去到外國搭巴士，言語不通又唔似鐵路咁多資訊，係件相當有挑戰嘅事。係人生路不熟嘅地方，剩係想搞清楚路線、車站，或者收費方式，都已經可以令人卻步。如果可以嘅話，最有用就係去當地嘅旅客服務中心，拎多啲有關巴士嘅資訊。通常唔單止有路線圖、車費，仲會有乘搭方式等嘅簡單介紹。不過呢度都等我地嚟介紹下幾個重點，等大家可以利用巴士係日本嘅城市小鎮入面捐窿捐罅，暢遊無阻。
喺車頭上車定車尾上車？
其實唔同城市甚至唔同巴士路線，上車方式個規矩都可能唔同。舉例嚟講，喺東京都內嘅巴士係前門上車，但京都就係後面上車。而且前後上車一般都會影響埋比錢嘅Timing，前門上車就上車時候俾，後門上車就多數係落車先俾錢。
車費點計同點俾？
事先了解係上車定落車俾錢嘅話，就可以順利又型仔咁俾錢搭車。最好就預先查下要幾錢。一般都係同一程車搭幾遠都係劃一價格。但喺日本都有唔少地方係按距離收費，搭呢嘅巴士嘅時候，通常喺側門上車，係車門則面拎張飛，上面記錄左係邊個站上車，然後落車時就按返搭左幾遠嚟計錢。收貴通常會顯示喺巴士前面嘅螢幕上，睇下自己手上飛嘅號碼或者站名，對返螢幕顯示就可以搵到要俾幾錢。
一日票或區域票
計劃旅程中所需要嘅交通行程路線，如果咁啱有全日票或者區域票啱用，就可以旅程更加慳錢同方便。如果買鐵道嘅區域飛，可以睇清楚有無包埋巴士。有一啲外國觀光客先至用得嘅專屬區域飛，好似係關西周遊卡（兩日券4,000円），係會包埋喺係限定城市入面，可以搭幾間唔同公司嘅巴士。任何一張區域飛或者一日飛如果包埋巴士，一日之內搭到幾次巴士嘅話，就會超級扺。
用交通卡續次付費
比較適合日日搭，坐幾多俾幾多，但係又唔係好鍾意搵散銀嘅朋友們。推薦你用電子交通卡，通常係主要車站可以買到，而且同一張卡幾乎係全日本都可以用，好多巴士都可以用。但請你記得係上巴士前，要事先記得充好值先，避免唔夠錢扣。有啲巴士就好似搭電車個陣進出站一樣，上車同落車個陣都需要噺嘟卡感應。
現金付費
原則上搭巴士個陣需要準備啱啱好嘅金額零錢，但係日本嘅巴士上通常都有換散銀機，以防乘客散銀唔足。另外，巴士係唔可以用信用卡嘅。而係唔同地方，有一啲係巴士係可以直接同司機買一日飛嘅。
噤鐘落車
到達想落車嘅站個陣，係需要噤鐘落車嘅。通常可以係座位或者扶手附近搵到。
係日本旅行期間，揀搭巴士嘅話，可以更加深入咁一窺當地生活嘅好方式。依循上述幾個方法，坐係巴士從車窗欣賞另一面嘅日本街道同景色啦。
Comments