有好多日本建築都有配合當地氣候而設計，同有相應功能，亦有好多出名嘅建築物成為咗受歡迎嘅觀光景點。今次我地會一嚟睇日本建築嘅歷史，順便介紹一啲由過去保存至今嘅歷史建築。
關於日本建築
日本有好多性能良好，耐震力高嘅房屋。咁係因為要適應日本列島由北到南有各式各樣嘅氣候，而且地震頻繁。
首先，日本嘅氣候，由北至南，從亞寒帶至亞熱帶都有，擁有四季變化。建築物唔單止要可以承受四季炎熱或寒冷嘅氣溫變化，仲要可以承受高濕度嘅影響。為咗應付複雜嘅氣候，日本有好多建築構造都會善用「簷口」(軒, のき)同「隔扇」(襖, ふすま)等等，具有調節機能嘅房屋。
另外，日本從古至今都係地震活動頻繁嘅區域。所以大部份房屋、建築物都有耐震功能。
日本建築風格嘅轉變及歷史
日本建築大致可以分為1870年以前嘅「傳統建築」，同1870年之後建造嘅「近代建築」。特別係日本嘅木造建築，隨住時代變遷不斷進化，運用亞洲大陸傳嚟嘅技術，變得越來越進步。
日本傳統建築特徵
包括寺廟、神社及城堡等，都係日本傳統建築嘅「傳統工法」，係用組合木頭嚟構成柱樑，從而產生耐震力嘅建築方法。牆壁單純係分隔空間用，呈現日本之美嘅木構造係呢類建築嘅最大特徵。
日本近代建築的特徵
日本「近代建築」係指1891年濃尾地震發生之後，參考西方建築嘅耐震性而發展出嘅建築方法。當時日本人學習歐美嘅制度、知識、文明嘅「文明開化」運動，對建築界亦產生咗重大影響。例如日本嘅部份工廠，同埋有日本國會所在地嘅「國會議事堂」等建築物都係西洋風格。
除此之外，仲有好多結合西方建築同日本傳統工法嘅建築，將日式風格和同西洋風格融合一齊嘅建築。
日本代表著名嘅建築物
日本有好多著名嘅建築物，例如傳統建築、大城市中林立嘅建築等等。歷史悠久嘅日本城堡同埋神社寺廟，仲有古日本民家，呢啲木造建築都好有韻味。另外，近代建築中嘅創新設計建築亦好值得睇。
日本城堡、神社與寺廟
日本代表性嘅建築係城、神社同寺廟。各式各樣擁有高耐震力、追求外觀造型美感嘅建築物等等。
例如，建於大約1200年前嘅京都清水寺，被列入聯合國教科文組織世界文化遺產。清水寺大殿前嘅舞台，建於陡峭斜坡上。呢個舞台係「懸造式建築」(懸造り)，由格仔狀嘅木頭互相支撐構成，具有好好嘅耐震能力。另外，支撐舞台嘅木頭，以稱為「連接軸」(継ぎ手)嘅手法組合，呢種方法無用過任何一粒釘，令人足以感受到日本建築技術嘅高超能力。
另外，亦推薦大家參觀嚴島神社同埋姬路城。嚴島神社係起於御笠濱嘅一座海上神社。呢到可以見到為咗防止神社建築倒塌，運用咗各種建築技術，同埋係8至11世紀嘅日本建築風格。為咗防止建築物倒塌，所以地板之間留有隙縫讓水壓分散，社殿睇起嚟就好似漂浮喺海面上。
而姬路城就係擁有400年歷史嘅名城。城堡結構擁有優異嘅防禦力，展現日本獨特嘅建築構造風格。塗上咗灰泥嘅木造外牆、屋頂瓦片嘅堆疊方式等，呢啲特別嘅建築方式，唔單止喺日本出名，亦引起全世界嘅關注。
日本民房同街道景色
如果想盡情欣賞日本式風情，推薦您參觀擁有成排日本古民家嘅小鎮街道。例如，埼玉縣川越市、京都市內嘅街道等，可以睇到一間接一間，由古時留落嚟嘅倉庫式(蔵づくり)建築嘅民家，同埋木造嘅茶屋等。
另外，白川鄉亦擁有豐富嘅日本原始景觀，仲有以木樑組成山形屋頂「合掌造」 (合掌造り)建築組成嘅聚落。「合掌造」係日本傳統嘅建築樣式之一，指屋頂以茅草覆嘅住宅。呢啲建築物冬暖夏涼，性能極佳。
日本大城市嘅建築物
由於1950年左右開始，日本起咗股摩天大樓建築熱潮，建造咗好多超高樓層建築物。除咗高樓層建築物，塔、車站建築亦融入咗日本近代建築嘅元素。
例如「東京晴空塔」係一座高634米嘅電波塔。雖然日本地震頻繁，但「東京晴空塔」塔體嘅中央係鋼筋混凝土圓柱體，所以可以分散建築物嘅震盪與搖晃。呢個建造方式，係由日本木造建築「五重塔」中學到嘅建築樣式。
另外，東京車站嘅紅磚造建築係佢嘅大特色之一。融合咗傳統西洋式建築風格嘅獨特外觀，令人睇到得目不轉睛。
仲有有金澤車站門口嘅主體圓頂「款待圓頂」(もてなしドーム)，用咗鋁合金同玻璃製成，係近代建築時尚嘅象徵。另外，車站前方標誌性嘅「鼓門」，係用咗兩根粗大柱子來支撐，令人聯想到傳統嘅寺廟建築。
Comments