新年係日本人一整年中最廣為慶祝嘅節日，大家唔只會慶祝新一年更加豐收、美好，新年亦係一家人少數可以聚首一堂嘅日子，可以共享喜悅嘅時光。相信大多數人都聽過一啲常見嘅日本新年傳統，例如新年參拜（日文：初詣），或者睇日本除夕嘅長壽節目「紅白歌合戰」。不過，您有無諗過，除咗去寺廟或神社排隊參拜之外，日本人喺過年時仲會做啲乜嘢呢？就等我地嚟介紹一啲日本人過年嘅傳統同習慣吧！
日本傳統料理—御節料理
「御節料理」（おせちりょうり）係日本新年嘅傳統菜，料理會用好多唔同好意頭嘅食材，包括豆、海鮮及魚餅等。由於御節料理多款而且份量十足，通常需要幾個人一齊喺新年前花兩三日為全家準備。份量依據家庭成員人數嚟決定，有嘅家庭甚至要準備20人份嘅御節料理。此外，料理嘅食材亦會因各個家庭喜好同埋地方傳統而有所不同。
由於準備御節料理要花好多時間同精力，注意到呢點嘅超市同便利店，近年都開始賣御節料理，成為無數家庭嘅救星。
※相關文章：日本人新年食啲乜？ 超豪華賀年菜「御節料理」
購物狂嘅至愛—首賣&福袋
「首賣」（初売り）係指新年過後嘅開市首日售賣，大多數舖頭都會喺新年假期嘅頭3日舉辦特惠促銷嘅活動。除咗單獨嘅特價品之外，首賣活動亦會賣「福袋」。袋係指內容隨機嘅商品套裝，通常裡面嘅商品總價值會高過福袋售價。福袋有趣嘅地方在於，大部分嘅福袋都封起嚟，無辦法睇到入面嘅商品，所以只可以靠運氣。好多舖頭都會先公布商品嘅類型，但唔會詳細列明實際入面嘅商品內容。有啲福袋非常超值，有人會喺除夕，甚至前幾日就開始排隊。
※相關文章：乜嘢係「福袋」？話您知日本新年買福袋必知事項！
為小朋友而設嘅傳統遊戲
新年喺日本少數可以全家人聚埋一齊食飯飲酒傾偈嘅日子。喺大人忙住閒話家常嘅時候，大多數小朋友都會因為無聊而開始玩一啲傳統遊戲，其中最常見嘅就要數「歌牌」（かるた）。
歌牌係以日本五十音為基礎嘅卡片遊戲。當詠唱者唱出詩歌後，玩家就要爭先搶同詩歌相關嘅歌牌。除咗要有好嘅記憶力之外，仲要眼明手快，反應快。係個好有挑戰性嘅遊戲。
小朋友嘅新年禮物—利是
除了歌牌等傳統遊戲外，新年期間最令小朋友開心就當係「利是」（御年玉）。親戚會將錢入落叫「ぽち袋」（音為Pochi-bukuro）嘅特製小信封入面(同利是封差唔多)，畀小朋友做新年禮物。日本嘅利是封上面通常會印咗啲可愛或者優雅嘅圖案。
傳統上無嚴格規定利是要畀幾錢，但一般慣例嘅話，未入小學嘅小朋友就會畀2,000円、小學生3000円，中學生就5,000円咁，如此類推。而利是係幾多錢，亦會取決於同小朋友嘅關係，如果係自己嘅小朋友，近親嘅小朋友，同朋友嘅仔女，或者老闆嘅仔女，就當然會有唔同。
Comments