日本東北地區涵蓋青森、秋田、岩手、山形、宮城、福島，共六個縣，因氣候同地理條件，擁有喺其他地方罕見嘅自然景觀、盛產新鮮水果同超鮮美嘅海產。
由日本國家旅遊局所推動嘅「新日本心體驗」，挑選出日本全國各地嘅經典旅遊路線行程，無論係第一次嚟日本旅遊或者係再次造訪日本嘅外國旅客，都可以嚟一場深度之旅，發現日本之美！
今次就一於嚟探訪東北地區嘅岩手與青森，畀大家參考吓充滿魅力嘅冬季四日三夜推薦行程啦！
日本東北－岩手、青森」推介行程
Day1 | 【釜石大觀音】⇒【淨土之濱】⇒宮古市內住宿 |
Day 2 | 宮古市内⇒喺宮古市內餐廳食午餐(瓶丼)⇒【龍泉洞】⇒盛岡站周邊住宿 |
Day 3 | 盛岡站⇒【安比塗漆漆繪體驗】（八幡平市博物館）⇒【安比高原滑雪場】⇒安平高原內住宿 |
Day 3 亦可以這樣玩 | 安比高原⇒八幡平、安比高原嘅登山越野車之旅⇒盛岡市內住宿 |
Day 4 | 盛岡市內⇒青森縣文化觀光交流設施【睡魔之家Wa Rasse】⇒【津輕鐵道暖爐列車】⇒太宰治紀念館【斜陽館】、【五所川原立佞武多之館】⇒青森市內住宿 |
乘搭暖爐列車向銀白色世界出發
https://www.japan.travel/hk/hk/japan-activities/tohoku/itineraries-3/
新日本 心體驗
https://www.japan.travel/hk/hk/japan-activities/
岩手地區
【景點】釜石大觀音：由眺望大海嘅大觀音守護嘅戀人勝地
「釜石大觀音」位於釜石灣旁大平町鎌崎半島高上，雪白嘅魚藍觀音像高48.5米，好優雅咁聳立喺半島上眺望住釜石灣海景。而魚藍觀音像正係三十三觀音嘅其中一種型態。
大觀音嘅內部共分為13層樓，展示同埋祭祀住三十三觀音同七福神等神明。11樓同12樓係展望台，參拜者唔單止可以喺戶外高台上欣賞大觀音以及一望無際嘅碧海藍天，更可以登上觀音內部，將優美海景盡收眼底。整個境內有多個精彩嘅拍照打卡地點，仲有特色御守詩籤，好值得前往參拜㗎！
釜石大觀音
- 地址：岩手縣釜石市大平町3-9-1
- 營業時間：9:00～17:00 依季節調整
- 交通：喺釜石站搭岩手縣交通巴士到「釜石大觀音入口」或「觀音入口」落車，車程約10分鐘。落車後行約10分鐘
- 官網(日文)： http://kamaishi-daikannon.com/
【景點】淨土之濱（淨土ヶ浜）：被譽為極樂淨土般嘅超壯麗絕景
「淨土之濱」位於岩手縣宮古市，隸屬於三陸復興國立公園。喺呢度可以欣賞到獨特嘅地質景觀，同埋透明度極高、澄淨碧藍嘅海水。喺夏天，呢度仲係當地非常受歡迎嘅海水浴場𠻹。而喺冬天，則有不可思議嘅「雪化粧」壯觀景緻，被列為日本嘅名勝文化財產之一。
喺淨土之濱，大家仲可以搭觀光遊覽船喺海面上欣賞奇岩異石嘅岩礁地帶海岸線，或者係坐特製小船探訪著名嘅青之洞窟，四周都充滿絕美嘅翡翠色蔚藍海水，就好似進入咗異世界一樣！
淨土之濱
- 地址：岩手縣宮古市日立浜町32-69
- 交通：喺宮古站搭巴士至「奥淨土之濱」落車，車程約20分鐘
- 官網(日文)：https://www.city.miyako.iwate.jp/kanko/jyoudogahama.html
【美食】玻璃樽丼飯：一次品嚐唔同風味嘅宮古新名物
岩手縣沿海一帶盛產海膽等海鮮，將捕獲嘅海膽同經殺菌處理過嘅海水一齊放入牛奶樽入面保存，係當地普遍嘅做法。據講咁樣可以保持海膽嘅新鮮同美味，係宮古地區嘅名產。
「玻璃樽丼飯」就傳承咗呢種咁獨特嘅飲食方式，將宮古當地嘅季節食材裝入牛奶樽入面。常見嘅主要海鮮有三文魚、鱈魚、三文魚卵、魷魚同海膽等等。
