壽司可算係全球最多人知嘅日本料理。就算喺日本國外，都好多壽司店，其中有啲都幾地道。甚至對於某啲外國人嚟講，食壽司可能已經成為佢哋日常生活中嘅一部份。
即使係咁，好似都好少睇到有外國人可以好優雅咁品嘗壽司。撇開某啲地方本嚟唔識用筷子，其他地區，甚至日本人自己，都未必知道正確有禮，優雅咁食壽司嘅方法。
今次，我地就向壽司職人請教，學返正確又高雅嘅壽司食法啦！
1) 可以用手或筷子
可能大家會覺得好意外，但其實用手定筷子並唔重要。而家大部份嘅壽司其實已經係現代版本，以前嘅壽司大小通常比而家嘅大舊，真係成舊飯糰咁，所以當時用手拎壽司嚟食係好平常，而現時壽司改良到細啲，方便用筷子夾嚟食。但如果你想直接用手拎嚟食，都完全OK架。
2) 唔好用醋飯嗰邊嚟沾豉油
呢個係最多人亦最容易犯錯嘅一點。手握壽司係將塊魚生放喺醋飯上，所以普遍就認為應該魚喺上面，飯喺下面咁食落肚。於是就會用下面醋飯嘅部份沾豉油嚟食。
但係，通常呢個食法嘅下場係點呀？咪就好似下面張相嘅咁囉…
呢個就係點解往往需要經過十年以上嘅訓練先成為到真正嘅壽司職人，因為握壽司只係用最細嘅力道去令米飯維持形狀㗎咋。
如果你用專業壽司職人所做壽司嘅醋飯嗰邊嚟沾豉油，你會發現啲飯好容易散，飯粒跌落豉油碟，搞到亂七八糟......
另一個你唔可以用醋飯沾豉油嘅原因就係，米飯吸收豉油嘅速度好快，咁嘅話就好難拿捏沾取豉油嘅分量，唔係太淡就係太鹹。
如果想避免呢種情況出現，記得將魚生片翻到側面。然後小心地夾起佢，用魚生片嗰面去沾豉油啦。
由於魚生片嘅表面光滑，所以比較易控制沾豉油嘅份量。咁就唔會食到太鹹、只係得豉油味嘅壽司，亦唔會搞到味覺麻痺，分唔到壽司嘅口感同味道啦。
３) 一啖食哂去
另一件好重要嘅事就係，記得要一啖食晒成件壽司，唔好將佢分開幾啖食。因為件壽司好易整散晒。如果你發現當可以分到幾啖食，而件壽司又唔散嘅話，咁就唔好彩喇，因為咁樣即係呢間店壽司職人嘅手法唔夠專業呀。
注意以上幾點，咁你嘅豉油碟唔單止可以保持乾淨，亦可以充分享受壽司「真正」嘅風味同口感啦！
Comments