講到「長崎」，唔知大家會諗起咩呢？係蜂蜜蛋糕、強棒麵（Chanpon）、天主教堂，定係二戰時嘅原子彈？有無發現長崎無論係特色美食，抑或係歷史遺跡都有著各國文化嘅色彩呢？
今次就要來為大家介紹融合日本、中華與歐洲荷蘭三大文化特色嘅長崎宴席料理「卓袱料理」，並推介能夠享受呢款料理，兼歷史悠久嘅「史跡料亭 花月」之魅力！
自古以來嘅繁榮港口「長崎」
位於日本九州嘅長崎，擁有大大小小嘅島嶼與美麗海岸線，自古以來係日本對海外交流嘅重要關口。日本曾經歷200年以上嘅鎖國政策，當時，長崎作為唯一一個開放出入口嘅貿易之地，與當時嘅世界強國頻繁來往，政商貿易經濟文化都受到強烈衝擊，經過異文化嘅融合與歷史薰陶，造就成現今充滿異國風情嘅長崎魅力。
「卓袱料理」其實係？
日本鎖國時代，長崎地區持續接收著大量嘅異國文化衝擊，無論係風俗民情，宗教信仰以及飲食文化，都深受影響，「卓袱料理」（しっぽくりょうり）正正係由此歷史中誕生而成。
源自長崎嘅卓袱料理，結合當時主要來往嘅中華文化與西歐荷蘭文化。一般嚟講，日本人喺長形餐檯上享用傳統宴席時，除咗座位位置會反映出每個人嘅身分階級，在座各位都會擁有一份屬於自己嘅套餐。卓袱料理則與此不同，打破身分地位嘅隔閡，喺具有團圓意義嘅大圓檯上一齊用餐，一道又一道料理被盛裝於大圓形器皿中，用餐者各自用自己嘅筷子及匙羹，分裝到自己嘅碟中享用。
呢種並無太多既定規則嘅用餐方式，令用餐氣氛更自在融洽，賓客之間更容易熟絡，卓袱料理亦因此喺民間大受歡迎，成為具代表性嘅長崎鄉土料理之一。
菜色部分結合和食、當地食材、中華料理嘅東坡肉、西式嘅批料理等，可謂融合不同文化元素所誕生嘅獨特日式宴席，亦被稱為「和華蘭料理」（わからんりょうり）。
「卓袱料理」主要菜色
每間料亭嘅餐點菜色與品數會有所不同，但絕對唔會缺少東坡肉、批料理等主流菜色。今次小編親自走訪「史跡料亭 花月」，為大家介紹幾款精選菜色。
※今次享用嘅係卓袱料理～午膳 晚膳～一人23,760日圓（含稅）套餐
首先，料亭嘅女將或宴會主持人，講完呢句「請享用魚鰭料理。（御鰭をどうぞ）」，意思係「為每位客人奉上一條魚」，去表達對每一位客人嘅盡心待客之道，卓袱料理就會正式開始。呢個做法係自古以來嘅習俗。
【御鰭（おひれ）】開宴菜，又稱「鰭椀」
卓袱料理嘅第一道菜。
通常係含有鯛魚胸鰭、冬菇或筍、青菜葉、紅白年糕（麻糬）等具山珍海味意義嘅清湯。
女將或主持人講完「お鰭をどうぞ」，所有人都必須將「お鰭」一飲而盡，先至可以進行乾杯，正式開啟宴會。喺「お鰭」之前，千祈唔好偷吃任何一道食物喔！
除咗「お鰭」之外，其他並無特定用餐順序，大家可以依照個人喜好，享受之後嘅美食！
【お作り】刺身拼盤
以長崎近海所捕獲嘅季節盛產魚類和貝類海鮮為主。
鯛魚和甜蝦係常見嘅食材，食落非常清甜。
【ばら煮】十六寸豆，又稱「滿女」（黑豆蜜煮）
冷盤小菜之一。