食法係首先將樽入面一半嘅食材鋪喺白飯上，加少少豉油同芥末做成海鮮丼。之後再將淨返嘅一半同樣放入白飯碗中，然後淋上高湯或茶，變成茶泡飯嚟食。當然大家都可以依照自己嘅喜好嚟變換食法嘅，好似小編咁，就比較鐘意茶泡飯嘅食法喇。一道料理可以品嚐唔同嘅風味，保證唔會覺得厭！
宮古觀光文化交流協會官網： https://kankou385.jp/special_kiji/4482/
【景點】龍泉洞：神秘優美嘅日本三大鐘乳石洞之一
「龍泉洞」同山口縣嘅「秋芳洞」、高知縣嘅「龍河洞」並列為日本三大鐘乳石洞，同棲息喺洞內嘅蝙蝠群一齊被指定為國家天然紀念物。
洞穴內嘅地底湖水質透明度極高，伴隨住燈光，會散發出好似寶石咁優美嘅湛藍光輝。洞內濕度極高，蜿蜒曲折，但路線規劃相當完善，指示說明板亦都一目瞭然，清晰帶領大家探訪呢個咁引人入勝嘅神秘世界。
雖然目前已知範圍嘅深處約為4,088米，但只有其中嘅700m公開畀大家參觀。聽講仲有5,000米係未知範圍。
龍泉洞
- 地址：岩手縣下閉伊郡岩泉町岩泉字神成1-1
- 營業時間：8:30～17:00
- 門票：成人（高中以上）¥1,100、中學生以下¥550
- 交通：喺盛岡站搭巴士至「龍泉洞前」落車直達（車程約2小時15分鐘）
- 官網：http://www.iwate-ryusendo.jp
【體驗、觀光】安比塗漆漆繪體驗、八幡平市博物館：日本傳統塗漆體驗，繪製個人風格筷子
喺日本東北嘅北部，例如八幡平市安比地區，係日本少數嘅塗漆產地。呢度自繩文時代開始就有生產透明度、發色同硬度都極為優質嘅高品質漆器。
「安比塗漆器工坊」傳承咗漆器傳統文化同製作技術，漆料同內胎所使用嘅木材堅持使用日本國產嘅天然素材，並因應現代生活，持續生產餐具器皿等各式各樣嘅生活漆器用品。唔單止風格簡約典雅，仲擁有飽和度極高嘅色澤，堅固耐用，無論係送禮或者自用都一樣咁啱。
工坊入面有展示同埋販售種類豐富嘅商品，每一件都好似藝術品一樣咁靚。大家仲可以體驗使用安比塗漆料嚟畫一對自己原創嘅彩繪筷子，然後就會發現，原來要喺面積細長、圓弧形狀嘅筷子上面畫畫真係唔係咁易㗎！
另外，安比塗漆器工坊對面嘅「八幡平市博物館」則展示住安比漆器文化、當地出土嘅土器、土偶，以及近代農業等歷史文物。
安比塗漆器工坊
- 地址：岩手縣八幡平市叺田230-1
- 營業時間：週二至週日9:30～16:00
- 休店日：每星期一，如為假日則照常營業、年末年始
- 交通：喺JR荒屋新町站行約10分鐘
- 官網(日文)：https://www.appiurushistudio.com
八幡平市博物館
- 地址：岩手縣八幡平市叺田230
- 營業時間：星期二至星期日9:00～16:30（16:00最後入場）
- 休館日：每星期一，如為假日則順延、年末年始12/29～1/3
- 交通：從JR荒屋新町站行約10分鐘
- 官網(日文)：https://www.city.hachimantai.lg.jp/site/hachimantaisihakubutsukan/
【體驗活動】安比高原滑雪場：享受滑雪樂趣、欣賞絕美風景，仲可以浸天然溫泉！
「安比高原滑雪場」係日本東北地區具代表性嘅滑雪場之一。雪場面積寬廣，共有21條雪道，總滑行距離約43,100米，同時設有適合小朋友玩樂嘅「雪遊樂園」，同埋可以深入雪地觀察自然生態嘅「雪鞋導賞團」，無論係初學者或者係進階老手都可以玩得盡興！
享受滑雪刺激嘅速度感係其次，影靚相先係重點！推薦大家一定要搭纜車到山頂欣賞美麗嘅樹冰，天氣好嘅時候，仲可以直接睇到壯麗嘅岩手山同埋青森縣𠻹。喺清新空氣同陽光下閃閃發光嘅粉雪，相信就算係唔識滑雪都一樣可以體驗雪國魅力！
雪場內亦都有直營嘅酒店，提供餐飲、天然溫泉，以及租借裝備等服務，等大家唔使帶大件嘅行李，都一樣可以輕鬆享受滑雪假期。嚟東北旅遊想體驗滑雪樂趣嘅朋友，一定要嚟安比高原滑雪場喇！
安比高原滑雪場
