提起山口縣著名觀光名勝，好多人都會即時諗起秋芳洞或錦帶橋，但您又知唔知道其實只要花少少時間做足功課，就算係定番景點都可以有新玩法呢？發掘隱藏秘點或了解更多有趣小知識，絕對有助您嘅旅行變得更有趣！喺呢篇文章內，我哋仲會介紹埋山口縣內交通必備嘅「西遊紀行」瀨戶內地區鐵路周遊券，一於帶埋著數pass一齊出發、同朋友開心share定番以外嘅山口縣全新玩法啦！
【第３位】洞穴內嘅藝術作品展！？大鍾乳洞「秋芳洞」地底探險之旅
「秋芳洞」位處地底約100米深，係日本最大型嘅鍾乳洞之一。歷經多年歲月形成鍾乳石形狀獨特，由石灰岩成分點滴形成嘅石灰地形有如純天然藝術作品，令在場遊客無不驚嘆大自然嘅！洞內溫度長年維持於17度左右，冬暖夏涼、氣溫非常舒適怡人。溫馨提示：鍾乳洞內又濕又黑，記住帶定波鞋去探險哦！
識玩一定係咁玩！①＆②
一、500塊扁平岩石、鍾乳洞內嘅富士山？精選3大必睇位
穿過鍾乳洞入口嘅瀑布後，馬上您就會嚟到洞內第一個重頭戲—「百枚皿」。石灰成分溶於水後慢慢累積成「石灰華段丘」，當中堆積起嘅岩石數量超過500塊，屬世界罕見嘅大規模。被燈光照亮下嘅岩石閃閃發光，場面極度夢幻神秘。
二、參拜日本地標「富士山」！
所謂「富士山」，其實即係高約5米嘅超巨型石柱「洞內富士」。圓拱型空間內洞頂嘅石灰就如白雲般蓋住富士山山頂一樣。如此奇景，原來係由幾萬年來從洞頂流落嚟水滴所形成，果然係非同凡響呀！
秋芳洞
- 交通：JR新山口站轉乘往「秋吉」方向之防長巴士約40分鐘，於「秋吉台」巴士站下車後徒步約10分鐘
- ※瀨戶內地區鐵路周遊券不適用防長巴士
【第2位】高聳姿態撼動人心—日本三名塔之一「瑠璃光寺五重塔」
瑠璃光寺五重塔與奈良縣法隆寺以及京都府醍醐寺嘅五重塔並列為「日本三名塔」之一。優雅嘅檜木結構建築方式，更令五重塔獲認證為國寶級建築之一。春季櫻梅、秋季紅葉、冬季雪景等四季景色輪流交替亦深得遊客歡心。距離五重塔約10分鐘步程嘅山田市菜香亭提供和服著付體驗（須事前預約），有唔少心人都鍾意喺呢邊著住和服漫步散策㗎！
識玩一定係咁玩！①＆②
一、識玩之人一定係趁夜晚參觀！夜間必睇點燈活動
五重塔日頭夜晚一樣有靚景睇！呢到所講嘅，就係日落後至夜晚10點舉行嘅點燈活動。喺夢幻燈光映照下，五重塔入夜後散發出有別於白晝嘅神秘氣氛，漆黑中更加突顯出古老建築嘅優雅姿態。
二、研究塔身建築細節
五重塔大概建於570年前嘅室町時代，因此塔身上保留著檜皮葺屋頂等唔少當時嘅蹤跡。五重塔高約31米，越靠近塔身上層（佛塔頂層被稱為「相輪」）塔身就越尖，畀人一種清爽俐落嘅觀感。
瑠璃光寺五重塔
- 交通：JR新山口站轉乘往「新山口站」方向之防長交通巴士約35分鐘，於「縣廳前」巴士站下車後徒步約10分鐘
【第1位】勁擦3000年歷史河豚料理
河豚料理至今已有超過3000年歷史，係代表日本冬季嘅季節性料理之一。河豚魚肉味道純樸鮮甜、口感帶嚼勁，魚皮含豐富骨膠原，絕對係貪靚一族嘅福音！順帶一提，山口縣下關係日本首個放寬進食河豚料理嘅地方，下關地區更流傳著稱呼「河豚」為「幸福」嘅講法（日文內兩者發音相近）。下關市唐戶市場「活力十足馬關街」內有多家提供壽司、海鮮丼以及河豚料理嘅屋台，要覓食就去呢到啦！
識玩一定係咁玩！
刺身、邊爐、天婦羅、唐揚…！河豚料理全面進場！
可能好多人都會將河豚同刺身掛勾，但有咁嘅諗法就大錯特錯喇！刺身、雜炊、天婦羅、唐揚、白子燒…識食河豚嘅，一定係揀河豚套餐一次過試晒唔同煮法！當然，您亦可以喺多間山口縣內嘅酒店食到河豚大餐㗎。
山口之旅老手酒店住宿推薦
瑠璃光寺五重塔觀光必住！湯田溫泉
位於山口市中心地帶嘅湯田溫泉每日湧出高達2000溫泉，泉水對呵護肌膚效果顯著，係名副其實嘅溫泉聖地。區內約有30間旅館及商務酒店林立，歡迎即日來回嘅溫泉不在話下，就連免費足浴都有多達6處，自問鍾意溫泉嘅您又點可以錯過？
湯田溫泉
- 交通：JR湯田溫泉站下車即達
下關觀光必住！下關溫泉 風之海
2018年3年新開幕嘅酒店。全部客房皆附設溫泉展望風呂，膳食方面則提供會席料理作晚餐，以各種下關新鮮海產款待住客。
下關溫泉 風之海
- 交通：JR新下關站轉乘往「海洋公園」方向之SANDEN交通巴士約25分鐘，於「市立美術館」巴士站下車即達
- ※瀨戶內地區鐵路周遊券不適用於SANDEN交通巴士
山口縣旅行必備良伴：「西遊紀行」瀨戶內地區鐵路周遊券
山口縣又咁多值得去嘅觀光景點，係咪令到各位選擇困難症發作呢？想輕鬆穿梭各地，買定瀨戶內地區鐵路周遊券傍身就實無死！一pass在手，即包含岡山縣、廣島縣、山口縣及其他瀨戶內地區嘅新幹線、鐵路、巴士（※部分路線除外）5日無限次任搭放題，實屬第一次到瀨戶內地區嘅人必買！有關鐵路pass嘅精明用法，我哋將會喺另一篇文章內再作詳細介紹，記住多多支持喇～
瀨戶內地區鐵路周遊券詳情如下：
https://www.westjr.co.jp/global/tc/ticket/setouchi/
延伸閱讀：
岡山縣：
- 【新手適用】最強新手岡山自由行攻略！5分鐘帶你睇盡熱門觀光景點BEST 3
- 【老手適用】想發掘更多岡山「隱世」秘點？5分鐘帶你睇盡最新玩法BEST 3
- 岡山「好西」、您食過幾多樣？FUN! JAPAN私心推薦岡山縣必試美食BEST 3！
廣島縣：
- 【新手適用】最強新手廣島自由行攻略！5分鐘帶你睇盡熱門觀光景點BEST 3
- 【老手適用】想發掘更多廣島「隱世」秘點？5分鐘帶你睇盡最新玩法BEST 3
- 廣島「好西」、您食過幾多樣？FUN! JAPAN私心推薦岡山縣必試美食BEST 3！
山口縣：
岡山縣×廣島縣：
sponsored by JR西日本
Comments