茨城縣：距離東京僅約2小時車程嘅豐富大自然觀光勝地

茨城縣位於關東東北部，距離東京僅約2小時車程，雖然鄰近大都會，但係海洋、山脈與湖泊等自然資源豐富，而且茨城縣亦擁有悠久歷史，農業、漁業發達，縣內仲有唔少豐富美食𠻹！

關於茨城縣

茨城縣地形變化甚多，南部除咗有廣闊嘅常總平原，同時亦係一個以河流與湖泊為主要地形嘅水鄉地區。

另一方面，北部山岳地區則有八溝山、筑波山等海拔高達1,000米嘅連綿山脈。

而東部，則有延綿約190公里嘅海岸線，以及日立、鹿島等漁港。

茨城縣12月至3月平均氣溫約為6.4°C，4月至11月平均氣溫則約為20°C，氣候相對溫暖。雖然一年四季都適合觀光，但編輯部仍然推薦您應該根據季節特色以決定幾時前往當地旅遊。

例如，2～3月水戶梅花盛開；7～8月海岸沿岸嘅海水浴場開放；而11月份，生長於北部溪谷嘅樹木則會形成一片壯麗紅葉景觀。

茨城縣可以分為5個旅遊區，分別為縣北、縣中央、縣南、縣西以及鹿行區。以下將為您介紹每個地區嘅推薦觀光景點。

縣北區域有溪谷、瀑布及海岸等變化豐富嘅觀光景點，其中特別推薦嘅景點有大子町著名瀑布「袋田瀑布」，又或設有吊橋嘅高萩市花貫溪谷。

遊客前往國營常陸海濱公園的話，則可以欣賞到掃帚草、傘形喜東草與粉蝶花等珍貴花卉。

縣央區域內保留著多個史蹟及傳統產業，其中特別推薦日本三大名園之一與當地賞梅勝地嘅「水戶偕樂園」。區內同時亦設有各式各樣嘅觀光設施，例如遊客可以喺「笠間工藝之丘』內體驗燒製笠間陶器；喺「海洋世界茨城縣大洗水族館」內，則可以欣賞到日本第一多嘅鯊魚養殖數量、共54種鯊魚。

縣南區域雖然最靠近市中心，但仍然擁有豐富山脈、湖泊等自然景色，而其中就絕對唔能夠錯過筑波山。筑波山係日本百大名山之一，知名度不遜於富士山；另外縣南區域必睇嘅仲有「牛久大佛」。佛像作為世界上最大嘅青銅像而聞名，身高高達120米，離地85米處設有一個展望台，您可以從裡面眺望到東京晴空塔與富士山絕景。

縣西區域遍佈多座歷史建築物及賞花勝地。其中，「真壁」係一處可以見到一系列建於1800年代後期町屋嘅懷舊街區。唔只係觀光，您仲可以穿上和服於歷史街道上散步，有興趣的話記住一定要試試！

另外，「小貝川親近公園 (小貝川ふれあい公園)」與「古河公方公園」等著名賞花景點亦係必睇推薦。小貝川親近公園內每逢5月份都會有約200萬株虞美人花綻放；而古河公方公園於春季則會約有1,500棵桃花盛開，夏季盛開嘅大賀蓮花面積更闊約3000平方米！

鹿行區域面向太平洋，大多數觀光景點都分布於海岸線上。例如面積僅次於滋賀縣琵琶湖、日本第二大湖泊嘅霞浦，晨陽光倒映於湖面上時，揚起白色大帆嘅帆船身影非常壯觀。

鹿嶋市鹿島神宮亦相當值得您一到。傳說呢座歷史悠久嘅神社早於西元前660年就已經創建，現時每年都會舉行超過90個祭典活動，例如騎馬射箭賽「流鏑馬」、約120艘船橫渡浪逆浦嘅「御船祭」就備受遊客注目。

茨城縣坐擁多款名物美食。例如係常陸牛、奥久慈軍雞等畜牧業產品，鮟鱇魚、鰹魚等水產品，以及常陸秋蕎麥麵等等。

常陸牛係黑毛和牛中最高級嘅品牌，優質紅肉與入口即化脂肪堪稱人間美食，而且適合各式烹調方法，例如係牛排、燒烤、涮涮鍋（shabu shabu）等等。提供常陸牛料理嘅餐廳大多集中於以水戶市為中心嘅縣央區域。

茨城縣住宿設施以縣央區域及縣南區域較為充實。茨城縣整體住宿類型以酒店居多，其中JR水戶站周邊就多間每晚約5千日圓以下嘅合理住宿設施。

如果想要尋找日式旅館，則推薦縣北區域。大子町、日立市、常陸大宮市都有溫泉地，住宿價位方面，多數旅館住一晚大約1萬日圓以上，比普通酒店稍貴。(截至2019年10月資訊)

從東京出發去茨城，首先請以JR東京站為目的地。從JR東京站前往JR水戶站，乘搭JR上野東京線特急列車，車程約1小時25分鐘可以抵達。

名稱：茨城縣（JR水戶站）
地址：〒310-0015 茨城縣水戶市宮町1-1-1
交通方式：JR東京站→[JR上野東京線（JR常磐線）]約1小時25分鐘→JR水戶站
Wi-Fi：有（IBARAKI FREE Wi-Fi）
語言：繁體中文、簡體中文、英文、韓文、泰文、越南文
信用卡：可以使用VISA、MasterCard、JCB、AMERICAN EXPRESS、Diners Club International、UnionPay（依施設而異）