- 地址：岩手縣八幡平市安比高原
- 營業時間：纜車8:30～17:00 每日運行狀況請參考官方網站
- 交通：喺JR安比高原站搭接駁巴士（唔使預約），喺「皇冠廣場 Crown Plaza」落車直達
岩手縣安比高原度假村盡享滑雪樂趣
https://www.japan.travel/hk/hk/japan-activities/activities/418/
【美食】碗子蕎麥麵：充滿樂趣嘅盛岡名物
唔知大家有無睇過日本嘅綜藝節目呢？隨著店員非常有節奏嘅吆喝聲，蕎麥麵亦會一碗接一碗咁倒入客人手上嘅碗入面。空碗慢慢會愈疊愈高、數目愈嚟愈多，直到示意停止前，店員都唔會停手為大家不斷添麵。
其實呢種「碗子蕎麥麵」係岩手地區獨特嘅熱情款待飲食文化，一口份量嘅蕎麥麵，食15碗大約就係普通嘅一人份蕎麥麵。搭配吞拿魚刺身、日本特有嘅菇類、蘿蔔泥、芥末、紫菜、芝麻、醃菜仲有蔥等配料（藥味）一齊食，每一啖都可以食到唔同風味。碗入面多餘嘅蕎麥麵汁可以倒去桶入面，唔洗自己飲完。大家只要依照自己嘅節奏適量咁品嚐就得，唔使好似電視節目咁狼吞虎嚥㗎。喺店員睇得到嘅狀況下冚上碗蓋代表「停止」嘅意思，睇到呢個信號，店員就唔會再繼續加麵。所以如果你食飽、唔想再繼續加麵，就將碗入面最後嘅蕎麥麵食完再冚埋個蓋啦！
話雖如此，其實小編喺實際體驗嘅時候，喺同行友人同埋店員嬸嬸慫恿下，食咗超多碗，到後半段根本就係同嬸嬸鬥快，睇吓係小編個碗蓋冚得快定係店員嬸嬸加麵加得快。最後小編總共食咗46碗，相當於超過3人份嘅蕎麥麵，簡直就係飽到上心口！不過無論如何，呢個都係一個非常有趣嘅經驗嚟嘅！有興趣嘅朋友，不妨到盛岡車站對面嘅碗子蕎麥麵名店「東家」體驗一下！
東家
- 地址：岩手縣盛岡市盛岡站前通8-11-2F （站前地下道A1出口）
- 營業時間：午餐 11:00～15:00、晚餐17:00～19:00（L.O.）
- 交通：JR盛岡站行約2分鐘
- 官網(日文)：https://wankosoba.jp
青森地區
【觀光】青森市文化觀光交流設施「睡魔之家Wa Rasse」：東北最具代表性嘅夏日祭典
「青森睡魔祭」於每年8月2日至8月7日舉行，據講係由中國嘅七夕祭典結合當地嘅習俗後演變而嚟，將燈籠放喺水中漂走，亦都有住等睡意漂走嘅意思。喺日文入面，睡魔（睡意，又有災厄嘅意思）係農作嘅天敵，傳統習俗中為咗秋天可以豐收，就必須喺夏天嘅時候將睡魔趕走，於是夏天嘅青森睡魔祭亦就此誕生。每年喺當地都會製作超過20座嘅巨型睡魔燈籠，喺祭典中伴隨著歌舞遊行。
喺青森市文化觀光交流設施「睡魔之家 Wa Rasse」入面，除咗可以了解睡魔祭嘅歷史同製作過程，仲可以近距離咁欣賞每年嘅優秀作品。每一件作品唔單止色彩鮮豔、立體感十足同超有魄力之外，仲訴說住一段段歷史傳奇或者係神話等。加上可以360度欣賞，非常引人入勝㗎！
館內嘅販賣部仲有發售經典作品嘅周邊商品，好似運動T-shirt、環保袋、造型面膜等，全部都超有特色，令人愛不釋手！
青森市文化觀光交流設施「睡魔之家Wa Rasse」
- 地址：青森市安方1-1-1
- 營業時間：9:00～18:00（5月至8月為9:00～19:00），最終入場為閉館前30分鐘
- 休館日：12/31、1/1、8/9、8/10
- 交通：從JR青森站行約1分鐘
- 官網：http://www.nebuta.jp/warasse/foreign/hantai.html
【體驗、觀光】「津輕鐵道・暖爐列車」冬季巡禮：東北雪國必體驗嘅特色列車
「津輕鐵道」係連結五所川原站至中里站嘅鐵道路線，全長約20公里，單程所需時間約45分鐘。隨住季節變遷，會有不同嘅特色列車行駛，包括夏季嘅風鈴列車、秋季嘅鈴蟲列車，以及今次特別推介嘅冬季「暖爐列車」。
