喺迷幻詭異霓虹燈光照映之下，路過嘅會停腳步…望下招牌上嘅餐牌相片，居然會見到有翼嘅昆蟲放喺新地杯上面，其他相都全部係啲一望就嚇親，唔知可唔可以放入口嘅古怪食品。不禁令人驚呼「呢度究竟搞乜啊！？」不過就算猶豫不決，好多人都會被好奇心驅使之下，踏入呢間氣氛另類嘅舖頭入面。呢間就係位於澀谷PARCO地下1樓嘅「米和馬戲團」。
懷疑眼睛出問題 震撼視覺感官嘅料理！鳥獸蟲居酒屋
呢間居酒屋嘅主題係「怪奇美味初體驗，令人復恢元氣」嘅鳥獸蟲居酒屋，菜式全部都係野生禽鳥野獸、昆蟲。如果唔抛開固有嘅食物念頭，相信好難放得開享受呢個「多元飲食文化」。呢間舖夜晚係日式居酒屋，而日頭時段就午飯時間營業，係咖啡廳兼餐廳。講咗咁耐，等我地入正題睇吓有咩驚嚇菜式！
衝擊強烈的料理擺上桌
※以下部份圖片及畫面可能會引起讀者不安、感到嘔心及不適，請做足心理準備才繼續閱讀，如準備不足者請自行關閉視窗。
一講到呢間舖頭嘅招版彩，就要數獸肉拼盤，係入呢間餐廳嘅人必點菜式之一。除了山豬肉之外，仲有駱駝、熊、兔等眾多種類嘅野生動物肉。喺厚切嘅肉片上面，仲好細心咁擺咗名牌，等食客知道自己食緊邊種肉。
仲提供咗「MUSHI 糰子」即係用蟲同糯米糰製作嘅甜品。一串三粒，全部都配咗蛋白質豐富嘅昆蟲。
另一個令人感到衝擊嘅就係「MUSHI聖代」。擺喺聖代上面嘅係一大隻田鱉（類似水曱甴嘅昆蟲）。邊個夠膽挑戰嚟食？
最嚇人嘅係棲息於靜岡縣駿河灣深海嘅「炸大王具足蟲」，食起嚟有啲似蝦嘅風味，將成隻被稱為「深水穿山甲」嘅大王具足蟲直接落鍋油炸。
其他仲有烤鱷魚腳、烤全烏鴉等等，想要試吓食奇珍異獸、甚至係食蟲嘅話，絕對要嚟「米和馬戲團」呢度試下！
店鋪資訊
- 店名：鳥獸蟲居酒屋「米和馬戲團」
- 地址：東京都涉谷區宇田川町15-1 澀谷PARCO B1 CHAOS KITCHEN
- 營業時間：週一至週五 11：00～15：00 17：00～23：00／六日及假日 11：00～23：00
- 座位：24席
Comments