以《超音鼠》和《人中之龍》等作品而為人熟知的「SEGA」，係代表著日本遊戲公司之一。誇張啲講句，每個日本人一生中都至少玩過一次世嘉遊戲都唔出奇！今次我哋獲得SEGA總公司特別許可，可以深入內部進行採訪！FUN! JAPAN熱愛遊戲嘅員工們，而家就代表各位粉絲進入呢個誕生出好多傑出作品嘅「聖地」啦！
「SEGA」的歷史：令超音鼠、貼紙相機成為熱潮
SEGA係一間日本遊戲公司，將於2022年慶祝成立 62 週年。成立初期，SEGA主要生產同銷售點唱機同商業遊戲機。喺1980年代，佢哋亦有生產「Mega Drive」等家用遊戲機，仲有喺遊戲中心常見嘅「UFO CATCHER🄬」，即係夾公仔機。
1990年代，SEGA推出「SEGA土星」同「Dreamcast」等多款遊戲機，以及將照片變成貼紙嘅貼紙相機鼻祖《Print Club》。無論喺家庭定商業用途上，SEGA都確立不可動搖嘅地位。作為代表日本嘅遊戲公司，SEGA喺海外都受到廣泛支持與喜愛。
SEGA唔只生產咗各種機體，亦推出咗好多知名遊戲。最具代表性嘅例子，包括以刺猬為主角的動作遊戲《超音鼠》系列、可愛智力遊戲《Puyo Puyo》魔法氣泡系列，仲有以日本紅燈區作為背景舞台的《人中之龍》系列。從呢三部作品中可以睇得出，SEGA唔受現有框架束縛，創造出各種各樣唔同類別嘅遊戲。
鍾意遊戲嘅日本人點睇「SEGA」呢？
小編作為熱愛遊戲嘅日本女生，對SEGA嘅印象係「一間好酷而且充滿未來感嘅企業」。首先，SEGA遊戲中嘅主角同世界觀都好型！以《超音鼠》為首，到後來的作品《女神異聞錄》同《真・女神轉生》系列都帶有科幻同其他世界嘅元素。能夠好似睇電影咁沉浸喺遊戲世界中呢個體驗深深吸引著我。
另外，我亦為走在潮流尖端嘅機器設備而著迷。就好似國內第一台有彩色液晶顯示器嘅掌上遊戲機「Game Gear」，仲有裝咗互聯網通信數據器「Dreamcast」等等，SEGA嘅遊戲機總係能夠向我哋展示一種我哋從未體驗過嘅「未來」。順便一提，喺 1990 年代屋企仲未有個人電腦嘅時候，Dreamcast 就係我哋用嚟上網嘅工具。好懷念用電視屏幕嚟發電郵俾朋友嘅時光喔～
SEGA總公司特別採訪！首先係入口
SEGA總公司喺2018年搬到聚集多間著名企業總公司嘅「大崎站」附近。
接待處附近以「令人預感會展開一場壯闊旅程的海港」作設計概念。等候區嘅設計睇起嚟就好似船上嘅客房，放滿世界時鐘同地球儀等等裝飾，睇到令人情緒高漲！
從特定位置望向牆壁，會發現隱藏超音鼠！玩心設計令來客驚喜不絕。
接待區展示訴說著SEGA歷史嘅商業用遊戲機。雖然唔能夠當場玩，但可以近距離親眼望到已經係非常珍貴嘅體驗！
客用會議室①：以世界的海港城市作主題
第一個客用會議室「HARBOR」嘅主題係世界的海港城市。25間房分別以A至Y來代表各個海港城市名嘅字首大寫，就好似H代表香港，J就代表雅加達。
會議室內裝潢設計迎合各個海港城市嘅名稱，等來客每次到訪都滿懷期待「唔知今次會去邊間會議室呢？」。順帶一提呢度係無Z房間，暗示住「SEGA嘅旅程係無盡頭」嘅特別意思喔！
客用會議室②：SEGA的歷史令人超興奮！
另一個會議室區域「SEGA HISTORY」則以SEGA過往嘅遊戲機同遊戲內容嚟命名。例如 Dreamcast 房間用咗橙色作主調，牆紙顏色同名稱形象相配，每一間房都彩色繽紛。
最值得留意嘅，係呢度仲展示咗各種機器實物。大家曾組玩到唔捨得放手嘅「SEGA 土星」、「Dreamcast」、「Game Gear」，仲有我十幾歲時超級沉迷嘅「Print Club」貼紙相機……淨係企喺度望吓望，舊時啲回憶都不斷湧出嚟，話唔定會令人唔記得咗要開會添！？
員工餐廳「JOURNEY'S CANTEEN」：超珍貴嘅限定菜單都有！
闊廣舒適嘅員工餐廳「JOURNEY'S CANTEEN」提供按重量計算價錢嘅熟食、單點食物餐單等等。唔只提供午餐，仲有晚餐，麵條350日圓，咖哩400日圓，價格相當合理！
喺特別日子仲會提供特別餐單。就好似6月23日超音鼠生日當日會限定發售以「Sonic Origins」為主題嘅食物，超羨慕囉！
&BAR（エンデバー）：員工邊玩遊戲邊交流
員工餐廳後面嘅吧台區域，以讓人在旅途中收集和交換情報的「碼頭旁邊的酒吧」作為主題。喺呢度，員工可以一邊玩桌球同飛鏢，一邊和同事作工作上嘅交流。另外，公司嘅聚會和試映會都會喺呢度舉行。
圖書館「THE LIBRARY」：刺激創意思維的空間
呢個係等員工可以自由工作同閱讀嘅圖書館。館內放滿以SEGA颯美集團珍視嘅文字內容作為主題而精選各種書籍，賦予員工無限靈感。
從窗口眺望出去係東京嘅都市景色。喺呢個可以欣賞美景同時放鬆心情嘅辦公空間，一諗到今日又有最新遊戲誕生，就令人感慨萬分。
喺SEGA總公司，我哋睇到遊戲公司應有能提高創造力嘅設計空間。咁好嘅公司，唔怪得可以生產出創意無窮嘅原創遊戲！想了解SEGA最新遊戲資訊嘅話，可以到官方Facebook望望吖。
Sonic The Hedgehog_SEA
RGG Studio_SEA
Atlus SEA
SEGA Asia
Comments