「一輛老舊的列車緩緩地馳騁在大雪紛飛的津輕平原上。車窗上茫茫霧氣遮蔽了視線，抬起手輕輕劃過，外頭冷冽的空氣一瞬間透過玻璃車窗刺痛了指尖，霧氣凝結成的水滴也順勢悄然墜落。手中捧著熱呼呼的烤魷魚，整個身子便暖了起來。窗外的大雪紛飛似乎與你無關，雪白原野上的景色就這樣逐漸被拋在了身後。」
日本東北地區青森縣「津輕鐵道」嘅「暖爐列車」，正正就係極具詩情畫意與小說意境嘅冬季風物詩，有如日本舊電影情節一樣，令人嚮往。今日，小編就同大家分享乘搭過後嘅實際體驗吧！
青森縣「津輕鐵道」：日本本州最北嘅私鐵
青森縣「津輕鐵道」係日本最北嘅私鐵（私營鐵路），連結津輕五所川原站至津輕中里站，單程車程時間約45分鐘，其中僅有津輕五所川原站、金木站，以及津輕中里站有站務員在駐，其他皆為無人車站。
每年冬天，日本東北地區便會大雪紛飛。昔日，電力暖氣並未普及嘅年代，為咗提高室內溫度，大家都會燒炭取暖。從1930年開業至今，經已超過90幾年歷史嘅津輕鐵道，早就喺當時就將暖爐取暖嘅方式，應用到冬季列車上。
即使去到時至今日，現代電力設備發達，踏入大家經已唔多需要燒炭取暖嘅時代，然而津輕鐵道仍然保有住呢個傳統，於每年12月至翌年3月推出冬季限定嘅暖爐列車，令生活喺科技發達嘅現代人，都可以體驗到懷舊老式嘅暖爐列車，亦成為前往日本東北地區旅遊時，其中一項極具特色嘅觀光體驗行程。
除咗冬季嘅暖爐列車，津輕鐵道仲會喺夏季期間推出「風鈴列車」以及秋季「鈴蟲列車」，共三款特色季節限定列車帶大家穿梭津輕平原，感受青森縣嘅獨特魅力。
青森縣津輕鐵道「暖爐列車」實際乘搭體驗
行程首站從「津輕五所川原站」出發！
「津輕五所川原站」係津輕鐵道嘅總站（始發站）。從青森縣市區青森站或弘前站出發嘅朋友們，可以乘搭JR五能線與JR奧羽本線至「JR五所川原站」，出站後往旁邊徒步約1分鐘就會抵達「津輕五所川原站」！
空間細細嘅津輕五所川原站，望落就好似間古老學校嘅辦公室校舍，車站內設有暖爐，牆上貼上各式各樣琳瑯滿目嘅手繪圖、舊相、海報，以及手寫標語，極具舊時代感，彷彿瞬間穿越時空，回到過去。
記得購買暖爐列車乘車券！
小編喺度要特別提醒大家，想體驗暖爐列車嘅話，記得一定要買晒「暖爐列車券（500日圓。上圖上方）」以及「普通乘車券（按票價區間收費。上圖下方）」兩張車票喔！暖爐列車嘅車票係傳統硬式紙卡，人工剪票，復古感十足！
另外，津輕鐵道每日運行班次唔多，暖爐列車更加係一日只有2至3個班次（*1）來往津輕五所川原站和津輕中里站之間，想乘搭嘅朋友可以先上津輕鐵道官方網站查詢時間表。
*1：12月1日與其他12月平日日子為每日2個班次（12月30日至3月31日為每日3個班次）。
津輕鐵道嘅超復古傳統列車！
津輕鐵道無論係車站月台，抑或係列車本身都極具日式古老電影中嘅寧靜感，隨著列車緩緩出發，成架車身搖搖晃晃，連同頭頂上置物架都發出吱吱呀呀嘅聲響，仲會因為車身晃動得太厲害，列車工作人員不斷呼籲大家一定要坐喺座位上，唔好為咗影相而周圍行嚟行去，以免跌倒受傷。
搭暖爐列車必食暖笠笠烤魷魚！
暖爐旁邊嘅座位，絕對係最熱門嘅人氣區域，但大家並非為咗取暖，而係為咗烤魷魚！（全列車自由座位）
車上除咗有列車長之外，仲有津輕半島觀光車掌小姐擔任乘客觀光導覽。車掌小姐會喺列車行駛期間，不定時為暖爐加炭，如果你有購買魷魚（車上販售價700日圓），就會幫你將魷魚放喺暖爐上嘅網架上燒烤，再撕成一條一條，放落膠袋入面。
