熊野古道指嘅係前往位於和歌山縣，被稱為「熊野三山」之三座神社參拜嘅朝聖路線。熊野古道有好幾條路線，有由熊本縣內出發，或者由大阪、奈良、三重縣等地出發嘅路線。根據路線唔同，可以欣賞到唔同嘅歷史遺跡、神社寺廟同埋自然風景等景觀。
熊野古道小檔案
熊野古道係世界上只有兩條被登錄為聯合國世界遺產嘅參拜道之一。分為伊勢路、紀伊路、小邊路、中邊路同大邊路等多條路線。
熊野古道目的地之「熊野三山」係指新宮市嘅「熊野速玉大社」、田邊市嘅「熊野本宮大社」同那智勝浦町嘅「熊野那智大社」，呢幾座神社各自都相距20至40公里。
熊野古道之氣候及最佳旅遊季節
熊野古道位於紀伊半島南部，係一個溫暖多雨嘅地區。夏季溫度同濕度都較高；冬季日照時間短，山區特別寒冷。如果想要行山遠足，最適合嘅季節係氣候比較舒適嘅春天同秋天。
如果想冬季前往熊野古道嘅話，建議選擇紀伊路、大邊路等比較溫暖嘅沿海路線。
熊野古道嘅特色同必睇之處
熊野古道嘅唔同路線各有特色。以下將為大家介紹三條路線嘅特色同埋值得去睇嘅地方。各個路線除咗可以全程步行之外，亦可以乘搭電車或巴士到半路中途，再加步行路程。
小邊路：由高野山出發嘅熊野古道山岳路線
小邊路係連接日本佛教真言宗總本山「高野山」同「熊野本宮大社」，係距離最短嘅路線。呢條路線嘅道路比較陡峭，有三個標高1,000米嘅山脊，仲有石頭路、遺跡、路標、石佛等，保留咗濃厚嘅古道氣氛。
另外，沿途好多睇到絕景嘅景點。尤其喺果無嶺，可以見到田園鄉村風景同埋周圍雄偉山脈交織成嘅美景。
行哂成條小邊路，通常需要4至5日。
中邊路：古代嘅天皇同貴族都行過，熊野古道最受歡迎路線
中邊路由田邊市向東進入紀伊山地，可以參拜哂熊野三山嘅路線。
一路上仲有好多神社同歷史遺跡，仲有「熊野古道中邊路美術館」，可以欣賞同中邊路有關嘅畫家作品。
另外，喺位於熊野本宮大社同熊野速玉大社之間嘅熊野川，用木舟遊覽亦係受歡迎嘅熱門活動。
行哂中邊路大概需要6日5夜。
伊勢路：連接伊勢神宮嘅熊野古道沿海路線
伊勢路係連結三重縣伊勢神宮同熊野三山，體驗哂山海魅力嘅路線。呢條路線有竹林、奇岩怪石聳立嘅海岸線、仲有日本最大規模嘅梯田「丸山千枚田」等自然美景。
行哂成條伊勢路所需時間約10日。
熊野古道嘅酒店同旅館住宿
喺熊野古道所在嘅紀伊半島上，「伊勢路・大邊路」等路線經過嘅沿海一帶，有好多酒店同旅館。
另外，通過「小邊路・中邊路」等路線經過嘅內陸山區，住宿設施就唔係咁多。除咗旅館、民宿之外，有啲地方會有山小屋。而十津川溫泉同龍神溫泉等溫泉地區，就可以選擇溫泉旅館嚟過夜。
住宿費用大概每晚5千至3萬日圓不等。（截至2019年9月資訊）
前往熊野古道嘅交通方式
熊野古道有好幾條路線，由各個方向搭電車或巴士，都可以抵達熊野古道嘅起點。最知名路線「中邊路」，出發地點係熊野三山聖域起點「滝尻王子」神社。
由JR紀伊田邊站搭開往「熊野本宮大社」方向嘅「龍神巴士」或「明光巴士」，約30分鐘就可以到達「滝尻」巴士站。 落車後步行約1分鐘即可到達「滝尻王子」神社。
另外，喺「滝尻王子」對面有一個叫做「熊野古道館」嘅觀光設施。可以入內參觀睇熊野古道相關嘅展覽，同埋搵到中邊路嘅觀光旅遊資訊。
景點資訊
- 名稱：熊野古道（滝尻王子）
- 地址：〒646-1421 和歌山縣田邊市中邊路町栗栖川859
- 交通方式：紀伊田邊站→[龍神巴士/明光巴士]約30分鐘→「滝尻」巴士站...步行約1分鐘
- Wi-Fi：有（和歌山縣 WAKAYAMA FREE Wi-Fi, 三重縣 FreeWiFi-MIE）
- 語言：英文
- 信用卡：可使用VISA, MasterCard, JCB, AMERICAN EXPRESS, Diners Club International（依設施而異）
Comments