立體拼圖又出新招！將成隻綿羊買返屋企整「成吉思汗」燒肉！？

令人食慾大增(?)嘅立體拼圖系列載譽歸來～繼特選燒肉、藍鰭吞拿魚、黑豬、燒雞、松葉蟹、虎河豚立體拼圖之後，今次主角就有可愛羊咩咩！而且喺「解體」之前，居然仲可以畀買家享受埋剪毛過程，真係非常「體貼」呢...

有關動物立體拼圖系列

動物立體拼圖系列，係日本玩具大廠Bandai旗下子公司MegaHouse所推出嘅商品。玩家可以將肉、器官等分解成組裝零件，並且喺每個部位標註名稱，畀大家一目了然，藉此了解動物各個部位。

今次推出嘅「整隻買回家！！成吉思汗羊肉拼圖」一共有37處部位，塞滿綿羊肚內嘅部位「零件」上方標有日文名稱，令鍾意食羊肉嘅饕客可以更加了解食用分佈。

羊毛蓬鬆可愛嘅小綿羊體內，仲可以清楚睇到帶骨小羔羊肉、羊腰、羊菲力等部位。

除咗立體拼圖之外，商品仲附有可剃羊毛嘅較剪，畀各位盡情享受分解內部器官以及剃毛嘅樂趣(?)..

將分解出嚟嘅部位放喺成吉思汗鐵板貼紙上，就可以在家完美重現出北海道最具代表性嘅鄉土料理—成吉思汗燒肉，從剃毛到上枱一律不暇手於人。見到枱上「美食」口水直流嘅同時，唔知點解又默默有一絲內疚感…