暖爐列車嘅運行期間為每年12月至翌年3月，復古嘅車廂內設有暖爐，喺寒冷嘅冬天一邊圍住個暖爐取暖，一邊欣賞窗外嘅雪景，非常有情調。
車廂內仲有賣烤魷魚，列車小姐會喺暖爐嘅鐵網上幫大家烤魷魚。一邊食暖笠笠嘅魷魚或者列車便當，一邊飲返杯清酒，欣賞車窗外嘅雪白世界，絕對會成為美好嘅回憶。
青森縣冬季限定暖爐列車
https://www.japan.travel/hk/hk/japan-activities/activities/421/
【觀光】太宰治紀念館「斜陽館」：日本最具話題性嘅文學作家古老大宅
日本文學作家太宰治（本名：津島修治），寫咗「人間失格」同「斜陽」等著名作品，佢強烈嘅個人特色同傳奇一生，甚至被翻拍成電視劇。
位於五所川原市金木町嘅「斜陽館（舊津島家住宅）」，就係太宰治出生同成長嘅舊居。呢棟建造於1907年嘅古老大宅，一樓二樓加埋一共有19間房，計埋米倉、日式庭園等附屬建築物，佔地總共約680坪，可謂貨真價實嘅豪宅。
館內除咗公開津島家所有生活起居空間同物品，仲展示咗太宰治成長時期嘅相、用品、文學作品同珍貴嘅手稿，非常值得參觀。
太宰治紀念館「斜陽館」
- 地址：青森縣五所川原市金木町朝日山412-1
- 營業時間：4月～9月 9:00～17:30、10月～3月 9:00～17:00（最終入場為閉館前30分鐘）
- 交通：喺津輕鐵道金木站行約7分鐘
- 官網(日文)：https://dazai.or.jp/
【觀光】五所川原立佞武多館：超壯觀嘅巨大人形睡魔燈籠
五所川原「立佞武多」高度達23米，重約9噸，係睡魔燈籠嘅另一種型態。每年喺五所川原立佞武多館內，會製作一台巨大嘅人形燈籠，並於祭典中出陣。
館內展示內容好豐富，四樓嘅看台座位甚至設計成電影院咁，喺兩座巨型立佞武多嘅守護下睇紀錄片，會有身臨其境嘅感覺。大家仲可以順住螺旋迴廊由六樓行到落一樓，360度欣賞立佞武多嘅歷屆作品。各件作品人物設計都栩栩如生，細節精緻，優美又有震撼力！
五所川原立佞武多館
- 地址：青森縣五所川原市大町506-10
- 營業時間：9:00～17:00（最終入場為閉館前30分鐘）
- 交通：喺JR五所川原站行約5分鐘
- 官網(日文)：https://tachineputa-official.jp/
【美食】帆立貝御膳：營養價值超高嘅豪華特色美食
青森嘅陸奧灣一帶，洋流寒冷而且穩定，海水入面含有豐富嘅礦物質同浮游植物，造就咗充滿帆立貝生長所需嘅天然養分同優質環境。
青森產嘅帆立貝唔止特別鮮甜，風味濃郁，肉質亦非常厚實彈牙，無論係生食、炸物、牛油炭燒、煮物，甚至係用嚟整日本和食、中華料理或者西式餐點，各種煮法都一樣咁適合。而且帆立貝有好高嘅營養價值，例如蛋白質、維生素B12同牛磺酸等，加上脂肪含量低，實用價值好高！
青森市嘅日本料理亭「百代」所提供嘅「帆立貝御膳」，可以話係豪華帆立貝六食，包括帆立貝刺身、牛油炭烤扇貝、湯、炸物、醃漬物，以及超好味嘅茶碗蒸。套餐菜色豐富份量又夠足，每一道菜都可以食到帆立貝鮮甜、軟嫩、彈牙嘅唔同風味同口感，令人好似進入咗帆立貝天堂一樣！如果你同小編一樣鐘意食帆立貝，就千祈唔好錯過喇！
日本料理 百代
- 地址：青森縣青森市本町2-3-11
- 營業時間：午餐 11:00～14:00、晚餐 17:00～22:00、不定休
- 交通：喺JR青森站搭的士約5分鐘
- 官網(日文)：https://www.momoyo-aomori.com/
「新日本 心體驗」期待大家造訪日本，前往岩手同青森，體驗充滿雪國獨特魅力嘅東北地區！更多詳細資訊記得參考活動專屬網頁！
乘搭暖爐列車向銀白色世界出發
https://www.japan.travel/hk/hk/japan-activities/tohoku/itineraries-3/
新日本 心體驗
Comments