神奈川縣橫須賀係日本歷史最悠久嘅軍港，如果您有機會去橫須賀旅行的話，保證您將會可以體驗一趟非一般旅遊！
鍾意發掘小眾景點的話，無人島「猿島」與現代藝術畫廊非常適合您；對於日本軍事歷史有興趣嘅讀者，至今仍然保存完好嘅軍艦會係您必去首選；而平時鍾意「食好西」嘅，就要記得bookmark橫須賀地區多款美食！接落嚟，FUN! JAPAN團隊就會馬上為您介紹融合日本與美國文化嘅神奈川縣橫須賀。
橫須賀喺邊到？
橫須賀位於三浦半島東海岸，距離東京大約1小時車程。橫須賀市面向東京灣，正對著可乘搭郵輪抵達嘅千葉金谷港。想要前往千葉欣賞鋸山等自然景色的話，橫須賀將會係您交通必經之地；而如果要前往同樣屬於神奈川縣嘅鎌倉或橫濱，橫須賀距離以上兩大知名觀光勝地都非常就腳。
橫須賀歷史
橫須賀係昔日日本美軍駐日基地，由於位處東京灣灣口、地理位置優越，因此一直以來都扮演著重要港口嘅角色。德川幕府自1720年起選址橫須賀檢查所有進港船隻，並於鎖國時期設立一座又一座砲台於沿岸以抵禦外國船隻進港，然而其後美國海軍准將佩里聯同知名黑船艦隊成功抵達久里濱，開啟日本與美國之間長期貿易關係。當日本打開鎖國大門、於1868年邁進明治時代，日本帝國海軍就著手接管橫須賀軍火庫及不斷發展城市，終於1889年開通鐵路路線，並於1907年實施「市制（※註1）」。儘管1923年關東大地震時此地曾一度遭受嚴重災情，不過橫須賀仍然能夠站穩腳步重建，並聯同其他鄉鎮合併作進一步發展。
第二次世界大戰時，橫須賀成功躲過多次主要攻擊及珍珠港事件後少量小規模報復性襲擊。為防止遭受嚴重襲擊而興建於城市周圍嘅隧道與防空洞網路，亦往往安然無恙逃過戰火侵襲。當1945年日本投降、美軍抵達日本之後，橫須賀海軍基地就被歸為美國所有，並於此地設立美國第七艦隊司令部。
※註1：制訂日本各市基本架構之法律
橫須賀主要觀光景點
維爾尼公園：悠閒放鬆玫瑰花園
維爾尼公園係一處位於水岸邊，可遙望遠至對岸橫須賀製鐵所嘅休閒景點。公園以掌握日本快速工業化發展關鍵嘅核心人物法國工程師萊昂斯・維尼（Francois Leonce Verny）名字命名，因此園內採用法式花園風格設計，場內可見修剪整齊嘅花壇、噴泉以及小屋等，當中又以超過130種玫瑰為最大睇頭。場內亦設有紀念博物館，展出萊昂斯・維尼生活點滴以及相關作品。
景點資訊
- 名稱：維爾尼公園
- 地址：神奈川縣橫須賀市汐入町1-1
- 交通：乘搭JR橫須賀線至橫須賀站，公園位於JR橫須賀站正對面
- 營業時間：公園24小時無休；博物館營業時間從早上9點至下午5點，週一休息
- 門票：公園與紀念博物館皆免費入場
猿島：無人居住馬騮島
猿島係東京灣唯一一座天然島嶼，因島上一眾挑皮「居民」（馬騮）而被稱為「猿島」。離島過往曾為砲兵基地，屬保衛東京灣要塞據點之一，如今雖然已無「人」居住，相反卻演變成熱門釣魚勝地，亦吸引唔少關東地區馬騮愛好者前來「賞猴」。島上殘留著廢棄地堡、彈藥庫等遺跡，係人氣探險景點及多齣電視劇電影取景之地，推薦安排作橫須賀之旅一日行程。
景點資訊
- 名稱：猿島
- 地址：神奈川縣橫須賀市猿島
- 交通：從橫須賀中央車站徒步約15分鐘至三笠公園，搭船至猿島約15分鐘。
- 門票：來回船票加登島費用 成人1,500日圓、小童600日圓。
登上三笠紀念艦
嚟到橫須賀，遊客有機會參觀世界最大「三笠紀念艦」，對喜愛日本軍事歷史嘅人而言更係不容錯過嘅必到景點！
紀念艦於1902年由英國建造，成為威懾西方嘅第6艘戰艦。三笠紀念艦於1905年日俄戰爭中大顯身手、發揮關鍵作用，並抵受猛烈持久火力下成功倖存，最後迫使俄羅斯艦隊投降。此後戰艦就作為日本獨立象徵而被保存至今，現時大家可以登上紀念艦，參觀船內展示出嘅當時戰爭總總以及戰後修復嘅相關資料。
景點資訊
- 名稱：三笠紀念艦
- 地址：神奈川縣橫須賀市稻岡町82-19
- 交通方式：從橫須賀中央車站乘搭三笠循環巴士，於「三笠公園」站下車，或者直接從車站步行約15分鐘即可到達。紀念艦位於三笠公園內，碼頭旁有噴泉及草地。
- 營業時間：09:00 - 17:30 （四月至九月）, 09:00 - 17:00 （三月 & 十月）, 09:00 - 16:00 （11月至2月）
- 門票：成人 600日圓、敬老票 500日圓、16至18歲青少年 300日圓、小童免費
橫須賀美術館
橫須賀美術館位處橫須賀市中心外嘅郊區，以美術與雕塑為最大特色。館藏超過5,000件作品，主要為當代藝術作品、一眾日本與國際知名藝術家作品等，範疇廣泛。除常設展覽每年4次更換展品外，官方亦會舉辦特別企劃展，當中值得關注嘅包括有收藏於「谷內六郎館」館內嘅超過40,000本圖書，重點係圖書皆歡迎遊客免費閱覽！
