日本四季景色怡人，尤其當秋風起時，楓葉染上秋色嘅景觀非常浪漫！日本國內有好多出名賞紅葉景點，不過FUN JAPAN編輯部今次要介紹嘅就並非一般賞紅葉景點咁簡單，而係可以一邊享受鐵道之旅，一邊欣賞沿途窗邊如畫紅葉景色風景嘅旅遊提案！今個秋天，一於就用一個省時又特別嘅方法，飽覽日本秋天景色啦！
1. 【東北地區】JR只見線 紅葉秘境 有生之年必去
JR只見線沿途將駛經只見川、磐梯山等知名山水名勝，秋天時由車窗往望外，整個山頭都會染上秋色，水面好似「天空之鏡」一樣倒映著如詩如畫色彩繽紛景色。特別值得一提係由「會津柳津」至「會津川口」一段路程上，列車更會行駛於一座橫跨河岸嘅鐵橋上，要打卡影相嘅您千祈唔好錯過！
基本資訊
- 行駛區間：福島縣 JR會津若松站⇔JR會津川口站
- 交通方式：JR會津若松站乘搭電車
- 紅葉季節：10月中旬～11月中旬
- 官方網站（日文）
2. 【關西地區】嵯峨野觀光鐵道 乘坐復古小火車穿越紅葉峽谷
要欣賞京都秋天名物之一嘅保津峽楓葉，一定係乘搭嵯峨野觀光小火車！小火車車程單程長約7.3公里並以平均約25公里時速沿保津峽溪谷緩慢行駛，乘客可以悠哉欣賞車外美景。短短25分鐘路程上充滿多處驚喜，駕駛員更會喺沿途打卡位減速行駛，令遊客可以慢慢欣賞同影多幾張相，留下最吸like嘅一刻瞬間！只要搭上觀光小火車，保證您即可以打造珍貴回憶，盡覽保津峽溪谷之美。
基本資訊
- 行駛區間：京都府 小火車嵯峨站⇔小火車龜岡站
- 交通方式：由JR嵯峨嵐山站步行至小火車嵯峨站乘搭
- 紅葉季節：11月中旬～12月上旬
- 官方網站（中文）
3. 【中部地區】長良川鐵道 奢華火紅車廂
「長良川鐵道」行駛於岐阜縣美濃加茂市至郡上市之間。車廂由日本著名設計師水戶岡銳治特別設計，帶領乘客穿越過一座又一座火紅山頭。其中位於「湯之洞溫泉口」至「郡上八幡」之間嘅路程，就有大橋配合秋葉交織出絕美景色，係鐵道之旅一大睇頭！除此之外，沿線仲有好多自然景色以及歷史觀光景點，乘客可以中途落車遊覽並了解當地歷史，或者欣賞一下大自然風景呢。
基本資訊
- 行駛區間：歧阜縣 美濃太田站⇔北濃站
- 紅葉季節：11月上旬～11月下旬
- 官方網站（中文）
4. 【東北地區】秋田內陸線（秋田內陸縱貫鐵道） 世界級賞楓景點
「秋田內陸縱貫鐵道」又稱為秋田內陸線，以色彩繽紛車廂設計為最大特色。乘搭秋田內陸線時，您可以欣賞到由「角館」至「阿仁前田站」沿途風景，當中包括美麗動人紅葉，以及連綿不斷山巒做背景，再配合埋清澈河川、以及復古鐵橋，場面就靚到好似山水畫一樣！秋田縣紅葉遼闊壯麗，更被稱為可以媲美加拿大、歐洲等世界級觀賞紅葉景點呢。
基本資訊
- 行駛區間：秋田縣 角館站⇔鷹巢站
- 紅葉季節：10月中旬～11月上旬
- 官方網站（中文）
5. 【北陸地區】黑部峽谷鐵道 滿山通紅壯麗峽谷
黑部川流經日本屈指可數嘅V字型峽谷「黑部峽谷」。黑部峽谷小火車沿黑部川行駛，乘客可於沿途眺望黑部峽谷鬼斧神工自然美景。鐵道連結「宇奈月」至「欅平」之間約20公里路程，單程行駛全部需時約80分鐘，一路上赤紅、橘黃等紅葉顏色繽紛楓葉，與翠綠河川、紅色大橋形成強烈對比，結合成一幅美景。
基本資訊
- 行駛區間：宇奈月站⇔欅平站
- 紅葉季節：10月中旬～11月上旬
- 官方網站（中文）
6. 【關東地區】渡良瀨溪谷鐵道 紅葉秘境森林小火車
「渡良瀨溪谷鐵道」全長約44公里，由群馬縣「桐生站」出發，行經渡良瀨川沿岸再行駛至櫪栃木縣「間藤站」。車窗外除咗渡良瀨川清澈水流、溪谷外，當然亦唔少得秋天紅葉楓葉。乘坐鐵道時，就好似身處於紅葉隧道中，靚到難以言語形容。另外，小火車中亦有兩節車廂窗戶不設玻璃，開放空間讓乘客無遮擋眺望紅、黃、綠交錯嘅大自然美景，打造關東地區難忘賞楓體驗。
基本資訊
- 行駛區間：群馬縣 桐生站⇔栃木縣 間藤站
- 紅葉季節：10月下旬～11月下旬
- 官方網站（日文）
Comments