同園藝用器材嘅汽車，呢台係日本輕型汽車市場入面最受歡迎嘅車款「N BOX」。日本消費者所俾嘅評價係車身雖然細，但室內嘅空間寬敞。而佢嘅特色唔係剩係咁，後座係可以輕輕鬆鬆咁收納到物品嘅構造，將座椅摺疊上嚟之後就有平坦嘅空間，可以將好多嘅大型物品擺放喺後座嘅。

日本嘅都市人口過於集中，成為咗一大嘅社會問題，但遠離都市嘅郊外就可以合理實惠嘅價格購買到一間擁有寬敞庭院嘅屋企，渡過悠哉嘅生活，咁樣嘅先進國家型嘅生活型態係人人都嚮往嘅。而喺日本嘅汽車廠商入面，可以將咁嘅生活型態以多采多姿嘅產品共同呈現出嚟嘅，唯獨得HONDA本田啦。