去日本旅行又點會少得睇夜景呢一個環節！其實喺日本全國裡面，除咗日本三大夜景之外，全國各地亦有多個可以代表當地嘅動人夜景致。而且一去到12月，正式踏入冬季之後亦係睇夜景嘅最佳季節！今次FUN! JAPAN編輯部要同大家介紹位於北海道函館、兵庫縣神戶、長崎縣長崎日本著名三大夜景嘅迷人魅力，仲會同大家分享可以欣賞到最靚夜景嘅最佳地點，以及日本各地夜景相關情報！
關於「日本三大夜景」、「日本新三大夜景都市」
當大家搜尋日本旅遊好去處等資訊嘅時候，應該成日都會見到「日本三大夜景」呢個詞彙。
當中，北海道函館市函館山、兵庫縣神戶市摩耶山、長崎縣長崎市稻佐山三個地方所欣賞到嘅璀璨夜景就被譽為「日本三大夜景」。另一方面，2015年由日本社團法人夜景觀光會議局選出嘅「日本新三大夜景都市」，就分別係長崎市、坐擁藻岩山與「札幌白色燈樹節」而聞名嘅札幌市，以及工廠夜景、門司港懷舊展望室而備受矚目嘅福岡縣北九州市。
冬季日本之旅必睇日本三大夜景
日本四季分明，冬季為大概由12月至隔年2月。包含北海道在內部分地區喺11月左右就會預測到初雪，一到12月就正式開始感受到冬天來臨，天氣變得非常寒冷。同一時間，街上隨處就會陸續舉行燈飾活動，將冬天夜景最動人一面呈現眼前，望落更加美麗迷人。
今次編輯部要同大家介紹日本最具代表性嘅夜景景點，如果大家喺最適合欣賞夜景嘅冬天去日本嘅話，記得唔好錯過以下落嚟所介紹令人一生難忘嘅浪漫醉人景色。
稻佐山展望台（長崎縣長崎市）
與「哥拉巴園」等景點同為長崎市嘅熱門景點「稻佐山」，亦係長崎市最具代表性嘅存在。從海拔333m展望台所眺望嘅360度全景充滿視覺震撼，令人歎為觀止！天氣好嘅話，您唔單止可以將長崎市街景盡收眼簾，仲可以遠眺雲仙、天草、五島列島等地，係長崎縣數一數二嘅觀景景點。
稻佐山夜景亦有「百萬夜景」美譽。從高空上欣賞到嘅璀璨動人景色，就好似地面上嘅點點繁星！此處更加與香港、摩納哥夜景齊名，獲選為「新世界三大夜景」。
前往山頂嘅交通手段有好幾種，遊客可以選擇搭車、徒步、搭空中纜車或者搭2020年最新開通嘅山頂纜車等。當中，小編最推薦乘搭空中纜車，事關360度全景玻璃打造嘅全新車廂，係出自意大利法拉利設計師之手所設計。坐喺車廂裡面望出去嘅景色格外迷人，空中漫步令人一搭難忘！
景點資訊
- 名稱：稻佐山公園
- 地址：長崎縣長崎市淵町407−6
- 交通：
- 【公園】從長崎站搭長崎5號公車（往稻佐山方向），喺終點站「稻佐山公車站」落車
- 【空中纜車淵神社站】從長崎站搭長崎3號、4號公車，喺「空中纜車前停留所」落車，徒步約3分鐘
- 營業時間：【長崎空中纜車、山頂纜車】09：00～22：00 （全年無休）
※展望塔於長崎空中纜車營業結束之後即關閉
※屋頂展望所24小時營業 - https://www.japan.travel/tw/spot/338/
函館山頂觀景台（北海道函館市）
「函館」係坐落喺津輕海峽與函館灣兩片水域之間嘅城市，函館山觀景台更加係象徵著函館嘅觀景勝地。登上觀景台，您唔單止可以俯瞰函館市市區街景，仲可以眺望附近嘅蔚藍大海與蔥綠山林。函館夜景特色在於，兩側海灣內凹，令燈光下嘅道路望得更清楚顯得更加璀璨動人。燈光輝煌街景與暗沈大海所營造出嘅對比景象猶如星河般浪漫醉人，如詩似畫令人充滿幻想非常迷人！
出發去觀景台睇夜景之前，建議大家可以先去附近著名嘅旅遊景點行個圈，特別推薦嘅係賞櫻勝地五稜郭公園，冬天雪景亦係必睇絕景之一。另外，距離函館站算比較近嘅函館朝市，以及多間教會所在地嘅元町地區等精彩景點亦非常值得編入行程，有機會嘅話記得要去朝聖一番。