甜而不膩嘅丹波黑豆。食落口感溫和香甜，好似食飯後甜品一樣。
卓袱料理亦傳承中國寺院素齋與藥膳精神。以前將十粒豆排為一列，正好達六寸嘅長度，因此被稱為十六寸豆。有減緩食慾不振、消化不良、疲倦等不適嘅含意。
【三品盛】海里山三品冷盤
通常以甜蒸蛋、海鮮湯凍、山芋等食材，去象徵海洋、村里、山間。昔日砂糖和鹽等調味料相當珍貴，為咗表達好客精神，會使用大量砂糖去調味。
【湯引】汆燙刺身
將新鮮魚類利用滾水迅速汆燙，然後即刻用凍水快速冷卻所製成嘅刺身料理。係中華料理常見嘅烹調方式之一。
【中鉢 豚の角煮】東坡肉
「中鉢」意思係指中型嘅餐盤。
冷盤開胃小菜之後會提供熱食，「東坡肉」就係最具代表性嘅菜色之一。肥瘦比例恰到好處嘅五花肉，被燉煮至既軟嫩又彈牙，真係聞到就已經流晒口水。
【パスティー】批料理
西洋風嘅批料理，將菜餚裝入圓形碗內，喺碗上以條狀批皮裝飾，並焗成誘人嘅焦脆金黃色。
食嘅時候先整碎批皮，再混入碗裡與菜餚一同食用。「史跡料亭 花月」嘅批料理，碗內裝嘅係以大量魚翅烹調而成嘅湯品。
【大鉢】季節料理和食、煮物等
「大鉢」即係以大圓盤盛裝嘅菜色，每間料亭都會有其特色料理，例如蒸煮鯛魚、蟹肉、充滿山海珍味新鮮蔬菜與海鮮。
【水菓子】餐後水果
以季節水果製作特色甜點。
【梅椀 】和食甜品
放入紅白兩色圓形麻糬嘅紅豆甜湯。
卓袱料理中，最後一道「梅椀」與開宴嘅「御鰭（鰭椀）」有互相呼應嘅含意，以圓開始以圓結束，代表圓圓滿滿！
【其他 】包含天麩羅（炸物）、香物（醃漬物）、湯品等
依餐點預算或唔同料亭，提供嘅菜色亦會有所不同，含飯食在內約有15樣品項。
推薦享用卓袱料理嘅料亭——「史跡料亭 花月」：傳承長崎遊郭花街建築與文物
長崎嘅「丸山花街」據聞係日本三大煙花柳巷之一，江戶時代隨著海外貿易發展，丸山花街變得非常繁榮，唔單止有日本國內嘅政商名流和文人墨客到來，亦有多位國外極具身份嘅人士到訪。
於「九山花街」創業380多年嘅「史跡料亭 花月」，除咗仍然有提供卓袱料理等日本傳統料理，亦保留前身「引田屋花月樓」嘅古老建築以及珍貴史料，於現時嘅「集古館」展示間內，可以欣賞到當時遺留落嚟嘅畫作、俳句、歌本，以及坂本龍馬親筆書寫嘅手書。
喺宴席用嘅「龍之間」，據聞係日本境內第一間使用「檯櫈」嘅宴席場地，喺某條柱子上面，甚至仲有坂本龍馬因喝酒興起，所砍下嘅刀痕。另外，喺花月入口處掛有孫中山先生到訪時嘅相片！
由於橫跨近400年嘅歲月，且遺留下多個歷史遺跡，「料亭 花月」被指定為長崎縣嘅史蹟。大家可以去享用美食嘅同時，好好探訪一下充滿有趣故事嘅歲月痕跡喔！
料亭資訊
- 名稱：史跡料亭 花月
- 地址：長崎縣長崎市丸山町2-1
- 交通：從長崎電軌「長崎站前」站搭車約11分鐘，到「思案橋站」落車後徒步4分鐘
- 營業時間：12:00～15:00（L.O.13:00）、18:00～22:00（L.O.19:00 ※必須預約（至少2名成人）
Comments