日本超划算稅金制度！換取各地名產回禮之餘，仲有機會成為世界遺產城主？～ 日本生活慳得精明又簡單嘅小貼士～故鄉納稅篇～

世上應該無乜人鍾意交稅，唯獨日本嘅「故鄉納稅（ふるさと納税）」可能係例外。

一見到「稅金」二字，身體本能下可能馬上產生排斥反應，但再認睇真啲—「故鄉納稅」制度係向各個都道府縣、市區町村進行捐款（日文稱之為「寄附」），只要捐款去到一定程度金額，就可以獲得回禮物品，所以對於「故鄉納稅」制度唔單止唔會排斥，仲會令人不禁開心到大跳「鈣質舞」！

只要好好利用，就可以用低價買得到日本各地名產喔！可能您會好奇點解會有咁優惠嘅交稅制度…「既然你誠心誠意咁問，我哋就大發慈悲咁話你知啦ー」

【入門篇】何謂「故鄉納稅」？

通過交稅對故鄉作出貢獻嘅制度，稱之為「故鄉納稅」。只要捐款畀「故鄉納稅」指定對象嘅地方自治體嘅話，原則上扣除自行負擔2,000日圓行政費用後，其餘捐款金額都可於日後全數豁免扣除（*1）。雖然根據收入以及家庭結構等，可獲扣除嘅上限額亦有所不同，但只要捐款唔超過上限額嘅話，只需要付出區區2,000日圓，就可以得到相關地方自治體嘅特產、回禮喔。

*1：向地方自治體繳納嘅總金額中扣除2,000日圓後嘅數目，即為可抵扣之所得稅與住民稅金額。例如，小明繳納2萬日圓作故鄉納稅，扣除自我負擔嘅2,000日圓之後，剩底嘅1萬8000日圓就係小明將會得到嘅抵稅額，日後會喺所得稅與住民稅中扣除。

【回禮篇】黑毛和牛與越前大閘蟹都有！多款令人垂涎三尺嘅美食

只要係「故鄉納稅」中所指定嘅地方自治體，都適用於相關制度，所以大多數人都會選擇想要應援嘅都道府縣或者想要嘅回禮項目作為選擇基準。「故鄉納稅」一年比一年熱鬧嘅主要原因之一，莫過於過於豪華嘅回禮陣容。和牛、螃蟹、海膽、水果…淨係想像都已經流晒口水！

 ※以上係經小編調查後，2022年5月現時回禮項目部分例子

被指定為故鄉納稅制度對象嘅地方自治體數目，直至2021年為止有1,786個。另外，根據總務省同年公佈《關於故鄉納稅現狀調查結果》所顯示，令和2年度（*2）嘅故鄉納稅金額創下約6,725億日圓記錄，成為過去最高金額。與「故鄉納稅」制度起步嘅平成20年（*3）金額（約81.4億日圓）相比，近年嘅狂熱程度可想而知有幾驚人！

*2：2020年4月1日～2021年3月31日
*3：2008年4月1日～2009年3月31日

【實踐篇】從申請到收到回禮嘅流程

除咗可以為鄉郊地區作出貢獻之餘，仲可以收到美食回禮，咁著數嘅「故鄉納稅」究竟要點申請？小編推薦透過「ふるなび」、「ふるさとチョイス」、「楽天ふるさと納税」等網站進行申請，皆因唔單止可在得到自治體回禮，仲可以獲得各網站嘅積分回贈或者參加優惠活動。

以下落嚟，就由小編以 「故鄉納稅」中毒級用戶嘅身分，向大家講述實際捐款經驗及其流程。

〈物色捐款單位〉

首先從各個故鄉納稅網站嘅捐款專用網頁中，搵出想要捐款、支持嘅自治體單位。不過可供選擇嘅項目真係非常多，令人左揀右揀，甚至選擇困難症發作亦係平常事。

〈申請捐款〉

填寫回禮收件地址、捐款用途（*4）等必填項目。

*4：：申請人可以指定捐款嘅使用用途，透過捐款中反映自己嘅意見。用途包括災區．災害支援、農業振興、綠化推進、交通安全教育等，根據唔同嘅自治體而有所不同。 

〈填寫文件〉

從捐款單位收到申請表格後，記得喺截止期限之前提交身分證明文件。申請獲受理之後，就會收到如上圖一樣嘅捐款受領證明書。

〈回禮開箱！〉

萬事俱備、只欠東風！跟住落嚟就係等回禮寄到您手中！

小編於2021年揀咗愛知縣・蒲郡市以及宮崎縣・西都市作為捐款單位，收到嘅回禮係接近4kg嘅豬肉，同埋大到無法同豬肉一齊入鏡嘅特大鮮蝦，瞬間將雪櫃塞到滿一滿。

（捐款金額合共25,000日圓，扣除抵稅金額後，實際只需4,000日圓！）

【番外篇】繳納故鄉納稅後 仲可以成為城堡主人！？

一般人對「故鄉納稅回禮=食品」嘅印象可能非常强烈，但其實回禮並唔只局限於美食，所包含嘅領域範圍非常大！

例如新瀉縣・三條市就起用當地戶外運動製造廠商「Snow Peak」嘅商品，而枥木縣・那須町則將申請當日即可使用嘅當地旅舘酒店住宿券作為回禮。

另外，最近成為「故鄉納稅狂」之間嘅話題就係城堡。兵庫縣姬路市於2021年12月宣佈，將世界遺產姬路城「城主」體驗作為回禮之一。捐款達3,000萬日圓以上（！）嘅話，就會將體驗姬路城新城主活動作為故鄉納稅體驗型回禮。城主體驗回禮方案令姬路城時隔153年再次出現「新城主」，內容包括安排新城主規格接待捐款者、帶捐款者遊覽姬路城，並贈予姬路城永久入城嘅權利等等令人意想不到嘅土豪式招待，因此喺日本引起廣泛關注。經過一輪公開「招標」後，新一代城主已出現，並受到以上提到嘅新城主規格接待！

• 相關文章：【日本兵庫】400年歷史國寶級建築—兵庫縣世界遺產「姬路城」

FUN! JAPAN如果代表捐款嘅話，讀者們或者有機會成為下一代嘅姬路城嘅城主！？ （笑）