溫馨小提示：函館每年12月氣溫為零度以下，加上函館山山頂風大，出發去睇夜景嘅時候，記得著多件衫做足保暖措施。
景點資訊
- 名稱：函館山觀景台（函館山纜車山麓站）
- 地址：北海道函館市元町19-7
- 交通方式：搭乘函館市電至「十字街」站落車，徒步約10分鐘
- 營業時間：
- 【觀景台】10：00～22：00（10月16日～4月24日至21：00為止）
- 【觀景台・空中纜車】依季節有所差異，詳細請上官網查詢
摩耶美景線（View line） 掬星台（兵庫縣神戶市）
兵庫縣神戶市摩耶山山頂附近有一座「掬星台」，係關西地區最具代表性嘅觀景勝地之一。除神戶港灣美景之外，仲有大阪灣海岸線，望向東面可以遠眺大阪、望向西面可以將明石海峽景色盡收眼簾，當前美景震憾到令人講不出聲。
想出發去山頂嘅話，可以乘搭連接山腳與山頂嘅登山纜車及空中纜車。摩耶山山頂有一間「摩耶山天上寺」供奉著安產、求子、育兒嘅守護佛像，想要求子、順產、祈求小朋友健康長大嘅人，可以喺出發去睇夜景之前先去參拜。
景點資訊
- 名稱：摩耶美景線（View line） 掬星台
- 地址：兵庫縣神戶市灘區摩耶山町2-2
- 交通方式：從各鐵道路線「三宮站」搭18號市營公車，至「摩耶纜車下」站，乘搭摩耶美景線（纜車·空中纜車）喺「星之站」落車即可抵達
- 營業時間：
- 【掬星台】24小時營業
- 【摩耶美景線】依季節調整行駛時間，詳細請上官網查詢
- ※掬星台為全年無休，摩耶美景線空中纜車每週二公休
- 官網：https://koberope.jp/maya
日本三大夜景之外，各地必去浪漫夜景介紹！
一提到日本賞夜景，經典必去當然就係日本三大夜景，但其實喺其他地方都有屬於代表著各地特色嘅夜景景點。以下落嚟就要為大家介紹幾個觀景台，唔單止可以欣賞到冬天聖誕燈飾，仲可以去Shopping購物一番，飽覽夜景動人景致，再加埋其他旅遊行程精彩好去處非常多。
Shopping購物之餘，飽覽白色燈飾之浪漫美麗！札幌站周圍嘅觀景景點
札幌白色燈樹節
每年11月下旬至2月中旬，北海道札幌站站前嘅大通公園通都會舉辦「札幌白色燈樹節」。想要一次過將燈飾美景與璀璨夜景盡收眼簾嘅人，推薦可以前往位於JR札幌站嘅JR塔，由6樓登上38層樓高展望室，從高160m、北海道第一高嘅展望室將城市美景一網打盡。
大通公園裡面嘅札幌電視塔展望室亦係另一選擇。從札幌電視塔展望室望出去，您可以俯瞰大通公園、札幌市，而且唔同季節欣賞到嘅美景亦各有千秋，無論係白色燈樹節、札幌雪祭、四季盛開嘅花卉等札幌四季美景都相當吸睛。
大倉山跳台競技場
除咗札幌站之外，仲想推薦大家一個好地方，就係舉辦跳台滑雪國際賽事嘅「大倉山跳台競技場」，至今仍然係多項跳台滑雪賽事嘅比賽會場。展望台最大特色，係可以親眼目睹從實際跳台起點望過去嘅壯觀景色。
從跳台滑雪起點向下俯瞰，望見坡度極度陡峭嘅賽道同時，話唔定可以親身感受到上場比賽前選手們內心既澎湃又洶湧嘅情緒呢。
大阪都心絕景體驗♪ 除咗大啖嘆美食迷人街景亦千祈唔好錯過！
梅田藍天大廈
一提到大阪觀景景點，最著名嘅就係距離地面300m高嘅日本第一高樓「阿倍野HARUKAS」。但小編今次要推薦嘅係「梅田藍天大廈」嘅空中庭園展望台，最大特色就係可以乘搭35樓至39樓嘅透明電梯，非常過癮！前往展望台嘅過程完全透明，令人不禁心肝仔卜卜跳，就算非畏高症嘅您搭完之後或者都會腳仔軟！
空中庭園展望台嘅室外設計成圓形步道，最適合將360度全景盡收眼底。依照當日嘅天氣狀況與視野，話唔定可以眺望到明石海峽大橋、淡路島等景色。由於頂樓並非全面鋪設玻璃，想用絕景做您嘅打卡呃Like相背景嘅話，小編私心大推「梅田藍天大廈」！！
Comments