暖爐旁邊嘅座位，其實好熱㗎！即便外面氣溫低於零度，我哋喺車上係熱到要除晒大褸同頸巾喔！
影完相之後，就好開心咁拎住暖笠笠嘅魷魚，移到遠離暖爐嘅座位享用。魷魚真係非常好有咬口，而且愈咬愈香，啱晒用拎做下酒菜啊！
除咗烤魷魚，亦推薦大家出發前可以喺津輕五所川原站購買同樣為冬季限定嘅「暖爐便當」（1,150日圓，需要預早三日前預約），菜式豐富，有飯糰、炸蝦、當地蔬菜等（依季節調整）。車站亦有賣勁好飲嘅青森特產100%蘋果汁！
津輕鐵道沿途特色景點推薦
搭暖爐列車唔單止夠晒好影、烤魷魚好味又得意，沿路特色景點亦都非常推薦！以下會為大家介紹津輕鐵道遊必到嘅打卡人氣熱點。
津輕鐵道「津輕五所川原站」：立佞武多館
一場嚟到青森縣，梗係唔可以錯過傳統文化產物「睡魔」！距離始發站「津輕五所川原站」幾分鐘路程嘅地方，有一間擺放大型立佞武多（立體睡魔燈籠）嘅「立佞武多館」。
展館嘅最大睇頭就係高約23米嘅立佞武多紙人偶燈籠，從高處展望台沿著螺旋狀坡道由上往下參觀，簡直就好似一個又一個嘅巨人企喺你眼前，非常有震撼力，即使並非祭典現場，亦可以感受到非凡嘅臨場感。
館內設有可免費參觀立佞武多製作過程嘅製作所（4月至6月期間會有免費貼紙體驗），亦有提供金魚睡魔或睡魔提燈等充滿青森縣特色嘅製作體驗，非常適合親子遊。
立佞武多館
地址：青森縣五所川原市大町506-10
- 開館時間：09:00〜17:00（12月31日營業至15:00）
※至2023年3月為止，全館縮短營業時間至17:00
※6樓展示貴賓室至14:30、1樓咖啡廳至16:30
※睡魔祭期間營業時間將有所更改。 - 休館日：1月1日
- 入場費：
【立佞武多展示室與美術展示畫廊套票】成人850日圓、高中生500日圓、中學及小學生300日圓 - 交通：津輕鐵道「津輕五所川原站」徒步約5分鐘
津輕鐵道「金木站」：太宰治記念館「斜陽館」
津輕鐵道行經嘅金木町，係日本知名文學作家太宰治嘅故鄉，而金木站附近嘅太宰治記念館「斜陽館」，為其出生與成長嘅老家。
紀念館前身為太宰治父親兼當時嘅大地主津島源右衛門，於1907年建造嘅豪宅，包括附屬嘅建築物及庭園在內，總面積超過2,200平方米。豪宅後來被改建為旅館「斜陽館」，吸引全國各地嘅文學大師粉絲慕名前來朝聖。
直至1996年，斜陽館再被金木町收購、復元，現作為紀念館開放參觀，並展示書寫用具及親筆手稿等珍貴文物，空氣內漫延著一股濃厚嘅文學氣息。
太宰治記念館「斜陽館」
地址：青森縣五所川原市金木町朝日山412−1
- 開館時間：09:00～17:00
- 休館日：12月29日
- 入場費：成人600日圓、高中生及大學生400日圓、小學及中學生250日圓
- 交通：津輕鐵道「金木站」徒歩約7分鐘
津輕鐵道「津輕中里站」：日本本州最北嘅私鐵車站
津輕鐵道嘅終點站「津輕中里站」，同時亦係日本本州最北嘅私鐵車站。站內設有小食區與津輕鐵道相關展覽。時間許可嘅話，當然係悠閒地一路坐到津輕中里站之後落車，喺月台上影返張「日本最北私鐵最北車站」嘅呃Like打卡相啦。
乘搭津輕鐵道，就好似走入舊時代嘅日劇場景之中。有機會去到東北自由行嘅話，推薦大家一定要去青森縣，乘搭津輕鐵道冬季限定嘅暖爐列車！望住車窗外夢幻雪景，旅程一轉眼就過去，絕對會令人感到依依不捨，意猶未盡呢！
Comments