擁有圓碌碌黃色身軀、戴著焦糖色畫家帽嘅布甸狗，經常與唔同品牌聯名推出商品，更係「SANRIO角色大賞」中，人氣名列前茅、擁有參加冠軍爭奪戰嘅超人氣角色！而Sanrio明星布甸狗與秋葉原女僕Café「at-home cafe」攜手合作嘅女僕Café，各位粉絲又去過未呢？今次，FUN! JAPAN編輯部就親自去到位於日本流行文化最前線東京原宿竹下通內嘅「布甸狗女僕Café(POMPOMPURIN Café)」朝聖，徹底探索主題café必睇特色！
歡迎嚟到布甸狗打造嘅Party會場！
「布甸狗女僕Café」主題為「布甸狗為款待大家而精心佈置嘅Party會場」，除咗精美場內佈置，派對主人仲好努力咁設計出多款萌爆美食，希望每一位去到「布甸狗女僕Café(POMPOMPURIN Café)」嘅人，都會掛著歡樂笑容滿載而歸！
可愛布甸狗與多位女僕熱情款待！
「歡迎光臨♪POMPOMPURIN Café♪」。一行入店裡面，就會見到超巨型布甸狗，同埋一大班活力充沛嘅女僕，精神奕奕地同大家打招呼。另外，仲有Muffin、Whip等等布甸狗嘅多位好朋友都會係呢度齊齊歡迎大家嚟開Party！
店內裝修以布甸狗招牌黃色與咖啡色為統一色調，係特地為「布甸狗女僕Café(POMPOMPURIN Café)」精心訂做而營造出嘅布甸狗世界，還原度高到令人大開眼界！店內座位分為兩人座、四人以上座位及梳化座位，為配合各種人數需求，所提供嘅座位選擇亦非常多元化。最令人興奮嘅係，店內燈光照明、牆紙甚至餐桌座椅，每個角落都可以見到布甸狗嘅身影！
可愛女僕服務親切 營造新奇Café體驗
坐定定之後，可愛女僕就會以甜美聲線「歡迎光臨」。如果係第一次嚟呢度嘅話，女僕會親切地向您介紹Café點餐方式與料理內容，誘人美食太多，選擇困難症發作嘅時候，都可以請女僕為您推薦！
主題造型美食相當吸睛！每一種都可愛度爆燈！
「布甸狗女僕Café(POMPOMPURIN Café)」提供嘅主題造型美食除咗有主食，仲有甜品及飲品任君選擇。無論係邊款都極度萌爆又相當吸睛，賣相非常吸引，肯定可以影出羨煞旁人嘅打卡相，而且全部都係以布甸狗為主題，每一款都令人好想嗌嚟食啊！
當中，最特別吸引人就係呢一道「軟綿綿被窩中沉沉入睡zzz甜蜜美夢♡梳芙厘奄列」，布甸狗冚著綿被熟睡中嘅可愛模樣演繹得活靈活現！梳芙厘奄列就係布甸狗冚緊嘅棉被，得意到令人唔捨得食，唔忍心破壞布甸狗嘅美夢呀！
另外，可愛嘅布甸狗造型飯類美食仲有「布甸狗魅力四射♪牛油咖哩雞」，以及布甸狗手握四葉幸運草，企喺繽紛花田之中嘅造型美食「發現四葉幸運草♪ 花田❀天津飯」。
新地、布甸等多款甜品亦不容錯過
小編大推呢款「一齊出去玩～♪布甸狗造型布甸」，裝喺布甸狗造型杯裡面嘅布甸味道超~濃郁，口感超~順滑，令人忍唔住食完一啖又一啖！畫家帽驚喜地原來係用朱古力製作，所以大啖食落肚都冇問題，朱古力同布甸簡直係完美組合。
除此之外，仲有裝飾非常吸睛超級繽紛嘅「布甸狗閃亮亮耀眼新地」，以及淋上滿滿朱古力醬嘅朱古力香蕉窩夫，款款美食都令人大飽口福，對於鍾意食甜品嘅人嚟講，簡直係夢想中嘅天堂！
最後要為大家介紹飲品，非常推薦「布甸狗吉士醬布甸鮮奶咖啡～♪」和「布甸狗南國芒果拉西～♪」，喺飲品上面加上布甸狗朱古力裝飾作小小點綴，增添飲品可愛指數，飲落甜度亦恰到好處，會令人不知不覺下就成杯飲清光。
臨走前再爆買布甸狗周邊商品 記得要去手信精品區行個圈！
「布甸狗女僕Café(POMPOMPURIN Café)」裡面唔少得精品專區，出售多款布甸狗周邊商品，當中有透明file、鎖匙扣等等日常生活雜貨種類豐富，最特別嘅係店內飲品所用嘅杯都有得賣，簡直係送禮自用兩相宜。
「布甸狗女僕Café(POMPOMPURIN Café)」位於原宿竹下通上，交通非常方便。除咗有可愛度爆燈嘅布甸狗，仲可以享受女僕親切服務，係一間會令人感到新鮮感十足嘅Café！下次去日本旅行，不妨將呢間位於原宿嘅全新景點排入行程裡面，去參加布甸狗舉辦嘅盛大Party，創造一段歡樂回憶！
店鋪資訊
- 店名：POMPOMPURIN Café × at-home cafe
- 地址：東京都澀谷區神宮前1-7-1 CUTE CUBE HARAJUKU 3F
- 營業時間：平日：11：00～22：00／六日及公眾假期10：00～22：00（餐點最後點餐時間為20：50、飲品最後點餐時間為21：20）
- 公休日：全年無休
- 交通方式：從JR「原宿站」竹下口步行3分鐘／東京Metro千代田線、副都心線「明治神宮站」步行7分鐘
©2021 SANRIO CO., LTD. APPROVAL NO. S612265
Comments