橫須賀美術館所在地嘅觀音崎公園又以燈塔景色而聞名，黃昏時候到訪的話，有機會可以遇上夕陽西沉絕色靚景呢。
景點資訊
- 名稱：橫須賀美術館
- 地址：神奈川縣橫須賀市鴨居4-1
- 交通：位於橫須賀市中心東邊觀音崎公園內。可從橫須賀站或馬堀海岸站乘搭巴士前往。
- 營業時間：10:00 - 18:00
- 門票：成人 380 日圓 、高中及大學生 280日圓、中學生以下免費
老虎坂通（どぶ坂通り） ：當日本遇上美國文化時
老虎坂通（どぶ坂通り）可謂日本與美國文化衝突、交織起源地，現時則作為橫須賀市內嘅商店街而深受當地居民歡迎，街上齊集服飾店、café與各種美食餐廳。
嚟到老虎坂通，首要任務就要揀返件著橫須賀刺繡外套（Yokosuka souvenir jacket）！外套一針一線皆著重細節，喺新款與古著之間慢慢挑選一件心水款式，好容易一唔覺意就令人放低唔少時間或銀兩。另一方面，街上酒吧、餐廳亦充滿美式風格，行入舖頭後頓時有如身處美國。遊客可以於店內品嚐經典道地美式料理，如漢堡、薯條，甚至更有唔少得意主題款式，例如係Trump Burger！知名電玩遊戲《莎木》更以橫須賀為舞台，將商店街重現於電玩場景之中，充滿破舊混合風格呢。
景點資訊
- 名稱：老虎坂通（どぶ坂通り）
- 地址：神奈川縣橫須賀市本町2
- 交通方式：從京急本線橫須賀中央站或汐入站徒步即達，商店街位於JR橫須賀站與京急本線橫須賀中央站之間。
橫須賀美食特產
橫須賀係家喻戶曉日本菜式「海軍咖哩」嘅發源地，店家提供口味變化多元；如果想要嘗試地道美式料理的話，就要記得唔好錯過當地嘅漢堡包！
海軍咖哩：海軍日式咖哩
海軍咖喱源自美國軍艦上向海軍船員所提供嘅咖哩，橫須賀更對外聲稱日本人對咖哩飯嘅熱愛皆起源於此！英國人從印度引進香料、製作成海軍咖哩，經過改良迎合日本人口味之後，就成為日本家庭餐桌上經常出現嘅經典主食。咖哩常見配料為肉塊及蔬菜，本身口味唔算太辣，可按個人喜好請餐廳幫您加重辣度。
云云橫須賀餐廳中，橫須賀海軍咖哩本舖可謂最受歡迎嘅店舖。餐廳本身裝潢以三笠戰艦船內裝潢為主題，充滿海軍航海士官室風格。店內提供多款豐富咖哩口味，記得約埋三五知己一次試勻咁多款選擇！
景點資訊
- 名稱：橫須賀海軍咖哩本舖
- 地址：神奈川縣橫須賀市若松町1-11-8
- 交通：從橫須賀中央站徒步數分鐘，鄰近the Prime購物中心
- 營業時間： 11:00 - 16:00 （平日） 11:00 - 20:00 （週末、假日）
美國人齊聚「 Tsunami Curry and Grill」
橫須賀內多間餐廳都會提供地道美國口味海軍漢堡，份量澎湃、用料豐富，仲會特製各家獨一無二特色漢堡。例如「Tsunami Curry and Grill」嘅巨型海軍漢堡以及美國總統主題漢堡，就成功喺橫須賀當地及IＧ上打響名堂。「Tsunami Curry and Grill」海軍漢堡用料包括mozzarella芝士、煙肉、兩片漢堡肉，重達1kg，可供四人享用，淨係賣相都已經拎滿分！同場亦有花生醬夾蛋口味Trump漢堡以及Obama漢堡，您又有無興趣一試呢？
景點資訊
- 名稱：Tsunami Curry and Grill
- 地址：神奈川縣橫須賀市本町2-2-8
- 交通方式：京急本線汐入站徒步約5分鐘，餐廳位於「老虎坂通」商店街內。
- 營業時間：11:00 - 21:00 （平日）、11:00 - 20:00 （週末、假日）
櫻桃芝士蛋糕
唔講唔知，櫻桃芝士蛋糕原來係另一橫須賀鮮為人知嘅代表美食，亦係美國海軍軍艦上必點甜品！芝士蛋糕做法由美軍傳至橫須賀當地餐廳後，其後就慢慢演變成橫須賀代表性甜品之一。遊客現時可以喺「Tsunami Curry and Grill」品嚐到正宗口味，如果食完驚人份量嘅巨型漢堡後仲有另一個胃裝甜品的話，不妨可以轉場再挑戰喔。
如何從東京前往橫須賀
橫須賀距離東京僅約一小時車程，目的地車站有兩種選擇，選擇轉乘時可根據個人需求挑選相關路線。
① JR 橫須賀站—靠近維爾尼公園，從JR品川站乘搭橫須賀線至橫須賀站，車程約70分鐘，票價820日圓，部分班次可直達，部分班次則需要喺橫濱轉車。
② 京急本線橫須賀中央站—靠近美軍基地港口，從京急本線品川站乘搭京急本線特快，車程約45分鐘，車票650日圓。如果從東京其他車站（如新宿、澀谷）或成田機場出發，則從品川或橫濱轉乘前往較為方便。
從羽田機場前往橫須賀中央站亦非常方便，車程不出一小時，而且只需要喺京急蒲田轉一次車即可。票價為700日圓。
Comments