只要唔係返工放工嘅繁忙時間，對外國旅客嚟講，日本嘅電車係好舒適嘅交通工具。
車內通常超級乾淨，大家就算講嘢都好細聲，乘客都好自律。
當然，間中會有一啲破壞規矩嘅乘客。但其實可以保持咁乾淨又舒適兄乘車環境，係因為乘客間有一啲唔係明文規定嘅溍規則。
照順序排隊上車
喺月台上會標示出每一道門嘅所在位置，當地人一舨會喺門前排成二行，分別係門嘅一左一右（繁忙時間有時會係四行）。當列車埋站，先讓車內嘅人落車後，再上車走入車廂中間。雖然有啲時間會有人會推撞，但作為遊客，最好都係耐心排隊，夾硬擠上車只會令周圍嘅人留低壞印象。
唔好喺車上進食
除咗新幹線同埋一啲長途嘅電車，平日搭車時進食並唔係太適合。
如果覺得肚餓，可以喺月台買啲小食，或是去站內嘅店舖食咗先。
如果真係必須係車上食嘢，選擇細嘅零食或者係無強烈氣味嘅麵包，而且食嘅時候要盡可能安靜。
如果係帶食物上車，請唔好帶有強烈氣味嘅食物。食物氣味如果影響到其他嘅乘客就唔太好。
喺電車上要輕聲細語
喺電車上講嘢時，最好維持住剩係對方聽到，其他人都聽唔清楚嘅音量。
除非係緊急情況，否則喺電車上接電話係被視為唔適當嘅行為。
如果係搭車時有電話打嚟，應該要先將鈴聲轉至靜音，然後去到下個站時，落車回覆電話。
電話鈴聲或者鬧鐘響起，全部會被視為無禮貌。所以搭上電車時，要將手機轉至靜音模式。
注意指定專用區
幾乎所有電車上都有關愛座（優先席），係為咗懷孕婦女、行動不便者、年長者或者帶住年幼孩童嘅人而設。
當呢啲座位空著時，任何人都可以使用，但如果見到需要座位嘅人出現時，請讓座俾佢哋。
喺幾條最熱門電車路線，繁忙時間都有女性專用車，以防女性被非禮。但其實呢啲車廂，除咗女性之外，小朋友、行動唔方便嘅人、或者照顧行動唔方便嘅人等男性，都可以乘搭。
通常女性專用車輛會係第一卡或者最後一卡車廂，但唔同路線、時間有可能唔同，會有清楚嘅標示。如果你唔係女性，請注意喺女性專用時段避開呢啲車廂，否則可能會被受一堆女性嘅白眼啊。
唔應該喺車上化妝
呢點有啲具爭議性，但係多數人都認為喺日本嘅電車上，整理髮型或化妝都係唔恰當嘅行為。
有啲人認為呢個係好行為好隨性，亦覺得可能會有粉飄到周邊嘅人面前，或者強烈嘅化妝品香味都會影響到其他人。
仲有啲人認為補妝就好似著衫咁，係好私密嘅行為。
簡單嚟講，呢個行為會令好多人感到唔舒服。
只係搽個潤唇膏或唇膏嘅話，其實無傷大雅，但如果喺車上進行化全妝或者set頭嘅話，或者會引嚟好多異樣嘅注視眼光。
----
呢啲日本搭車禮儀有無邊一項令你覺得驚訝呢？你認同或唔認同呢啲禮節同潛規矩呢？可以留言同我哋們分享你嘅想法呀！
Comments