和歌山縣係著名南高梅、蜜柑等柑橘類水果嘅盛產地，當地出名嘅旅遊景點包括世界遺產熊野古道、坐擁溫泉與無敵海景嘅白濱，特色景點多不勝數！
FUN! JAPAN編輯部今日要為大家介紹「和歌山遊艇城」。齋睇個名，大家可能未必太熟悉，但提到「黑潮市場」的話就一定有聽過吧！黑潮市場正正就係位於和歌山遊艇城內，從和歌山站搭巴士的話車程大約40分鐘就可以抵達，仲可以順便享受即日來回浸溫泉、炭火燒海鮮等眾多戶外活動。要留意嘅係，和歌山縣地形狹長，要從大阪、京都或奈良等其他縣出發去和歌山一日遊嘅話，安排即日來回會有一定難度喔～
去到和歌山遊艇城，除咗可以享受溫泉、品嚐海鮮丼與當地鮮甜水果，仲可以體驗釣魚等眾多休閒活動，當然亦唔少得大買特買和歌山名產！另一行程重點，必數可以欣賞到吞拿魚解體SHOW嘅「黑潮市場」，場內有齊日本新鮮魚類，難怪深受外國遊客喜愛！
去黑潮市場欣賞吞拿魚解體SHOW 再食澎湃海鮮丼！
和歌山遊艇城係一座人工島嶼，坐落於和歌山市西南方觀光勝地「和歌浦」海上。島上觀光漁市場「黑潮市場」係一座以吞拿魚為主題樂園概念而設計嘅景點，遊客可以鷤場內品嚐得到於和歌山海域捕獲嘅新鮮海鮮。和歌山縣本身面向太平洋與瀨戶內海，簡直就係出產海鮮嘅珍貴寶庫！尤其係那智勝浦町，吞拿魚捕獲量更係日本第一呢。
黑潮市場內每日會上演3次吞拿魚解體SHOW，從勝浦港、串本港等捕獲當季吞拿魚，然後成條解體，相當豪爽。您仲可以喺現場購買當場切好嘅吞拿魚肉，新鮮度爆燈！(※目前解體SHOW只有每日1次12:30)。另外，現場亦有販售壽司及吞拿魚丼，推薦您一定要好好品嚐一下當地吞拿魚嘅美味！
黑潮市場內部裝修主題為昭和30年代商店街，場內佈滿舊時招牌與海報，充滿懷舊復古氛圍，重現古時候日本人飲食文化。同場設有專區介紹吞拿魚種類、部位及營養價值，可以了解捕獲方式等吞拿魚相關豐富小知識，可以品嚐吞拿魚美味之外，亦可以學習到唔少吞拿魚知識。名副其實又食又拎！
黑潮市場必食美食
埋嚟睇！埋嚟揀！去到黑潮市場，必食美食有邊啲？以下就等小編慢慢介紹～
壽司！吞拿魚丼！鮮度爆燈吞拿魚
嚟到黑潮市場，頭號必食必定係各式各樣料理方式烹調而成嘅海鮮！唔知要食邊樣至好嘅話，毋庸置疑最佳首選就係新鮮吞拿魚！
1樓美食區內嘅壽司店提供即製吞拿魚手握壽司，用嘅吞拿魚正正就係解體SHOW期間切成嘅新鮮吞拿魚！如果想要品嚐多幾種，推薦您選擇多款海鮮濃縮喺一碗丼飯之上嘅海鮮丼，絕對係唯獨喺產地先享受得到嘅奢侈體驗。
如果係唔太敢食魚生等生食嘅人，亦有餐廳提供炙燒吞拿魚、即炸海鮮天婦羅料理，或「吞拿魚拉麵」嘅拉麵店。將吞拿魚與和歌山拉麵配搭而成嘅創意拉麵，有機會一定要去試試！另外，2樓自助餐餐廳則提供90分鐘任食放題，想要大食特食吞拿魚、壽司以及天婦羅？任食放題幫您一次過滿足多個心願！
炭燒海螺、干貝、鮮蝦！齊齊享受炭燒海鮮
小編另一推薦為炭燒海鮮，非常適合一家大細及團體旅遊嘅人！屋頂戶外露台上嘆返場海鮮BBQ，夏天唔怕太陽過於炙熱，又可以一邊欣賞靚靚海景、一邊大擦海螺、干貝以及鮮蝦串燒，食完一串又一串，真係會食到停唔到口！
想要品嚐炭燒海鮮嘅話，需要事先喺櫃檯索取座位券（※平日自由入座，請先前往餐廳「海床」櫃檯確認），之後就可以去黑潮市場裡面嘅鶴龜商店街，揀選想要食嘅海鮮、肉類以及蔬菜，最後畀錢埋單。埋單後，即可以一邊眺望蔚藍廣闊海洋，一邊炭燒BBQ喇！
景點資訊
- 名稱：黑潮市場
- 地址：和歌山縣和歌山市毛見1527
- 交通方式：
【大阪】從天王寺站乘搭JR特快黑潮，車程約50分鐘，於海南站轉乘和歌山巴士，於「和歌山遊艇城」落車
【和歌山】從和歌山站轉乘和歌山巴士，車程約40分鐘，於「和歌山遊艇城」落車 - 營業時間：10:00～17:00
Comments