之前，FUN!JAPAN團隊曾經介紹過「迴轉甜品」，今次我地嚟到要介紹回轉燒肉。講到三重縣，就出名出產高級松阪牛。呢間位於三重縣嘅「一升瓶」係三重縣入面嘅連鎖燒肉店，可以用經濟實惠嘅價格食到高級嘅松阪牛。不過最特別嘅係，佢嘅宮町分店係食「回轉燒肉」！大家就跟FUN!JAPAN團隊一齊睇嚟睇下呢間舖頭有咩咁特別。
乜嘢係松阪牛？
松阪牛係三重縣松阪市為中心嘅地區養育出嚟嘅肥美黑毛和牛種，仲要係無懷孕過嘅雌牛嘅牛肉，符合各種高標準，先可以叫松阪牛。係高級品牌牛肉之一，亦係日本三大和牛之一。
咦？！牛肉迴轉中？！
喺一升瓶宮町店，係全日本第一間有回轉燒肉嘅舖頭。將最高級嘅松阪牛，好似迴轉壽司咁提供好多唔同種類，而且亦同樣平民價。睇住啲肉喺個運輸帶上轉轉轉，連小朋友都會食得好開心！
菜式豐富而且優惠價格
因為間舖頭係入成隻牛返嚟，所以顧客可以用非常實惠嘅價格，試到唔同部位嘅味道。總共40鍾以上唔同嘅肉，剩係牛肩背已經有分三種。加埋蔬菜同甜品嘅話， 總共有60幾種選擇，所以按自己喜好落單。而燒好嘅肉，亦可以根據自己嘅喜好再加調味料。依照碟嘅顏色唔同價錢亦唔同。一數碟就知自己食咗幾多，一目了然。
運輸帶喺雪櫃入面，保持新鮮無難度
大家對燒肉店嘅印象可能係好多油，店入面充滿咗燒肉香味同煙。但係回轉燒肉嘅透明冷藏運輸帶就徹底打破咗大家對燒肉店嘅印象。運輸帶上有透明嘅蓋，成個就係一個大雪櫃，入面轉嘅肉都保持新鮮。想拎其中一碟時，只要按掣個透明蓋就會打開。
卡位、吧枱位任君選擇，一個人都可以燒肉
好多人可能會覺得燒肉店好多時成班人好熱鬧，自己一個人好難去食燒肉，但呢度就一個人都可以安心咁食燒肉。喺迴轉帶嘅旁邊，有卡枱位同吧枱位兩種選擇，坐喺吧枱位對住迴轉帶，咁就一個人食燒肉都唔怕尷尬。
喺舖頭入面都設有儲物櫃，用嚟放鞋、外套等私人物品，咁就唔間啲燒肉油煙味染喺依物入面。
不過一升瓶嘅迴轉燒肉唔係任何時候都運轉架。實際上餐廳亦有提供一般燒肉嘅選擇。如果想要試迴轉燒肉嘅朋友，記得去之前要確認迴轉燒肉嘅時間啊。下次去三重縣玩嘅時候，請嚟試吓呢個咁特別嘅迴轉燒肉吧！!
店舖資訊
- 店名： 一升瓶 宮町店
- 地址：〒515-0015 三重県松阪市宮町144-5(宮町交差点東)
- 電話： 0598-50-120
- 休日：不定期
- 營業時間: (迴轉燒肉)平日: 5:30 pm - 9:30 pm (截單 9:00 pm) | 周末及公眾假期: 12:00 pm - 3:00 pm (截單: 2:30 pm), 4:30 pm - 9:30 pm (截單: 9:00 pm)
- 交通: 近鐵山田線 松阪站 步行10分鐘
Comments