「湯畑」係群馬縣草津町草津溫泉最熱門嘅溫泉泉源景點，每分鐘湧出4,600公升嘅溫泉，號稱日本第一溫泉湧出量。湯畑嘅溫泉不斷冒白煙，充滿濃厚嘅溫泉風情。湯畑周邊有好多溫泉旅館、餐廳同紀念品店，形成草津溫泉街。
關於湯畑
湯畑位於草津溫泉街嘅中心。草津溫泉嘅自然湧出量為日本第一。其中，湯畑係草津町擁有最多嘅溫泉湧出量。湯畑周圍有石頭柵欄，周圍設有一條鋪咗瓦片嘅步道。仲有一個模仿草津名山「白根山」形狀嘅「白根山長凳」、足浴景點「湯霧亭（湯けむり亭）」等等。
湯畑嘅特色之處
湯畑及其周邊地區有唔少景點。以下為大家介紹一啲必睇嘅推薦景點。
湯畑嘅「木樋」、「溫泉瀑布」等草津溫泉獨特嘅風景
溫泉水從源頭湧出，流經湯畑中7條長長嘅木排，稱為「木樋」，呢啲都係草津溫泉獨有嘅景象。順道一提，木樋嘅作用除咗採集溫泉嘅「湯之花」（溫泉中嘅礦物質沉澱物），仲有調節溫泉水溫嘅作用，以供應溫泉俾周邊嘅旅館。湯畑隔離嘅「溫泉瀑布」（湯滝），係湯畑嘅溫泉水好似一般瀑布咁流到下面個池度。
到咗夜晚，藍色、紫色、白色嘅燈光，照亮咗煙霧煙霧嘅溫泉木箱。湯畑周圍嘅石頭柵欄喺橙黃色燈光照明下，呈現夢幻般嘅氣氛。夜晚食完飯、浸完溫泉，都請一定要去湯畑周邊散步體驗一下同日頭截然不同嘅感覺呀！
由岡本太郎設計嘅湯畑步道
湯畑呈現一個葫蘆型，長60米、寬20米，周圍規劃一條木棧道，可以近距離觀賞湯畑。呢個步道係由日本著名嘅西洋畫藝術家「岡本太郎」所設計。
呢條環繞湯畑嘅木棧道上處處可見岡本太郎嘅設計，例如使用瓦片拼成獨特圖樣、以獨特字型嚟呈現草津市嘅「草」字等等。嚟到呢度，不妨細心欣賞吓你腳下步道嘅設計特色啦。
「湯畑草庵」、「熱乃湯」等等湯畑周邊嘅熱門景點
湯畑周圍有溫泉、餐廳、觀光設施等各式各樣嘅景點。例如「湯畑草庵」係一個可以俯瞰湯畑嘅溫泉旅館，特別推薦館內嘅「足湯咖啡店」。呢個係一個好特別嘅地方，可以一邊浸溫泉一邊「嘆個茶、食個糕」。
另外，喺「熱乃湯」可以欣賞草津著名嘅「揉湯秀」。自古傳承落來嘅「揉湯」，係用長長嘅木板嚟翻攪溫泉水，令其降到一定嘅溫度。喺「熱乃湯」，會有身著傳統服裝嘅女人一邊表演揉湯一邊唱歌。有興趣嘅遊客仲可以親身體驗一下揉湯添㗎。
湯畑嘅營業時間及入場費
湯畑設置於戶外，無觀賞時間限制，亦唔使入場費，一年四季、由朝到晚都可以自由參觀。
由東京去湯畑嘅交通
由東京去湯畑嘅話，首先喺JR上野站搭「JR特急草津號」，大約2個半鐘到達JR長野原草津口站。然後轉車搭JR巴士，約25分鐘到達草津巴士總站。喺草津巴士總站落車後，行約5分鐘就到湯畑。
景點資訊
- 名稱：湯畑
- 地址：〒377-1711 群馬縣吾妻郡草津町草津
- 交通方式：上野站→[JR特急草津號]約2小時33分鐘→長野原草津口站→[JR巴士]約25分鐘→草津巴士總站...步行約5分鐘
- Wi-Fi：有（依施設而異）
- 語言：中文、英文、韓文
- 信用卡：可使用VISA, MasterCard, JCB, AMERICAN EXPRESS, Diners Club International（依施設而異）
Comments